Abaramyi Ben na Chance bakoze ibitangaza mu gitaramo "Igicaniro concert" gitegurwa buri kwezi na Prayer House iyoborwa na Kavutse Olivier.
Ni igitaramo cyabaye ku cyumweru tariki 09/10/2022 kibera muri New Life Bible Church Kicukiro. Ni ku nshuro ya kabiri cyari kibaye kuko icya mbere cyabaye mu kwezi gushize, gitumirwamo Luc Buntu nk’umuhanzi mukuru ndetse na Olivier The Legend nk’umuhanzi uri kuzamuka neza.
Kuri iyi nshuro, Ben na Chance nibo bari batahiwe, bakaba bahuriye kuri stage n’umuramyi uzamutse neza Chryso Ndasingwa. Igitaramo cyabo kitabiriwe bishimishije, gikora ku mitima y’abacyitabiriye bitewe n’ibihe bidasanzwe byo kuramya Imana byaranze iki gitaramo.
Nubwo baherukaga kuririmba mu gitaramo cya Alarm Ministries cyabaye tariki 02 Ukwakira 2022, ushobora gukeka ko batari kubasha kuririmba muri za mbaraga zabo tubaziho kubera kunanirwa. Si ko byagenze kuko Ben na Chance bagaragaje ko gutambira Imana ari ibintu bahamagariwe.
Aba baramyi bakunzwe cyane mu ndirimbo "Yesu arakora" imaze kurebwa n’abarenga Miliyoni 4 kuri Youtube, kuko bakoresheje imbaraga zabo zose mu guha Imana ikuzo. Baririmbye indirimbo zabo zitandukanye, bananyuzamo baririmbana na Tracy Agasaro wa Kc2, abantu barishima cyane. Bashimiye cyane Kavutse Olivier [bamwise Bishop] wagize iyerekwa ry’ibi bitaramo.
REBA AMAFOTO MEZA YAFOTOWE NA MOSES NIYONZIMA
REBA INDIRIMBO "YESU ARAKORA"
