Itsinda ry’abahanzi babiri, Alicia na Germaine basigiye abakunzi babo icyo kubamara urukumbuzi mbere yo gusubira ku ishuri, babasigira urutonde rw’indirimbo zabo zose ziri hamwe.
Ku wa 2 Nzeri 2025, abakobwa b’abavandimwe Alicia na Germaine, abahanzi bakiri bato baririmba indirimbo zo guhimbaza Imana, bifashishije umuyoboro wa YouTube wa ABA Music, basangije abakunzi babo ibikorwa by’ingenzi bakoze mu biruhuko.
Kuri uyu wa 12 Nzeri 2025 banabagejejeho playlist (urutonde rw’indirimbo zabo zose hamwe) y’indirimbo zabo zose zimaze gusohoka, yiswe "ALICIA AND GERMAINE SONGS" ifite iminota 31. Ibi babikoze mbere yo gusubira ku mashuri yabo.
Mu biruhuko bisoza umwaka w’amashuri 2024-2025, Alicia na Germaine bakoze byinshi birimo n’iby’iyobokamana n’ubuhanzi. Indirimbo yabo nshya "Ndahiriwe", yateguwe mu bihe by’amasengesho y’iminsi itatu yo kwiyiriza, ni kimwe mu bikorwa bibasigiye urwibutso rukomeye. Nk’uko Germaine yabivuze, iyo ndirimbo yaje mu gihe bari mu masengesho, bariyibagije iby’ubuzima busanzwe.
Aba bakobwa babiri basangiye amaraso n’impano yo kuririmba, bashyize hanze playlist y’indirimbo zabo zamaze gusohoka, nk’uburyo bwo gusigira abakunzi babo indirimbo zo kubafasha mu gihe bazaba bari mu masomo yo ku ishuri. Uru rutonde rufite indirimbo 6.
Urutonde rw’indirimbo ruri muri playlist:
1. Urufatiro – Prod. by VBS Beatz
2. Rugaba – Prod. by Rog b Beatz
3. Wa Mugabo – Prod. by Kenny Vybz
4. Ihumure – Prod. by Ganza
5. Uriyo – Prod. by Popiceh
6. Ndahiriwe – Prod. by Popiceh
Prod. (producer), bihagarariye uwatunganyije amajwi y’indirimbo.
Nubwo basubiye ku ishuri, Alicia na Germaine bavuze ko batazahagarara. Germaine, wiga mu ishami rya Literature, French na Kinyarwanda (LFK), na Alicia, wiga Ubuganga muri Kaminuza y’u Rwanda, Ishami rya Huye, bavuze ko bazakomeza kugeza ibikorwa byabo ku bakunzi babo.
Alicia ati: "Ubu kuko abanyeshuri ba Kaminuza n’aba segonderi duhurira mu biruhuko, tuzakomeza tubahe indirimbo."
Alicia na Germaine, abahanzi b’abakobwa bafite impano idasanzwe, basize basigiye imitima y’ababakunda "imararukumbuzi", binyuze mu ndirimbo zabo. Playlist yabo ni igihamya ko n’abakiri bato bashobora kugira uruhare rukomeye mu gukomeza ukwizera kw’abandi binyuze mu ivugabutumwa.
RYOHERWA N’URUTONDE RW’INDIRIMBO ZABO ZOSE KURI YOUTUBE
RYOHERWA N’INDIRIMBO YABO "NDAHIRIWE" BAHERUKA GUSHYIRA HANZE
Alicia and Germaine bashyize hanze indirimbo "Ndahiriwe” isamirwa hejuru
Alicia and Germaine bamaze gukora indirimbo eshanu mu mwaka umwe
