Bamwe baguye mu ntambara, abandi baricwa, abandi bagira iherezo ribabaje kubera umuvumo cyangwa uburakari bw’Imana. Muri iyi nkuru, turagaruka ku bami bapfuye urupfu rubi kurusha abandi.

1. Sawuli – Yapfuye yiyahuye nyuma yo gukomeretswa mu ntambara
(1 Samweli 31:1-6)
Sawuli yari umwami wa mbere wa Isirayeli. Mu ntambara yarwanyemo n’Abafilisitiya, ingabo ze zaratsinzwe, abahungu be baricwa, na we arakomereka bikabije. Ubwo yabonaga ko agiye gufatwa nk’imbohe, yatinye gutesekazwa n’abanzi maze yisogota ku icumu rye ariyahura. Umugaragu we abibonye na we ariyica.

Urupfu rwa Sawuli rugaragaza iherezo ry’umwami wari waratannye mu nzira z’Imana, agakora ibyaha birimo kujya mu burozi, kwica abahanuzi bayo no kugerageza kwica Dawidi.

Nyuma y’uko Sawuli yiyahuye ku mucumu we (1 Samweli 31:4), haje umugabo w’Umwaleki wari warasigaye ku rugamba, aza abeshya Dawidi ko ari we wamwishe, yibwira ko bizamugirira akamaro (2 Samweli 1:6-10).
Dawidi aho kumwishimira, yahise amubaza impamvu yatinyutse kwica uwo Imana yasīze amavuta. Yahise ategeka ko uwo mugabo yicwa.

2. Umwami Ahabu – Yarashwe mu ntambara, imbwa zirya amaraso ye
(1 Abami 22:34-38)
Ahabu, umwe mu bami babi ba Isirayeli, yarwanyije Imana cyane, akorana n’umugore we Yezebeli ibikorwa bibi, harimo gusenga Bayali no kwica abahanuzi b’Imana. Yagiye ku rugamba ahisha ko ari umwami, ariko umusirikare umwe yamurashe umwambi watewe ku bw’impanuka. Yakomeje kuvira amaraso mu igare rye kugeza apfuye.

Ubuhanuzi bwavuze ko imbwa zizarigata amaraso ye bwarasohoye, kuko amaraso ye yakwiriye igare rye, hanyuma imbwa zikayanywa.

3. Umwamikazi Yezebeli – Bamusunitse mu idirishya, imbwa zirya umurambo we
(2 Abami 9:30-37)
Nubwo Yezebeli atari umwami ahubwo yari umwamikazi, azwiho kuba yarategetse nabi cyane Isirayeli afatanyije n’umugabo we Ahabu. Yishe abahanuzi b’Imana, ategeka abantu gusenga Bayali, ndetse yicisha Umukiranutsi Naboti kugira ngo ahabwe umurima we.

Igihe Yehu yafataga ubutegetsi, Yezebeli yashatse kwirwanaho yisiga imibavu, yambara neza ngo agire igikundiro imbere ye. Ariko Yehu ategeka ko abasirikare bamuta hanze anyuze mu idirishya. Yaguye hasi, amagufa ye aramenyeka, amaraso ye arigatwa n’imbwa, zimutanyagura nk’uko byari byarahanuwe.

4. Umwami Herode Agiripa I – Yishwe n’indwara mbi nyuma yo kwikuza nk’Imana
(Ibyakozwe n’Intumwa 12:20-23)
Herode Agiripa I ni we wategetse Isirayeli mu gihe cy’intumwa za Yesu. Yishe Yakobo, umuvandimwe wa Yohana, agerageza no kwica Petero. Umunsi umwe, yambara imyenda igaragaza ikuzo rye, yiyemera imbere y’abantu. Bamushimagiza bavuga ngo: "Ibi si iby’umuntu, ahubwo ni iby’Imana!"

Aho kwihana, Herode yemeye ayo mashimwe, ahita aterwa n’indwara, ajoga inyo, apfa agaraguritse.

5. Umwami Sedekiya – Yakuwemo amaso nyuma yo kureba abahungu be bicwa
(Yeremiya 52:1-11)
Sedekiya yari umwami wa nyuma w’i Buyuda mbere y’uko Abanyababuloni basenya Yerusalemu. Yanze kumvira amagambo y’umuhanuzi Yeremiya, maze umwami Nebukadinezari w’i Babuloni aza kumufata. Bamufatiye i Ribula, babanza kumwicira abahungu be imbere y’amaso ye, hanyuma na we bamukuramo amaso.

Yajyanywe ari impumyi i Babuloni, aho yamaze imyaka asigaje mu buzima bw’ubucakara, kugeza apfuye mu buryo bubabaje.

6. Umwami Yehoramu – Yapfuye umubiri we ushenguka buhoro buhoro
(2 Ngoma 21:18-19)
Yehoramu yari umwami wa Yuda, umwana wa Yehoshafati. Yategetse nabi cyane, yica abavandimwe be, arwanira ubutegetsi, ajya mu mico mibi nk’iya Ahabu. Imana yamwoherereje indwara mbi y’impyiko, umubiri we utangira kubora buhoro buhoro. Nyuma y’amezi umunani arembye, igice ku kindi cy’umubiri we cyaraboraga kugeza apfuye.

Byari iherezo ribabaje, kuko yapfuye atagira umuntu umuririra, ndetse n’ibyubahiro by’abami ntibabimuhaye.
Aba bami bose bapfuye urupfu rubi bitewe n’ibyaha byabo, imiyoborere mibi, no kwigomeka ku Mana. Inkuru zabo zitwigisha ko kuyobora nabi, kwirengagiza Imana no gukora amahano bishobora kugira ingaruka mbi. Imana ihora yihanganira abantu, ariko iyo bihaye gukomeza inzira mbi, iherezo ryabo riba ribabaje.