Umuhanzi Chryso Ndasingwa yiteguye gukora igitaramo gikomeye cyiswe "Easter Experience", kizaba ku wa 20 Mata 2025 muri BK Arena nk’uko bitangazwa na Inyarwanda.
Iki gitaramo kizaba ari umwanya wo kwizihiza umunsi wa Pasika, aho abakunzi b’umuziki wa Gospel bazasangira ibyishimo by’Izuka rya Yesu binyuze mu ndirimbo zo kuramya no guhimbaza Imana.
Ni ubwa mbere Chryso Ndasingwa agiye gukora igitaramo cyihariye cya Pasika, nyuma yo kwandika amateka mu mwaka wa 2024 ubwo yuzuzaga BK Arena mu gitaramo cyo kumurika album ye ya mbere “Wahozeho”.
Uyu mwaka aragarutse, yiteguye gusubira muri iyi nyubako imaze kuba ikimenyetso cy’ibihe bikomeye mu muziki wa Gospel mu Rwanda. Paradise ifite amakuru avuga ko igitaramo cya Chryso gishobora kuzabera mu yindi nyubako ikomeye muri Kigali itari BK Arena.
Chryso Ndasingwa, uzwi mu ndirimbo nka "Ndakwihaye", "Wahozeho", "Ntajya Ananirwa", "Ntayindi Mana", n’izindi, amaze imyaka igera kuri itatu akora umuziki wa Gospel nk’umuhanzi wigenga. Akorera umurimo w’ivugabutumwa mu Itorero rya Newlife Bible Church Kicukiro.
Uretse kuba umuramyi w’inararibonye, ni n’umucuranzi w’umuhanga kuri gitari na piano, aho yabyize binyuze kuri YouTube maze akaza gusangiza ubumenyi abandi. Ku myaka 17, yatangiye kwiyumvamo umuziki, none kuri ubu amaze kwigarurira imitima y’abatari bake.
Mu mwaka wa 2024, Ndasingwa yagize ibihe by’intsinzi, aho yakoreye igitaramo cy’amateka i Burundi mu mujyi wa Bujumbura, aho abantu bakubise bakuzura Life Centre mu gitaramo "Ipendo Event kw’Iriba". Ibi byamuhaye imbaraga zo gutekereza ku bindi bitaramo bikomeye, birimo iki cya Easter Experience.
Igitaramo cya Easter Experience kije mu gihe cyari kimenyerewe cyane kuri Patient Bizimana, wari umaze imyaka 15 ari we utegura ibitaramo byihariye bya Pasika mu Rwanda. Uyu mwaka, Chryso Ndasingwa yiyemeje gufata iyo nshingano, yinjira mu rutonde rw’abahanzi bake bategura ibitaramo bikomeye by’uburyohe bw’indirimbo za Pasika.
Chryso yavuze ko yiteguye gukora iki gitaramo atizigamye, kandi ko intego ari uko Imana ihabwa icyubahiro binyuze mu ndirimbo, abantu bagahumurizwa kandi bakagira ibihe byiza by’isanamitima. Ati: "Birashoboka ko amateka azisubiramo nkuzuza BK Arena".
Iki gitaramo ni kimwe mu bizafasha abakunzi ba Gospel kwizihiza Pasika mu buryo budasanzwe, kandi kikaba n’undi mwanya wo kwerekana impano ye mu kuririmba no gucuranga.
"Easter Experience" iraje, mutegure imitima!"
