Tariki ya 12 Nyakanga 2025 yabaye umunsi udasanzwe kuri Coach Gael, umuyobozi w’umushinga 1:55 AM umaze kwamamara mu guteza imbere umuziki nyarwanda n’indi mishanga.
Isabukuru ye yizihijwe mu birori byitabiriwe n’ibyamamare binyuranye, birimo Israel Mbonyi, Bruce Melodie, Bwiza, Kate Bashabe n’abandi batandukanye.
Mu buryo butunguranye, mbere y’ibirori by’isabukuru nyiri izina, hagaragaye amashusho hakinwa umukino wa biyari (billiards) hagati ya Israel Mbonyi na Coach Gael, nk’igikorwa cy’imyidagaduro gisanzwe ariko nanone kigaragaza ubucuti bukomeye buri hagati y’aba bagabo bombi, dore ko Israel Mbonyi iteka agaragara mu bikorwa byo gushyigikira Gael.
Mu birori byaranzwe n’ibyishimo n’ubusabane buhambaye, Coach Gael, washinze akanayobora umushinga wa 1:55AM, yizihije isabukuru y’amavuko mu buryo bwihariye, aho inshuti ze n’abamukurikira ku mbuga nkoranyambaga bamugaragarije urukundo n’ishimwe.
Abamukurikira kuri 1:55AM ndetse n’inshuti ze ku mbuga nkoranyambaga batangiye umunsi bamwifuriza isabukuru nziza, bamushimira uruhare rwe mu guhanga ibitekerezo bishya, kubaka urubyiruko no kurutera imbaraga binyuze mu nyigisho zubaka umuntu ku giti cye n’imibereho rusange.
Indirimbo “Number One” ya Mbonyi yaririmbwe n’abari aho bose
Mu gihe cy’ibirori, indirimbo ya Israel Mbonyi yitwa “Number One” ni yo yaciye ibintu. Ni indirimbo Coach Gael ubwe yagaragaje ko ayikunda cyane, ndetse yayihisemo ngo ibe iy’umunsi we.
Israel Mbonyi, umwe mu bahanzi bahimbaza Imana bafite izina rikomeye mu Rwanda no mu karere, yari ahari, maze hacurangwa iyo ndirimbo mu buryo bwatumye abari aho bose bayisubiramo ijambo ku rindi. Byari ibihe by’ibyishimo n’amagambo yuzuye gushima Imana, byahindutse nk’igihe cyo gusubiza Imana icyubahiro mu ruhame.
Mu butumwa bwe, Coach Gael yashimiye Imana yamuhaye imyaka, imbaraga n’abantu bamuba hafi, avuga ko abona ubuzima bwe nk’impano itagomba gupfushwa ubusa. Yashimye abamukunda, inshuti, umuryango ndetse n’abafatanyabikorwa ba 1:55AM, abizeza ko azakomeza gukorera abandi no gushyira Imana imbere muri byose.
Coach Gael
Israel Mbonyi mu birori
Israeli Mbonyi na Coach Gael muri biyari
Bruce Melodie, Kate Bashabe na Gael
Ibirori bya Coach Gael byaranzwe no kuririmba, indirimbo Number One yari iyoboye
