Nyuma yo kwinjira mu muryango w’abaramyi mu ndirimbo "Akira Ishimwe", Couple ya Paci & Sophie bunze muri wa mugani uvuga ngo "Imvura igwa ntisubire bayita cyumya", bagarukana indirimbo "Ahera". Ni indirimbo ihumuriza abantu kubw’imiruho n’imihate yo mu isi.
Amazina yabo asanzwe ni Rwagasana Pacifique na Umwari Sophie. Paci avuga ko yatangiye umuziki akiri umwana aho yaririmbaga muri Korali y’abana, akura akunda kuririmba. Indirimbo ye ya mbere yayisohoye mu mwaka wa 2007. Umugore we Sophie nawe ni uko yakuze akunda kuririmba ndetse aba no muri Korali.
Aganira na Paradise, Paci yavuze ko igitekerezo cyo kuririmba nk’i couple ari iyerekwa bakuye muri Bibiliya aho ijambo ry’Imana rivuga ngo "Ababiri baruta umwe". Ni ijambo riboneka mu gitabo cy’Umubwiriza 4:9-10.
Yagize ati: "Twese twahuye turi abaririmbyi dusanga ko guhuza imbaraga nk’umuryango byaba byiza dore ko binongera urukundo hagati y’abashakanye, mu gufatanya ndetse rukaba urugero rwiza no kubazadukomokaho.
Yakomoje ku butumwa bukubiye mu ndirimbo "Ahera". Yagize ati: "Ni indirimbo ihumuriza abantu ivuga ko n’ubwo twaba turuhira mu isi mu ntambara zinyuranye hari igihe ibyo byose bizarangira tukinjira ahare cyane aho Imana yaduteguriye. Ni indirimbo yo kuremamo ibyishimo no gusubizamo imbaraga abababaye".
Yakomeje agira ati: "Umuntu uri guca mu bikomeye agomba kurenza amaso ibyo ari gucamo akinjira ahandi hantu hera aho aganira na mwuka wera akamukomeza akabona ihumure."
Akenshi uzasanga buri muhanzi agira ubutumwa atanga bikajyendana n’umuhamagaro we, inzira yanyuzemo n’aho yahamagariwe. Niyo mpamvu uzasanga hari abantu baririmba ibigeragezo, hakaba abaririmba b’umusaraba n’abanditsi bibanda ku butumwa bw’inkomezabugingo.
Abajijwe ubutumwa iyi couple yibandaho, yagize ati: " Twibanda ku butumwa buhumuriza abantu ndetse no kuramya Imana tuvuga ubwiza bwayo n’icyubahiro cyayo."
Yashimagije couple ya James na Daniella avuga ko hari byinshi bayigiraho. Avuga ku masomo babigiraho, yagize ati: "James na Danniella uburyo bandika, uburyo baririmba, n’ukuntu ubona bakundanye.
Mu mvamutima ze yavuze ko byiza cyane kuba Gospel ifite abantu nk’aba. Yagize ati: "Natwe bitwongera imbaraga cyane kandi umunsi umwe twifuza kuzakorana nabo Imana nibabiha umugisha".
Muzika ya Gospel yungutse Couple ya Paci & Sophie
RYOHERWA N’INDIRIMBO NSHYA YA PACI & SOPHIE
