Iki giterane mpemburabugingo kitezwemo iminyago myinshi dore ko hateguwe abagabura b’ijambo ry’Imana bazwiho kugira inyigisho zitabemberereza zimwe zirandurana icyaha n’imizi yacyo ari bo Ev Sophie Muhimundu na Pastor Mugabowindekwe Joseph.

Mu minsi y’irungu, agahinda n’umubanaro, hanaguramo le 8 na le 09/06 2024 kuko aya ari amatatiki y’umugisha, ibyishimo, umunezero no gufashwa n’Umwuka Wera, aho Besalel Choir izwi cyane mu ndirimbo "Golgota" yahuje umunga w’ubutatu bwuje ubumana na Korali ebyiri zavuzwe haruguru, itegura igiterane gifite intego yo kwamamaza ubutumwa bwiza bwa Yesu Kristo, muri iki gihe no mu gihe kizaza, hifashishijwe ibizasigara mu giterane nk’uko Paradise.rw yabitangarijwe na Bwana Innocent Kubwimana Perezida wa Besalel Choir

Intego y’iki giterane ishingiye ku ijambo ry’Imana riboneka muri (Abakolosayi 1:28) hagira hati: "Ni we twamamaza tuburira umuntu wese, tumwigisha ubwenge bwose kugira ngo tumurikire Imana umuntu wese, amaze gutunganirizwa rwose muri Kristo."

Iyo bavuze Besalel Choir yaba Mamasengesho (wa muntu wibera ku karago wahisemo kwibanira na Yesu akaramata nk’umusaza, Simeyoni wo muri Bibilia)! Mukanyandwi (ndavuga ba bantu basenga 1 mu kwezi), Uwamwezi (usenga 1 mu kwezi) na tereriyo umwe wateye umugongo ibya Yesu, buri wese yumva utuntu tuzamuka mu mubiri we n’impinduka ahanini bitewe n’indirimbo zikirigita umutima zigaragiwe n’indirimbo Golgota.

Jye kabarankuru nigeze kuyumva mu kwezi Kwa 12 Kwa 2015 ndarira. Ni indirimbo igira iti: "Golgota, Golgota, Musozi untera kwibaza, Umusozi w’agahinda, Musozi w’umubabaro,..Waririweho amarira menshi cyane Golgota, wamenetseho amaraso, menshi cyane Golgota,.."

Mu nyikirizo bagira bati: "Ndagukunda Golgota,unyibutsa amateka y’uwankunze ntamuzi asiga byose ngo ambone aritanga ngo mbeho! Ni indirimbo yatumye intama nyinshi Zari zarazimiriye kuri Satani zihomboka kuri shebuja zomatana na Kristo iteka."

Aganira na Paradise, Innocent Kubwimana ushumbye iyi korali yavuzeko muri iki giterane hitezwemo kuzabona Imana ikoreramo umurimo ukomeye wo kubohora abantu bayo Kandi bikazanakomeza. Yagize ati: "Abakunda ubutumwa bwiza tubahaye ikaze, umunezero wacu ni ugusangira ibyo turi gutegura.

Besalel choir ikaba yariyemeje gukomeza gushaka iminyago izamurikira Kristo kuri wa munsi, akaba ariyo mpamvu bakomeje gukora ibiterane bitabarika dore ko no kuwa 25/02/2024 iyi korali yakoze igiterane cy’amateka aho yifatanyije na Korali Ukuboko kw’iburyo mu gitaramo cy’amateka Satani yarwanyije bikomeye ariko akaza kuneshwa ku makuru yuzuye paradise ifite.

Iyi korali Kandi Ikaba izwi mu biterane bigamije kurwanya ibiyobyabwenge ndetse n’ubusambanyi Aho iherutse gukorera ibiterane nk’ibyo i Murambi no mu gatenga ku bufatanye n’itorero Ndetse N’ubuyobozi bw’inzego z’ibanze.

Kuba igiye guhura na Jehovah Jireh Choir na Rehoboth Choir zisanzwe zifite amavuta atameneka benshi babifashe nk’ubushotoranyi hakaba hagowe Satani n’abadaimoni dore ko bitezwe ko Kristo niyohereza Marayika Gabriel n’abambari be ikuzimu bazabura intama n’ibyuma.

Jehovah Jireh choir izwiho indirimbo zibuza abantu gukoraho no kubibutsa ko babikiwe ibyasezeranijwe Ikaba izamurikira abazitabira iki giterane indirimbo yabo nshya bise"Hahiriwe" yafashwe mu buryo bwa live recording. Ni indirimbo ikubiyemo ubutumwa bwibutsa abantu ko hahiriwe umuntu Uwiteka azasanga Ari maso.

Besalel Choir yatangiye umurimo wo kwamamaza ubutumwa bwiza nyuma gato ya Jenoside yakorewe Abatutsi mu 1994. Yatangijwe n’abinginzi basengeraga mu cyumba cy’amasengesho aha hakaba hari mu mwaka wa 1995.

Mu mwaka wa 1996 nibwo havutse umudugudu wa murambi watangiranye n’iyi korali (ubu byitwa Itorero rya Murambi). Iyi korali yari ifite amavuta guhera mu ntangiriro yakomezaga kwaguka no kugwiza imbaraga nk’uko bigenda no ku yandi matsinda.

Kuri ubu ifite Abaririmbyi basaga 100. Muri aba baririmbyi hakaba harimo umuramyi w’icyamamare Vedaste Christian uzwi mu ndirimbo "Uzi Gukunda" ndetse n’umunyamakuru Umumararungu Claire wamenyekanye ku isango Star no kuri Life Radio akaba n’Umukozi w’Umuryango wa Bibiliya mu Rwanda, BSR.

Mu bihe bitandukanye iyi korali ikaba yarayobowe na Ingabire Claire, Jean Paul Nizeyimana, Karamuka Jean Pierre n’abandi.

Besalel Choir, Jehovah Jireh na Rubonobono choir zigiye guhurira mu giterane karuhura