Umunyabigwi Uwitonze Clementine uzwi ku izina rya Tonzi yasobanuye byimbitse imvano yo gusubiramo indirimbo "Ushimwe", akayihuriramo na Ndikumukiza Samuella Jessie umwe mu mpano Imana yahaye u Rwanda n’amahanga wavutse mbere gatoya y’icyorezo cya Covid 19.
Iyi ndirimbo yakozwe na Tonzi iza gusubirwamo na Jessie irakundwa bikomeye. Byaje kurangira aba bombi bakoranye iyi ndirimbo mu gitaramo cyateguwe na Tonzi ikorwa mu buryo bwa live recording. Nyuma y’Iminsi mikeya iyi ndirimbo "Ushimwe" isubiwemo, Tonzi yagiranye ikiganiro na Paradise.
Yagize ati: "Ushimwe ni indirimbo naririmbanye na Jessie mu gitaramo mperutse gukora". Yakomeje agira ati: "Nta kuntu rero tutari kuyiririmbana kuko ni indirimbo y’amateka mu buzima bwacu. Ni indrimbo yakozwe mu buryo bwa live ku munsi w’igitaramo".
Tonzi ati: "Ubwo yasohokaga yarakunzwe cyane kugeza aho Umwana ayisubiramo noneho bijya ku rundi rwego, byankoze ku mutima cyane ndetse n’abantu benshi, byari umwanya mwiza cyane kuyiririmbana mu gitaramo dushima Imana ku bw’ibyo idukorera. Nshimira cyane ababyeyi babyemeye impano imurimo ikamurika."
Akomoza ku mvano y’ubutumwa buri muri iyi ndirimbo, Tonzi yagize ati: "Ubutumwa burumvikana cyane ni amashimwe gusa ku Mana isezeranya igasohoza. Ni indirimbo nakoze nshima Imana cyane ko yari isubije gusenga kwanjye. Nanjye ndavuga nti nzavuga kugira neza kwawe, uri Imana yo kwizerwa ushimwe".
Tonzi ni umwe mu baramyi b’abanyabirori bazwiho kwambara bakaberwa no kugaragara mu birori bitandukanye. Ubwo yabazwaga kugaragaza amahitamo ye hagati yo gutemberera mu ishyamba cyangwa ku mazi, yasekeje umunyamakuru wa Paradise aho yagize ati "Haaaaaa gutemberera mu ishyamba se keretse ngiye gutashya inkwi, nahitamo ku mazi kuko ni ubusanzwe nkunda kuhatemberera nkahagirira ibihe byiza numva uko Uwiteka agira neza".
Jessie ni umwe mu bana batoya bafite Impano itangaje doreko azuzuza imyaka 9 kuwa 24/07/2024. Iyi Ikaba indirimbo ya 3 Tonzi yashyize hanze mu mezi atarenze 3 dore ko yasubiyemo "Humura" mu buryo bwa live. Yahuje amaboko na Theo Bosebabireba na Gaby Kamanzi bakorana indirimbo "Rwanda Shima Imana" mbere gato y’iyi ndirimbo "Ushimwe".
Indirimbo "Ushimwe" niyo yazamuriye Jessi igikundiro nyuma yo kuyisubiramo dore ko kuri ubu imaze kurebwa n’abantu barenga 1,200,000 ku rubuga rwa YouTube.
Tonzi na Jessi baririmbanye bwa mbere indirimbo "Ushimwe"
