Ibi bihembo bahawe birimo icya Best Gospel Artist of the Year, ni ukuvuga umuhanzi mwiza w’umwaka muri Gospel, ndetse na Best Video Song of the Year bisobanuye amashusho meza y’umwaka y‘indirimbo ya Gospel, binyuze ku ndirimbo yabo yise “Ibendera.”

Iki gihembo cyatanzwe ku wa Gatandatu tariki ya 13 Kamena 2026 mu birori byitabiriwe n’abayobozi batandukanye barimo Minisitiri w’Urubyiruko n’Iterambere ry’Ubuhanzi, Dr. Utumatwishima Abdallah; Alex Muyoboke, Igor Mabano, Producer Prince Kiiiz n’abandi.

“Ibendera” yasohotse ku wa 14 Mutarama 2026, ihita ikundwa cyane n’abakunzi ba Gospel kubera ubutumwa bwayo bwimbitse, amashusho yihariye ndetse n’injyana ya Amapiano itari isanzwe ikoreshwa cyane muri Gospel nyarwanda.

Mu butumwa batambukije nyuma yo kwakira ibihembo, Alicia na Germaine bagize bati: “Glory be to God. Indirimbo yacu ‘Ibendera’ yahawe igihembo cya Best Video Song of the Year, tunahabwa ikindi gihembo cya Best Gospel Artist. Turashimira Imana n’abadushyigikiye bose.”

Impamvu zatumye “Ibendera” iba indirimbo yihariye

Umunyamakuru Ndayishimiye Gedeon uzwi nka Tman Gedeon ku mbuga nkoranyambaga, umaze imyaka myinshi akurikirana umuziki wa Gospel mu Rwanda, yagaragaje ibintu 10 yibuka kuri iyi ndirimbo byayigize umwihariko.

Icya mbere ni ubutumwa bukomeye buyirimo, aho igaragaza Yesu Kristo nk’urukuta rukingira abamwizera hagati y’ibigeragezo n’intambara z’ubuzima.

Icya kabiri ni uruhare rw’ababyinnyi bo muri VOH Band Team basengera muri Zion Temple, bagaragaye mu mashusho bakayongerera ubwiza n’imbaraga z’injyana ya Amapiano.

Icya gatatu ni uko iyi ndirimbo yakoreshejwemo Drone mu gufata amashusho yo mu kirere, ibintu bitari bisanzwe cyane muri Gospel nyarwanda.

Icya kane ni uko amashusho yayo yafatiwe mu bice bitandukanye by’Igihugu (Huye, Nyarugenge, Gasabo,..), bituma agaragaza ubudasa n’ubwiza nyaburanga bw’ahantu hatandukanye.

Icya gatanu ni amafarasi agaragaramo Alicia na Germaine, ashushanya intsinzi y’abizera muri Yesu Kristo.

Icya gatandatu ni uko amagambo yayo yanditswe n’abahanzi ubwabo, Germaine Ufitimana na Alicia Ufitimana bafatanyije n’umubyeyi wabo Papa Innocent.

Icya karindwi ni ijambo “Rurikanwa” ryumvikanamo, rimwe mu mazina y’Imana atamenyerewe na benshi ariko rifite ibisobanuro byimbitse mu kuramya.

Icya munani ni amagambo akomeye y’iyi ndirimbo agira ati: “Satani akeka ko amfite wese, akirengagiza ko nta bubasha afite ku bugingo bwanjye.” Aya magambo yafashije benshi kongera kwizera no gukomera mu rugendo rwabo rw’agakiza.

Icya cyenda ni uko “Ibendera” yabaye imwe mu ndirimbo zabafashije kugera ku rwego rwo gutaramira muri BK Arena mu gitaramo cya Pasika batumiwemo na Ben na Chance, ikaba yarababereye impamba ikomeye mu rugendo rwabo rwa muzika.

Icya cumi kandi gikomeye kurushaho ni ubuhamya bwatanzwe n’umuntu wavuze ko yari yageze ku rwego rwo gutekereza kwiyahura, ariko nyuma yo kumva ubutumwa bw’iyi ndirimbo agahindura uwo mwanzuro.

Indirimbo yahinduye byinshi mu muziki wa Gospel

“Ibendera” yagaragaje ko umuziki wa Gospel ushobora guhuza ubutumwa bwiza n’ubuhanzi bugezweho, binyuze mu njyana ya Amapiano, amashusho y’umwimerere ndetse n’amagambo yubaka ukwizera.

Alicia na Germaine bakomeje kuba bamwe mu bahanzi b’urubyiruko bafite uruhare runini mu guteza imbere Gospel nyarwanda. Mu ndirimbo zabo zizwi harimo Urufatiro, Rugaba, Ihumure, Wa Mugabo, Uriyo na Ndahiriwe.

Kwegukana igihembo cya Best Video Song of the Year kuri “Ibendera” ni ikimenyetso cy’uko iyi ndirimbo itageze ku bantu benshi gusa, ahubwo ko yanagize uruhare mu kubaka ubuzima bwabo no kubakomeza mu rugendo rwo kwizera.

Minisitiri Utumatwishima yitabiriye itangwa ry’ibi bihembo

Ongere utereho akajisho kandi wumve ubutumwa