Umunyamakuru wo kuri Radiyo Isibo iri mu zikunzwe mu myidagaduro na we akaba azwi mu busesenguzi bw’imyidagaduro cyane uzwi ku mazina ya DC Clement, yavuze amagambo meza kuri Isael Mbonyi.
Ni nyuma y’uko uyu muhanzi mu ndirimbo zamamaza Ubutumwa Bwiza, Israel Mbonyi, ashyize hanze amashusho y’indirimbo iri mu Giswayile. DC Clement yagize ati: “Uyu musore asize amavuta atari amasukano kabisa! Akaririmbo ke urakumvaaaa ukakumviriza iminota 13 igashira utabishaka!”
Iyi ndirimbo DC Clement yashishikarizaga abamukurikira gufata umwanya bakayumva abizeza ko barayirangiza bakumva ibabanye ntoya kandi ifite iminota 13, ni iyo aheruka gushyira hanze ku wa 2 Ukwakira 2024 yise Kaa Nami, ikaba ari Tugumane yahinduwe mu Giswayile ijambo ku rindi.
Israel Mbonyi yayisohoye mu rwego rwo gukomeza urugendo yatangiye rwo gufata zimwe mu ndirimbo ze zakunzwe akazihindura mu Giswayile azivanye mu Kinyarwanda, ndetse yanatangaje ko ashobora no kuzazirirmba mu zindi ndimi zitari Igiswayile gusa.
Ubwo aheruka mu itangazamakuru yavuze kuri iyi gahunda yo guhindura indirimbo ze zakunzwe mu Kinyarwanda akaziririmba mu zindi ndimi zitandukanye agira ati: “Hari indirimbo nyinshi abantu bakunze nifuza gushyira mu zindi ndimi. Numva uko nzajya mbishobozwa nzajya ngenda nzisubiramo imwe ku yindi, wenda ngaha amahirwe abakunzi bange batumva Ikinyarwanda kuryoherwa na zo.”
Kuva Israel Mbonyi yakora indirimbo zo mu Giswayile ahereye ku yitwa Nina Siri yasohotse mu mwaka wa 2023, abakunzi n’abafana be bariyongereye cyane cyane abo mu bihugu bikoresha Igiswayile birimo Kenya na Tanzaniya. Nyuma yaho yasohoye iyitwa Nita Amini na yo irakundwa, ku buryo kugeza ubu ari zo ndirimbo afite zumviswe cyane kandi zikarebwa cyane ku mbuga acururizaho umuziki we.
Nyuma yo kubona uko abafana be biyongereye ku bwinshi, yiyemeje kutabatenguha mu buryo bwo kubaha indirimbo nyinshi ziri mu rurimi bumva, yaba atabahaye inshyashya agasubiramo iyakunzwe mu Kinyarwanda, akayishyira mu Giswayile bashobora kumva.
Yatangiriye ku yitwa Yankuyeho Urubanza ayihindura mu Giswayile ayita Amenisamehe, ku bw’amahirwe irakundwa cyane ku buryo kugeza ubu ari yo ndirimbo ye ya gatanu yarebwe cyane kuri YouTube nyuma ya Nina Siri, Nita Amini na Sikiliza Na Malengo ya Mungu, kuko imaze kugira imibare y’abayirebye irenga miriyoni 7.6 mu gihe gito imaze isubiwemo.
Nyuma yaho yashyize hanze iyo yise Malengo ya Mungu ayikuye ku yitwa Nzi Ibyo Nibwira yo mu Kinyarwanda, kugeza ubu ikaba imaze kurebwa inshuro zirenga miriyoni 10 mu gihe cy’amezi icyenda arenga imaze isohotse.
Urugendo rwe rwo guhindura zimwe mu ndirimbo ze zakunzwe ziri mu Kinyarwanda rurakomeje, kandi ni ko n’abakunzi b’umuziki we barushaho kwiyongera. DC Clement na we ari mu bakunda ibihangano bye, akaba ari yo mpamvu adahwema kumuvuga ibigwi.
Ryoherwa n’indirimbo ya Israel Mbonyi yaryoheye cyane DC Clement w’umunyamakuru
