Ni umuhango uzabanzirizwa no gufungura ku mugaragaro urusengero rwitwa Next Generation Church in Rwanda uyu mushumba agiye kubera umuyobozi.

Aganira na Paradise.rw, Sereine Nterinanziza yasobanuye urugendo rwe mu murimo w’Imana. Uyu mubyeyi ufata Apostle Mignonne nk’ikitegerezo, ubusanzwe ni umwana wa Pasiteri. Yavukanye n’abana 6, avukira muri ADEPR, akizwa mu kwezi kwa Mata 1994.

Asobanura inzira y’agakiza, yagize ati: "Yesu Kristo yaransanze naramubonye mu iyerekwa, twari turi gusenga muri GRP turasenga duhimbaza Imana nza kubona umuntu wambaye igishura cy’umweru, umuntu uhagaze ageze hejuru umeze nka Yesu Kristo najya kumuhobera nkabona simukwira kuko yari munini cyane ndarira natura ibyaha".

Yakomeje agira ati "Nyuma yo gukizwa, naje kuyobora korali y’abana tugakunda gusenga twiyirije nza no kubatizwa mu Mwuka Wera".

Uyu mubyeyi yavukiye mu yahoze ari Perefegitura ya Kibuye muri komini Rwamatamu, ubu ni muri Nyamasheke. Yakomeje inzira y’agakiza ubwo yajyaga kwiga amashuri yisumbuye i Karengera ku kigo kitwaga GS karengera.

Avuga ko icyo gihe bari bafite GRP y’abakobwa 8 ikaba yaraje kuzana ububyutse mu kigo cyose. Kubera urukundo,umuhate n’ishyaka ry’umurimo w’Imana ndetse no gukizwa, Imana yagiye ibaha amasezerano iza no kubita abaragwa. Yagize ati" Icyo gihe Twari dufite kwera cyane".

Baje kubera icyitegerezo abandi banyeshuri. Byaje kurangira ya grp y’abakobwa 8 ikongeje ikigo cyose, mu kigo haje kuba ububyutse havuka ama grps yo gusenga n’amakorali afite imbaraga.

Nyuma yaje kubona amanota yo gukomeza kwiga Kaminuza mu cyahoze ari Kaminuza y’u Rwanda (U.N.R) aho yakomereje umurimo w’uburirimbyi muri Korali yitwa Vumilia.

Nyuma yo kubaka urugo, ntiyacitse intege, yakomereje umurimo wo kuririmba mu karere ka Kicukiro ahitwa mu Kagarama aho yaje kwinjira muri Korali Philadelphia yanabereye umuyobozi.

Mu mwaka wa 2018, yaje gushinga itorero gusa riza gufungwa. Avuga ko iki kintu cyamugizeho ingaruka, kwiyakira biramunanira ndetse akaba yemera ko byamushyize mu ntege nke.

Nyuma yo gucika intege, ahamya ko Yesu Kristo yamusanze muri ibyo bihe bitoroshye anyuze mu bibazo bituma yongera gutekereza ku neza ndetse no ku rukundo rw’Imana bituma abyuka vuba na bwangu.

Mu rwego rwo kurushaho gusobanukirwa ijambo ry’Imana ndetse n’umuhamagaro, yaje kujya mu ishuli rya Theologie aho kuri ubu arimo gusoza icyiciro cya Doctorate muri Kaminuza y’Aba baptiste yashinzwe mu mwaka wa 1800, ni ishuli rifite icyicaro muri America.

Kuri ubu agiye kurambikwaho ibiganza ahabwe n’inkoni yo kuba umushumba w’itorero ryitwa "Next Generation Church of Rwanda".

Uyu muhango uteganyijwe ku cyumweru le 27/08/2023, wabanjirijwe n’Icyumweru cy’ivugabutumwa cyatangiye kuri uyu kuwa 3.

Uyu munsi wabimburiwe n’amarushanwa agamije kwigisha urubyiruko biciye mu mikino. Insanganyamatsiko y’aya marushanwa iragira iti: "Rubyiruko, twige guhakanira abadushora mu biyobyabwenge ndetse no mu busambanyi".

Sereine Nterinanziza agiye kwimikirwa kuba umushumba w’itorero ryitwa "Next Generation Church of Rwanda rizafungurwa ku mugaragaro kuri iki cyumweru.

Sereine ahamya ko kwiga Theologie byamufashije biramuhindura bituma ahindura n’uburyo yakoragamo itangazamakuru aho ahamya ko hari ibiganiro yaretse gukora, by’umwihariko ibisesereza ndetse n’ibikora ku marangamutima y’abandi.

Ikindi, ahamya ko kimwe mu byatumye itorero yashinze mu mwaka wa 2018 rifungwa harimo no kuba nta cyerekezo (vision) ryari rifite. Nyuma yo kwiga Theology avuga ko kuri ubu itorero rya Next Generation Church of Rwanda ari itorero rifite icyerekezo.

Sereine Nterinanziza Yagize ati: "Turashaka kubaka itorero ry’ejo hazaza dushingiye ku rubyiruko ndetse n’abana". Asobanura ku cyerecyezo yavuze ko ibikorwa by’itorero bizibanda ku bana.

Ibi birori by’akataraboneka biteganyijwe ku cyumweru guhera saa yine, hakazamurikwa urusengero ku mugaragaro.

Nyuma yo kurumurika hakazakurikiraho ibirori byo kwimika uyu mushumba hakaba haratumiwe itorero ry’abanyamerika naryo ryitwa Next Generation, ni itorero ryabahuguye, ribafasha no gushyiraho icyerekezo.

Sereine Nterinanziza agiye guhabwa inkoni y’ubushumba

Sereine Nterinanziza wa Next Generation Church of Rwanda

REBA IKIGANIRO KIRAMBUYE NA PASTOR SEREINE NTERINANZIZA