Uyu munsi mukuru wizihijwe nyuma y’umunsi wa Arafah wabaye ku wa Kabiri tariki ya 26 Gicurasi 2026, mu gihe abarenga miliyoni z’Abayisilamu bari barangije umutambagiro mutagatifu wa Hajj i Maka muri Arabia Saoudite.

Eid al-Adha iba yibuka umuhanuzi Ibrahim (Aburahamu), wemeye gutamba umwana we Isimayeli (bo bavuga Isimayeli aho kuba Isaka, kuko Isimayeli ari we ukomokwaho n’Abarabu, kandi Muhammed akaba yari Umwarabu) kubera kumvira Imana.

Mu myizerere ya Islam, mbere y’uko abitanga, Allah yamuhaye intama yo gutamba mu mwanya w’umwana we, ibintu bifatwa nk’ikimenyetso cy’ukwizera no kumvira Imana.

Mu bihugu byinshi birimo Arabia Saoudite, Leta Zunze Ubumwe z’Abarabu (UAE), Qatar, Kuwait, Misiri, Turukiya n’ibindi, Abayisilamu babyukiye mu masengesho ya Eid akorwa mu gitondo, nyuma basabana n’imiryango yabo, basura inshuti ndetse batanga impano n’ibiribwa ku batishoboye.

Kimwe mu bikorwa by’ingenzi biranga Eid al-Adha ni igitambo cya Qurbani, aho abafite ubushobozi babaga intama, ihene cyangwa inka, inyama zigahabwa abo mu muryango, inshuti ndetse n’abakene.

Mu rwego rwo gufasha abatishoboye, imiryango myinshi ya kiyislamu n’imiryango y’ubutabazi yakusanyije inkunga n’inyama zo gufasha imiryango itifashije, cyane cyane mu bihugu biri mu ntambara cyangwa bifite ibibazo by’ubukene.

Nubwo ibihugu byinshi byemeje ko Eid al-Adha yabaye ku wa 27 Gicurasi 2026 hashingiwe ku mibare y’ukwezi n’itangazo rya Arabia Saoudite, hari uduce tumwe two muri Aziya y’Amajyepfo twatangaje ko two tuyizihiza ku wa 28 Gicurasi bitewe n’uburyo bwo kureba ukwezi bushingiye ku maso.

Mu masengesho no mu butumwa bwatanzwe n’abayobozi b’amadini ya Islam, hibanzwe ku mahoro, gufashanya, kwicisha bugufi no gufasha abakene.

Abayisilamu benshi bagaragaje ko Eid al-Adha 2026 ibaye mu gihe Isi ikomeje guhura n’ibibazo birimo intambara, ubukene n’indwara, bityo basaba ko uyu munsi mukuru wakomeza kuba umwanya wo gusaba amahoro n’ubumwe bw’abantu bose.

Eid al-Adha ni umwe mu minsi mikuru ibiri ikomeye muri Islam, hamwe na Eid al-Fitr iba nyuma y’ukwezi kwa Ramadan.