Impaka ku mibereho n’ahazaza h’abahanzi b’indirimbo zo kuramya no guhimbaza Imana bo mu Itorero rya ADEPR zongeye kuvugwa cyane nyuma y’itandukana ry’abahanzi Vestine na Dorcas na sosiyete (Label) ya M. Irene. Ibi byatumye benshi bongera kwibaza uko umuhanzi wa Gospel muri ADEPR ashobora kubyaza umusaruro impano ye.

Abasesengura umuziki wa Gospel bavuga ko iki kibazo atari gishya. Bagaragaza ko imyaka myinshi ishize hari impano nyinshi zavutse muri ADEPR, ariko abahanzi benshi bavuga ko batigeze babona uburyo buhamye bwo gutuma umuziki wabo uba umwuga ubatunga.

Mu myaka yashize, ku buyobozi bwa ba Bishop Jean Sibomana na Tom Rwagasana, hashyizweho komite yari igamije gutekereza ku iterambere ry’abahanzi.

Iyo komite yari iyobowe na Venuste Mugabo nka Perezida, afatanyije na Peter (Ntigurirwa Pierre Claver) wari umujyanama uzwi mu guteza imbere umuziki wa Gospel. Icyakora, nk’uko bamwe babivuga, uwo mushinga ntiwageze ku ntego wari ugamije.

Itandukana rya Vestine na Dorcas na M. Irene ryasubije ku meza ikibazo cy’uburenganzira ku bihangano n’uburyo abahanzi bayobora umwuga wabo. Hari ababona ko ryabaye isomo ku bahanzi bakizamuka, cyane cyane ku birebana n’amasezerano bagirana n’abashoramari n’uburenganzira ku bihangano.

Hari kandi abibaza impamvu bamwe mu bahanzi ba Gospel bo muri ADEPR, n’ubwo bafite ibihangano byakunzwe cyane, batigeze babasha kubibyaza umusaruro nk’uko bikorwa n’abahanzi bo mu zindi nzego z’umuziki.

Amazina akunze kugarukwaho harimo Hakizimana Evariste, Mani Martin, Venuste Mugabo, Rushema Ephrem, Uwiringiyimana Théogène (Bose Babireba), Dominique Ashimwe na Rudahezwa.

Aba bahanzi bagize uruhare rukomeye mu mateka ya Gospel nyarwanda, ariko hari abavuga ko benshi muri bo batabonye amahirwe yo kubaka umwuga ubatunga binyuze mu bihangano byabo.

By’umwihariko, Mani Martin avugwaho kuba yaratangiye kuririmba akiri muto muri ADEPR mbere yo gukomeza urugendo rwe nk’umuhanzi wigenga.

Mu buryo nk’ubwo, Théogène Uwiringiyimana uzwi nka "Bosebabireba" akunze kuvugwaho nk’umwe mu bahanzi bafite indirimbo zakoze ku mitima ya benshi, ariko na we akagenda ahura n’imbogamizi mu rugendo rwe.

Abatanga ibi bitekerezo bavuga ko igihe kigeze ngo haboneke uburyo buhamye bwo gufasha abahanzi ba Gospel kubyaza umusaruro impano zabo, haba binyuze mu bitaramo, ubufatanye n’ibigo byigenga, cyangwa amahugurwa ku miyoborere y’ibihangano n’uburenganzira bwabyo.

Bavuga kandi ko mu gihe umuziki wa Gospel ugenda winjiza amafaranga menshi binyuze mu bitaramo byuzura ibibuga binini, hari amahirwe yo gutuma n’abahanzi bakomoka muri ADEPR bungukira ku bihangano byabo, mu buryo bwubahiriza amahame y’itorero n’amategeko arengera umutungo bwite mu by’ubwenge.

Mu gihe ADEPR yitegura kwizihiza imyaka 100 imaze ibayeho, hari abifuza ko bamwe mu bahanzi ba mbere bagize uruhare mu kubaka amateka ya Gospel bahabwa umwanya wihariye, ndetse hakarebwa uburyo ubunararibonye bwabo bwafasha abakiri bato.

Iyi nkuru ishingiye ku bitekerezo n’isesengura byatanzwe n’umwanditsi Rugamba Erneste, igaragaza impaka zikomeje kuba ku hazaza h’abahanzi ba Gospel bo muri ADEPR n’uburyo impano zabo zarushaho kubyazwa umusaruro.