N’ubwo mu buzima bwe yitabiriye ibitaramo bitabarika, umuramyi Aline Gahongayire yatoranyije ibitaramo bitanu by’amateka yitabiriye nk’umutumirwa wagiye kwishakira amavuta.
Imyaka ibaye myinshi izina Aline Gahongayire rivugwa ku mbuga nkoranyambaga. Uyu muririmbyi izina rye rikaba ritumbagizwa n’imbaraga ashyira mu muziki ndetse n’ibikorwa by’urukundo dore ko hari abamufata nka Dorcas wo muri Bibilia ahanini bitewe n’umutima wa zahabu ukunda imfubyi, abapfakazi n’abakene.
Ibi ni imvano yo gushinga ikigo cya Ndineza Organization aho mu mwaka wa 2022 yahaye abafite ubumuga bw’amaguru amagare afite agaciro k’amafaranga y’u Rwanda Miriyoni zirenga mirongo itatu n’imwe (31,500,000 Frw.)
Kuri ubu Aline Gahongayire akomeje imyiteguro yo gutaramira mu gihugu cy’u Bubirigi. Paradise yaganiriye n’uyu muramyi mu mpumu nyinshi dore ko twaganiriye asoje repetition, icyakora yabashije gusubiza ikibazo cy’ingorabahizi.
Nk’umwe mu baramyi bamaze imyaka hafi 17 mu ivugabutumwa, abajijwe ibitaramo 5 afata nk’iby’amateka yitabiriye, Aline Gahongayire [Dr. Alga] yagize ati "Nitabiriye ibitaramo byinshi ariko ibya vuba byansigaye ku mutima ni ibi bikurikira:
Yahereye ku gitaramo cya Chryso Ndasingwa: Ni igitaramo cyabereye muri BK Arena kuwa 05 Gicurasi 2024. Chryso akaba yarafatanyije n’abahanzi barimo Aime Uwimana, Josh Ishimwe, True Promises, Himbaza Club, Papi Clever na Dorcas, Uwineza Rachel, Asaph Ministries International n’abandi guhesha izina ry’uwiteka icyubahiro.
Aline Gahongayire yavuze ko iki gitaramo cyamushimishije cyane dore ko avuga ko cyatumye yongera kubona ko ibidashobokera abantu ku Mana bishoboka.
Yakurikijeho Igitaramo Icyambu Live Concert cyo kuwa 25/12/2022: Iki gitaramo nacyo cyabereye muri BK Arena. Ni igitaramo Mbonyi yahuriyemo na Danny Mutabazi na Annette Murava.
Igitaramo cyateguwe na ADEPR: Mu bitaramo byanejeje Aline Gahongayire, yavuzemo kandi igitaramo cyabereye muri Dove Hotel cyateguwe n’itorero rya ADEPR. Yavuzeko iki gitaramo cyatumye haboneka abakizwa benshi bituma umutima we unezerwa.
Ikindi gitaramo yavuze ni icyateguwe na Alexis Dusabe: Cyabereye muri Kigali Pele Stadium
Igitaramo cya 5 cy’amateka kuri Dr Alga ni igitaramo cya Chorale de Kigali: Iki gitaramo cyiswe Christmas Carols Concert cyabeye kuwa 17 Ukuboza 2023 kizahora mu mutima wa Aline Gahongayire.
Alga yongeyeho ko ibi atari byo bitaramo byonyine byamugeze ku mutima dore ko ahamya ko igitaramo cyose gituma abantu bongera gukunda Imana, bigatuma Kristo abona iminyago gisiga urwibutso mu mutima we.
Kuri ubu uyu muramyi akomeje imyiteguro y’ibitaramo azakorera ku mugabane w’u Burayi bikazabimburirwa n’igitaramo cyo kuwa 05/10/2024 i Bruxels ahitwa Than Hotel Bristol Stéphanie aho abantu benshi baba muri uriya mujyi by’umwihariko abanyarwanda bahanze amaso iki gitaramo.
Aline Gahongayire yaganiriye na Paradise yitsa ku bitaramo byamunyuze
Aline Gahongayire ari kwitegura gukora igitaramo cye cya mbere i Burayi
