Mu kiganiro na Paradise, Perezida wa Healing Worship Team Rwanda, Muhoza Budete Kibonke, yavuze ko iyi ndirimbo igamije gukangura abumva ubutumwa bwiza, ibashishikariza kwera imbuto zikwiriye abihanye, bayoborwa n’Umwuka Wera kandi bagafashwa kumenya ko igitambo cyatanzwe rimwe cyo gucungurwa ari Yesu Kristo.

Yagize ati: “Iyi ndirimbo iributsa abantu ko tugomba kuyoborwa n’umwuka wera kugira ngo tubashe kwera imbuto zikwiriye abihanye. Imigambi dufite ni iyo gukora ivugabutumwa hanze y’u Rwanda ndetse no gukomeza gukora izindi ndirimbo nshya.”

Indirimbo “Sinari Kwirwanirira” yamenyekanye vuba kubera ubutumwa bwayo bukomeye, ndetse ikomeza kwibutsa abantu ku rukundo Imana yadukunze. Igaragaza ko agakiza kose twahawe katurutse ku mbaraga za Yesu, ko ako gakiza tutari kukigezaho twe ubwacu.

Healing Worship Team Rwanda, izwi ku ndirimbo zabo zikunzwe cyane nka “Calvary,” “Nta Misozi,” “Icyo Wavuze,” “Mbali na Kelele,” “Nguwe Neza,” n’izindi nyinshi.

Abayigize bakunze kugaragaza umwihariko wabo mu mashusho y’indirimbo, imyambarire ijyanye n’umwuka w’amasengesho, n’ubuhanga mu kuririmba, dore ko abanyamuryango bayo harimo cyane cyane Diane Nyirashimwe, ari bamwe mu bagoroye imihogo yabo.

Uru rugendo rwabo rukomeje gukura, aho bafite abanyamuryango bashya barimo Eulade, Shukuru, Dodos, Benitha, Emerence, Tuzayikorera n’abandi, bose bafite impano n’umurava wo gukorera Imana mu muziki. Healing Worship Team Rwanda igamije kwagura ubutumwa bwiza no guhumuriza imitima y’Abakristo n’abandi bakunzi b’umuziki w’Imana.

“Sinari Kwirwanirira” irimo ubutumwa bukomeye butanga icyizere n’ihumure, bushimangira ko gukizwa ari impano y’Imana kandi ko abantu bagomba kuyoborwa n’Umwuka Wera mu buzima bwabo bwa buri munsi.

Reba indirimbo “Sinari Kwirwanirira” kuri YouTube