Umuhanzi mu ndirimbo zo kuramya no guhimbaza Imana, Ingabire Dorcas uzwi nka Dorcas yatangaje byinshi mu byo akundira umugabo we Tuyizere Papi Clever uzwi nka Papi Clever bafatanya no kuririmba nk’itsinda.
Uyu muryango w’abaramyi ukora nk’itsinda Papi Claver na Dorcas bari batumiwe mu kiganiro kinyura kuri radiyo ya Kiss FM, isanzwe itumira ibyamamare bitandukanye byo mu ngeri zitandukanye, bakagirana ibiganiro.
Kuri uyu wa Gatanu tariki ya 16 Gashyantare 2024, ni bwo Dorcas ari mu kiganiro yari yatumiwemo we n’umugabo we Papi Clever yahishuye byinshi mu byo amukundira, dore ko na mbere yuko babana Dorcas yari umufana we.
Dorcas yifuzaga umugabo ugira gahunda, ukijijwe kandi uririmbira Imana. Yabonye Papi Clever byose abyujuje, cyane ko yari asanzwe ari umuhanzi mu ndirimbo zo kuramya no guhimbaza Imana.
Yumvise izina Papi Clever bwa mbere mu bantu bagize umuryango we ubwo yari avuye ku ishuri. Icyo gihe yaraje asanga bavuga ku musore mwiza uririmbira Imana ari we Papi Claver.
Yagize ati: “Ngewe nari muzi kuko yari umuhanzi, ndi umufana we. Mumenya bwa mbere yaje kuririmba iwacu i Musanze, aza ntahari naragiye ku ishuri, ariko ntashye mu rugo baramumbwira cyane, nsanga bamugize igitaramo. Bavuga ukuntu ari umusore mwiza, ukunda Imana, uririmba neza, mwiza nyine, ariko nge ntamuzi, ariko nyine bamugize igitaramo cyane
Namenyanye na murumuna we muto, ariko we tutaramenyana, gusa indirimbo ze nzizi. Nta nubwo nari nzi ko bavukana, nabimenye nyuma, undi na we tuza guhura ariko duhujwe na murumuna we. Mbese, byaroroshye cyane birikora.”
Papi Claver na we yahize agira icyo avuga ku guhura kwabo n’uko yamurambagije agira ati: “Njya kumutereta nta na rimwe twigeze duhura mfite Gitari (Guitar), gusa we yari anzi ko ndi umuhanzi. Njya gushaka nari naravuze ko nzashaka umugore utazi kuririmba.
Nashakaga nyine ko yazajya ambona ndi umuhanzi wuzuye yicaye hariya. Urumva iyo mubana mwese muzi kuririmba, hari aho ukosa akakuvumbura, gusa na we akunda uko ndirimba, iyo ndirimba biramunyura cyane.”
Papi Claver yabwiye Dorcas ko amukunda nyuma y’iminsi mike bagirana ibiganiro bitari birebire, Dorcas amusaba gutegereza ijoro rimwe gusa, ariko igisubizo yamuhaye ni cyo cyatumye mu mwaka wa 2019 bakora ubukwe, bagasezerana kubana akaramata.
Nyuma yo kubana, nubwo Dorcas yari asanzwe aririmba muri korari yo mu itorero ryabo ry’I Musanze Papi Clever amufata nk’abandi bakristo bo mu itorero, ijoro rimwe ubwo Papi Clever yafataga Gitari agacuranga, aririmbana n’umugore we, yumvise kuririmba ari ibintu bye, mu gitondo amujyana muri studio.
Kuva ubwo babaye itsinda, aho kuririmba yitwa Papi Clewver, bahinduka Papi Clever na Dorcas. Nyuma y’aho batangiye kuririmbana, bageze kuri byinshi birimo kugira indirimbo ya kabiri mu ndirimbo zo kuramya no guhimbaza Imana mu Rwanda yarebwe cyane ku rubuga rwa YouTube. ‘Ameniweka Huru’ imaze kurebwa inshuro zirenga miriyoni 25 mu mezi arenga umunani gusa, ikurikira Nina Siri ya Israel Mbonyi imaze kurebwa inshuro zirenga miriyoni 36.
Bakurikirwa n’abarenga ibihumbi 549 kuri YouTube, bimwe mu bigaragaza ko ari bamwe mu bakunzwe mu Karere k’Iburasirazuba kubera indirimbo zabo nziza baririmba mu Kinyarwanda no mu Giswayile.
Ni umuryango, bakaba n’itsinda ry’abaramyi
Kuva muri 2019 bashyingiranywe, babyaranye abana babiri
