Abanyamakuru b’amazina akomeye mu Rwanda ndetse n’abaramyi b’igikundiro cyinshi barimo Bosco Nshuti na Josh Ishimwe, barahiriye kutazabura mu giterane gikomeye cyateguwe na Zion Temple Ntarama.
Ibi byamamare byahamije ko bizitabira iki giterane, binyuze muri Flame zanditsweho "I WILL BE THERE" (NZABA NDIYO) ziri guhererekanywa ubutitsa ku mbuga nkoranyambaga. Bamwe mu bo Paradise.rw yabonye kuri ayo mafoto, barimo abafite amazina akomeye mu itangazamakuru.
Muri abo twavugamo Steven Karasira umaze imyaka hafi 20 mu itangazamakuru, akaba akorera Radio Umucyo; Justin Belis wa Flash Fm umaze imyaka 10 mu itangazamakuru, Peace Nicodem ukorera Ikigo cy’Igihugu cy’Itangazamakuru kuri Magic Fm, Nelson Mucyo wa Paradise.rw,
Christian Abayisenga wa Isibo Tv ukora ikiganiro Holy Room, Gatabazi Fidele wa Radio O, Dj Spin wa CK2, Mugarura James wa O Tv, Tman wa inyaRwanda, Clarisse Uwimana wa B&B Fm Umwezi, Didace Nyifasha uyobora Radio Inkoramutima, n’abandi.
Igiterane MU BUTURO BW’UWITEKA (IN HIS DWELLING) kizaba tariki ya 15-18 Kamena 2023 kikazabera mu Karere ka Bugesera mu Murenge wa Ntarama (Kuri ARETE) ku cyaro gikuru cya ZTCC Ntarama Parish. Igiterane kizajya gutangira isaa 4:00 kugeza saa Moya zijoro 7:00 PM.
Ni ivugabutumwa ryahujwe no kwizihiza isabukuru y’imyaka 5 iri torero rimaze. Ibikorwa bizaranga iki giterane "In His Dwelling" kizajya kiba buri mwaka, ni isabukuru y’imyaka 5 tumaze kuvuga, Isiganwa ry’abanyamaguru, gufasha abatishoboye muri gahunda yiswe ’Tubaremere’ ndetse no gushyira ibuye ry’ifatizo ku nyabako nshya bagiye kubaka.
