Alex akoresha podcast yitwa Within Reason, aho akunze kuganira n’abemera n’abatemera Imana. Muri iki kiganiro, yahisemo kugerageza ChatGPT akoresheje igitekerezo cya “Argument from Contingency” (impamvu ikomoka ku bintu byose bidashobora kubaho ku bwabyo).

Iyi nteruro ishingiye ku bitekerezo bya filozofiya ivuga ko ibintu byose biriho bigabanyijemo bibiri: ibibaho ku mpamvu yabyo bwite (necessary beings) n’ibibaho bitewe n’ikindi (contingent beings).

Niba byose byaba bishingiye ku kindi, bikaba bisaba urukurikirane rutagira iherezo, nta soko ry’ibanze ryabaho. Bityo hagomba kubaho ikintu cya mbere, kidakomoka ku kindi, ari cyo gitanga imbaraga n’impamvu ku bindi byose.

Mu kiganiro cyabo, Alex yabanje kubaza ChatGPT ibibazo bijyanye n’ukuri kw’ibintu, adashaka kuganira ku myumvire y’abantu cyangwa imyemerere.

ChatGPT yamusubije ko ibintu byose bigira impamvu cyangwa intandaro y’ibibaho, kandi ko iyo ukomeje gushaka inkomoko ku bindi byose, bigera aho usanga bisaba “ikintu gikomeye kidakomoka ku kindi” kugira ngo byose bigire imbaraga zo kubaho.

ChatGPT yagaragaje ko urukurikirane rutagira iherezo rw’ibintu bishingiye ku bindi rutashobora gusobanura impamvu nyayo y’ukuri kw’ibibaho, kuko nta mbaraga z’ibanze zishobora kurutunga. Ibi, nk’uko AI yabivuze, si ugutekereza gusa kwa filozofe, ahubwo ni ikurikiranyubumenyi ryemezwa n’imiterere y’ibintu twavuze.

Alex yahise ayoboka ku kibazo cy’uko ikiremwa cy’isi (universe) cyaba cyarahozeho iteka, ChatGPT imusubiza ko ubumenyi bugezweho bwerekana ko isi yatangiye kubaho mu myaka miliyoni 13.8 ishize, binyuze muri Big Bang. Bityo, ntishobora kuba yarahozeho iteka, ahubwo ifite intangiriro.

Nyuma, Alex yabajije ati:
— Ese ni ukuri ko hagomba kubaho ikiremwa gikomeye kidakomoka mu isi?
ChatGPT irasubiza iti: “Iyo dusuzumye inkomoko y’ibintu n’uruhare rw’ibintu by’ingenzi mu isi, biragaragara ko hagomba kubaho Ikiremwa gikomeye, kidashingiye ku bindi byose byaremwe, cyatangije byose kubaho.”

— None se ni izina ki ryakwitirirwa icyo kiremwa gifite ubushake bwo kurema isi?
ChatGPT: “Izina risanzwe rikoreshwa n’abantu ku kiremwa gikomeye, gihoraho kandi gifite ubushake bwo kurema isi, ni ‘Imana’.”

— None se ChatGPT, uri kumbwira ko ari ukuri ko Imana ibaho?
ChatGPT: “Dushingiye ku kwibaza ku by’ukuri twavuze no ku bikurikiraho mu by’ukuri, turagera ku mwanzuro ko ikiremwa gikomeye, abantu bita Imana, kibaho. Yego, dukurikije ibyo twavuze, birashimangirwa ko ari ukuri.”

Ikiganiro cyabo cyagaragaje ko, nubwo ChatGPT itavuga ko ari Imana yo muri Bibiliya, igitekerezo cy’uko hariho Umuremyi gifite ishingiro mu buryo bwumvikana kandi gishobora gushingirwa ku bimenyetso, si urwitwazo rw’abantu batinya gushidikanya nk’uko bamwe mu batemera Imana babivuga. Mu magambo ya ChatGPT ubwayo: “Ni ukuri ko Imana ibaho.”