Korali Ebenezer ihagurukanye ingamba nziza kandi zikomeye muri uyu mwaka uje wa 2024. Iherutse gushyira hanze indirimbo nziza kandi zikoze neza zafatiwe muri alubumu baherutse gukora bise "Intsinzi Nyantsinzi", izo ndirimbo ni "Umurimo ni uw’uwiteka" na "Ebenezeri" bitiriye izina ryabo risobanura "Uwiteka waratuzahuye".

Umuyobozi wa korali Ebenezer, Vincent Nkundimana yabwiye Paradise ati: "Dufite gukora indirimbo z’amashusho 3 zirimo imwe yo gusoza umwaka dore ko nta ndirimbo yaba iya Noheli yaba iya ’Bonne année’ - isoza umwaka y’amashusho dufite.

Ati: "Tuzakora ku mibanire cyane. Muri uru rwego dufashijwe na commission y’imibanire abaririmbyi bagiye gusurana hagati muri bo kuva mu kwa mbere kugera mu kwa Gatatu. Nyuma y’aho korali irigabanya mu matsinda mato mato buri muterankunga asurwe duhereye Huye kandi bizageza mu kwa Gatandatu buri wese yaragezweho."

Si ibyo gusa kandi Ebenezer ifite gahunda yo gufasha abagororwa batishoboye bari muri gereza. Ati "Twamenye amakuru ko hari benedata batagira icyo kwambara mu bihe baba bakeneye kwambara imyenda itari (uniforme) ariko twapanze ko buri wese uko ashoboye azashaka umwenda azatanga nk’imfashanyo noneho inzego zibishinzwe zivugishwe abababaye kurusha abandi bafashwe".

Yakomeje agira ati: "Tuzagura imibanire ndetse tubyutse umubano n’amakorali amwe n’amwe dufitanye amateka harimo no kujya i Kinyinya tukamarana iminsi ibiri. Ubwo duherukayo bigeze kutwakira turanaharara muri 1997 ubwo twakoraga kasete ya mbere. Tuzagira n’umubano n’amakorali nk’atatu muri uyu mwaka wa 2024."

Yasoje agira ati "Mu gusoza umwaka Korali Ebenezer, twese tuzasangirira hamwe twifurizanya Noheli nziza n’umwaka mushya wa 2024. Abanyamuryango ba korali Ebenezer bimukiye Kigali, Muhanga n’ahandi muri icyo cyerekezo, tuzahurira hamwe ahantu tuzumvikanaho tuganire ukuntu twajya dukorana ndetse batubere intumwa (Ambassadeur) aho bagiye kuba kurusha uko bisanzwe bikorwa".

RYOHRWA N’INDIRIMBO "EBENEZERI" YA EBENEZER CHOIR