Mu minsi micye ishize, Itorero Inkuru Nziza mu Rwanda ryakiriye abashyitsi baturutse mu Bwongereza muri Audacious Church ikorera mu mujyi wa Manchester. Baje mu Rwanda ari 17 bayobowe na Pastor Keith Reid umwe mu bashumba b’iri torero ushinzwe Ivugabutumwa.

Aba bashyitsi baje mu bikorwa by’ivugabutumwa ku bufatanye n’itorero Inkuru Nziza Paroisse ya Cyabatanzi ikorera mu Murenge wa Rusororo, Akagari ka Gasagara. Si inshuro ya mbere bari baje gukorana n’itorero Inkuru Nziza, dore ko n’umwaka ushize baje mu ivugabutumwa.

Umwe mu bashumba b’Inkuru Nziza yabwiye Paradise.rw ko Intego nyamukuru yazanye itsinda rya Audacious "ni ivugabutumwa, hamwe no kubaka ibikorwa remezo harimo ikibuga cya Basketball cyubatswe mu kigo cy’amashuri abanza, Ecole Primaire de Gasagara".

Mu bindi bikorwa bakoze kandi, basuye Urwibutso rwa Jenoside yakorewe Abatutsi 1994 rwa Kigali ruri ku Gisozi, ndetse n’urwa Ruhanga, biga amateka asharira yaranze u Rwanda.

Bakoze kandi ibiterane by’ivugabutumwa, ndetse n’amahugurwa atandukanye yo guteza imbere abizera b’itorero Inkurunziza, Gutanga ibiryo, ubujyanama mu bijyanye n’ubuzima hamwe n’ubworozi.

Paradise.rw yabashije kubona igishushanyo mbonera cy’inyubako y’agatagaza ya "Community Development Center" iteganywa kubakwa n’Itorero Inkuru Nziza muri Paroisse ya Cyabatanzi mu bufatanye na Audacious Church yo mu Bwongereza.

Abashyitsi bo mu Bwongereza bari gufasha Inkuru Nziza mu bikorwa by’iterambere, bamaze mu Rwanda iminsi 11, ni ukuvuga icyumweru kirengaho iminsi 4 bari mu bikorwa bitandukanye bifasha abakristo b’itorero ariko no kugera no ku bandi bose nta gutoranya.

Kugaruka kw’aba bashyitisi kuri iyi nshuro ya 2 bivuze ikintu gikomeye ku mubano cyane cyane wa Audacious church ndetse n’itorero Inkuru nziza mu Rwanda.

Impamvu ni uko inshuro ya mbere umwaka ushize byagenze neza hakorwamo ibikorwa bitandukanye bifasha abaturage ba Cyabatanzi bikora ku buzima bwabo ndetse no gukomeza kuvuga ubutumwa bagaragaza Yesu nk’umwishingizi ’dukwiye kunambaho tukamwizera cyane mu buzima bwacu’.

Pastor Juvenal NGENDAHAYO, Umuvugizi w’Itorero Inkuru Nziza mu Rwanda yahaye ikaze abashyitsi baturutse mu Bwongereza

Ubuyobozi bw’Umurenge wa Rusororo mu muhango wo gutangiza igikorwa cyo kubaka ikibuga cya Basketball bwashimiye itorero Inkurunziza uburyo ridahwema guteza imbere ivugabutumwa ndetse n’imibereho myiza yabaturage batuye mu murenge wa rusororo, Akagari ka Gasagara.

Bashimye iri Torero kuko rigira uruhare mu iterambere ry’abanyarwanda aho buri mwaka batanga ubufasha bw’ubwisungane mu kwivuza ku baturage bagera kuri 500 batishoboye, kubakira abatishoboye, kurihira abana amashuri binyuze muri gahunda yo guteza imbere uburezi.

Umunyamabanga w’Itorero Inkuru Nziza mu Rwanda, Pastor Ruzindana Lambert, wari witabiriye umuhango wo gutangiza igikorwa cyo kubaka iki gikorwa remezo cya Basketball, yavuze impamvu imutera gushima igikorwa cyo kubaka igikorwa remezo mu kigo cy’amashuri abanza ya Gasagara.

Bubatse ibikorwa remezo mu Rwanda birimo ikibuga cya Basketball

Yasobanuye ko iri torero rifite intego yo gufatanya na Leta mu guteza imbere iterambere ry’abaturage ndetse n’uburezi na cyane ko muri aka kagari nta kibuga cya Basketball cyari gihari, bityo rero bizera ko gufatanya n’iri shuri rya Leta bizateza imbere imyidagaduro n’uburezi bufite ireme mu rubyiruko.

Cyiza Emmanuel uhagarariye Imishinga y’Iterambere n’Imibereho myiza mu Itorero Inkurunziza mu Rwanda ndetse akaba yungirije Umushumba w’Itorero Inkurunziza Paroisse ya Cyabatanzi, yavuze ko Itorero rya Audacious hamwe n’Itorero Inkuru Nziza bafite umushinga wo kubako ikigo cy’Iterambere ry’abaturage ba Gasagara (Cyabatanzi).

Yatangaje ko uyu mushinga wakorewe inyigo ndetse n’igishushanyo mbonera cyarakozwe, bakaba bifuza ko bakorerwa ubuvugizi kugira ngo uyu mushinga uhabwe icyemezo cyo kubakwa, cyane ko uzaba ugamije guteza imbere abaturage batuye muri Gasagara.

REBA ANDI MAFOTO Y’URUGENDO RW’ABAKRISTO BO MU BWONGEREZA UBWO BARI BAHERUKA MU RWANDA

Ubwo bari bageze i Kanombe ku kibuga cy’indege

Bagize uruhare mu kubaka ikibuga cya Basketball

Bafashije abatishoboye

Babatije abakiriye agakiza

Basuye urwibutso rwa Jenoside yakorewe Abatutsi

Bakoze ibiterane by’ivugabutumwa benshi barafashwa

KANDA HANO UREBE ANDI MAFOTO MENSHI