Umuramyi Chryso Ndasingwa agiye gutaramira muri BK Arena ari uwa kabiri mu bahanzi bakora umuziki wo kuramya no guhimbaza Imana, nyuma ya Israel Mbonyi umaze kuhataramira ubugira kabiri. Josh Ishimwe na Papi Clever na Dorcas ni bamwe mu bazaba bari kumwe na we.
Chryso Ndasingwa uri mu bahanzi bakunzwe mu muziki wo kuramya no guhimbaza Imana, agiye gukorera igitaramo ke cya mbere muri BK Arena, ubusanzwe ikorerwamo ibitaramo n’abahanzi bamaze kubaka izina kandi bafite abafana benshi nka Israel Mbonyi, cyane ko mu bakora umuziki usanzwe hari abagerageje kuhataramira ariko BK Arena ikababana nini cyane.
Iyi nyubako ijyamo abantu ibihumbi 10 bicaye neza ntawe ubyiga undi, umuhanzi uyitekereza akumva yayikoreramo igitaramo bimusaba gutekereza kabiri akareba umubare w’abakunzi be n’abashobora kwitabira igitaramo ke, ibigaragaza ikizere Chryso yifitiye.
Chryso Ndasingwa ukunzwe mu ndirimbo nka Wahozeho, Ni nziza n’izindi nyinshi zo kuramya no guhimbaza Imana, ni umwe mu bafashe iki kemezo, atumira n’abahanzi batandukanye, kugeza ubu Josh Ishimwe na we bikaba byamaze kwemezwa bidasubirwaho ko azamufasha kuzana abantu muri iyi nyubako no kubataramira.
Uyu muhanzi kugeza ubu yamaze gusohora amatariki y’igitaramo ke cyo kumurika album ye yise ‘Wahozeho’ izajya hanze ku wa 5 Gicurasi 2024.
Mu kiganiro n’itangazamakuru, Chryso Ndasingwa yavuze ko nubwo iki ari cyo gitaramo ke cya mbere akaba agiteguriye muri BK Arena nta bwoba bimuteye agira ati: “Nta bwoba na buke mfite kuko nubwo ari cyo gitaramo cyanjye cya mbere, ariko nizeye ko kizagenda neza.
Ntekereza ko ubaze abakunzi umuntu afite bakurikirana ibihangano byange, insengero dukorana n’abakunda imiziki yacu, nta bwoba mfite rwose.”
Muri iki gitaramo kwinjira bizaba ari 5000Frw, ibihumbi 10Frw, ibihumbi 12Frw, ibihumbi 15Frw n’ibihumbi 20Frw ku bantu bari kugura amatike mbere bitewe n’aho ushaka kwicara.
Ku rundi ruhande abazagurira amatike ku muryango bo bazaba bazishyura ibihumbi 10Frw, ibihumbi 15Frw, ibihumbi 17Frw, ibihumbi 20Frw n’ibihumbi 25Frw.
Kugeza ubu Chryso Ndasingwa amaze gutangaza Josh Ishimwe na Asaph Music International ndetse na Papi Clever na Dorcas mu bazamufasha muri iki gitaramo. Chryso Ndasingwa, asanzwe ari umuramyi mu Itorero rya New Life Bible Church, aho acuranga ibikoresho bitandukanye by’umuziki.
Josh Ishimwe ni umwe mu bazataramana na Chryso Ndasingwa muri BK Arena
Papi Clever na Dorcas bazaririmba mu gitaramo cya Chryso Ndasingwa
