Furaha Berthe yahesheje umugisha urugo rushya rwa Maranata Tuyizere na Divine Hakuzimana mu ndirimbo y’ubukwe nziza cyane yabageneye yise" Ruratsinze", aho yashakaga gushimangira ko urukundo rudatsindwa, ikaba ari na yo mpamvu aba bombi baba barakundanye bikarangira Imana ishimye ko babana nk’umugore n’umugabo.

Aba bombi bakoze ubukwe ku wa 11 Kanama 2024, indirimbo yabo isohoka ku wa 11 Ukwakira 2024 hashize amezi abiri ubukwe bubaye. Mu byifuzo bya Furaha kuri uyu muryango agira ati: “Iyi ndirimbo ni iyo nakoreye umukobwa wange Divine n’umugabo we Maranatha ku bw’umunsi wabo udasanzwe w’ubukwe. Mbifurije ibyiza byose bibaho muri iyi si.”

Yakomeje agira ati: “Ubuzima buzira umuze, ubukire, urukundo ibyishimo n’amahirwe bizabe mu rugo rushya rwabo. Gusa byose bigomba gushyirwa mu maboko ya Kristo, akaba ari we ubanza mu muryango wanyu. Icyo muzakora cyose, Imana igomba kuba iri hagati yanyu.”

Avuga kuri Dvine, Furaha Berthe yagize ati: “Divine ni nshuti yanjye, turaririmbana kandi mufata nk’umwana wanjye.” Divine afatwa nk’umukobwa wa Furaha kuko uretse kuba baririmbana, Divine ari mu bamufasha muri backing (amajwi y’inyongera yongerwa mu ndirimbo).

Furaha yagize ati: “Divine ni inshuti yanjye, ni umwana wajye kuko namubereye marreine, ku bw’ibyo rero nahanze iyo ndirimbo ku bwe kandi narayimuririmbiye mu bukwe bwe, urukundo Ruratsinze.”

Iyi si indirimbo ya 1 y’ubukwe uyu muhanzikazi akoze kuko aherutse gusohora indirimbo y’ubukwe yakoreye uwitwa Camara. Kuri iyi ngingo yagize ati: “Nta bwo ari kwibanda ku indirimbo z’ubukwe ahubwo ni ku busabe bw’abageni baba babyifuje kandi bose turaririmbana. Ubwo bose ni abakobwa banjye.”

Ubusanzwe ni umuhanzi mwiza mu ndirimbo zo kuramya no guhimbaza Imana kuko yasohoye iyi akiri kumvikana cyane mu ndirimbo ye igezweho kandi ikomeje gukundwa na benshi yo kuramya no guhimbaza Imana yise Mataifa Yote yasohotse ku wa 20 Nzeri 2024.

Furaha usengera mu Itorero ry’Abadivantisite b’Umunsi wa Karindwi yakomeje kuvuga ku bikorwa bye biteganyijwe nyuma y’iyi ndirimbo agira ati: “Hazakurikiraho izindi ndirimbo zitandukanye kuko gahunda mfite mu uyu mwaka ni ugushyira hanze indirimbo imwe buri kwezi, kandi mbihagazemo neza.”

Furaha asohoye iyi ndirimbo nyuma y’iminsi mike asohoye magazine. Yagize ati: “Natangiriye kuri magazine ariko gahunda yo kwandika irakomeje. Ndi kwitegura kwandika igitabo ku muryango.” Ibi bisobanuye ko uretse kuba umwanditsi w’indirimbo yandika ibinyamakuru (magazine) n’ibitabo.

Avuga ku musaruro wavuye mu gitaramo aheruka gukora yagize ati: “Ku bijyanye n’umusaruro nakuye muri magazine, ibitabo nasohoye byose byarashize. Ntegereje indi commande.”

Furaha nubwo asanzwe ari umuhanzi wo kuramya no guhimbaza Imana, ntibimubuza gukorera ababyifuza indirimbo y’ubukwe nk’uko yabigenjereje Divine
Ushobora kureba indirimbo "Ruratsinze" Furaha yabageneye