Mu gihugu cya Uganda, umujyi wa Luweero wuzuye ibyishimo n’icyizere, mu gihe habura umunsi umwe gusa ngo hatangire ibiterane bikomeye byateguwe n’umuryango A Light to the Nations (ALN), uyobowe n’umuvugabutumwa w’Umunyamerika Ev. Dr. Dana Morey.
Ibi biterane by’iminsi itatu bizabera ahitwa Kasana Grounds guhera tariki ya 21 Werurwe 2025, bikazasozwa tariki ya 23 Werurwe 2025.Abapasiteri n’amatorero atandukanye bamaze amezi abiri babitegura, bigisha abantu mu mashuri no mu midugudu itandukanye mu biterane bito bibanziriza ibi bigiye kuba ari nyamukuru.
Kuri uyu wa Kane mu masaha ya Saa Sita z’ijoro, mbere gato y’uko ibiterane bitangira, ALN yatangaje ko Dana Morey yageze amahoro muri Luweero, asanga umujyi witeguye kwakira ibitangaza n’ibimenyetso by’Imana.
Uretse ivugabutumwa, uru rugendo rwagaragaje ubwitange bwa ALN mu bikorwa bifitiye rubanda akamaro. Mbere y’ibiterane, hakozwe igikorwa cyo gusukura umujyi wa Luweero, aho abaturage bifatanyije n’abagize uyu muryango, bashyira hamwe kugira ngo isuku irusheho kuba umuco.
Iki gikorwa cyateye abantu benshi kumva bafite inshingano zo kugira umujyi usukuye, ndetse bamwe bagaragaje ibyishimo byihariye:
• Umuyobozi w’umusigiti yatanze amafaranga yo kugura amazi nk’ishimwe ku banyeshuri bitabiriye iki gikorwa.
• Umucuruzi umwe yinginze abasukura umujyi ngo bagume hafi y’iduka rye, arapfukama arashimira.
• Abantu benshi basabye ALN kubafasha gukura imyanda bari barabitse mu ngo zabo, kuko batari bazi ko hari ugishoboye kubikora ku buntu.
• Umupasiteri umwe yagize ati: "ALN ifite umuhate wo gukora ivugabutumwa mu buryo butangaje. Iyo tutagira amahirwe yo kwegerezwa ibi bikorwa, hari benshi muri twe batari kujya mbere mu kwizera.”
Ev. Dr. Dana Morey ni umunyamerika washinze ALN, akaba amaze imyaka myinshi azenguruka ibihugu bitandukanye abwiriza Ubutumwa Bwiza.
Kuva muri Amerika, mu bihugu bya Afurika, Amerika y’Epfo, Pakisitani no mu Buhinde, Ubutumwa bwe bwakomeje gukiza imitima y’abantu benshi. Si ivugabutumwa gusa, kuko afite umutima wo gufasha abatishoboye, aho yashinze gahunda zitandukanye zo gufasha imfubyi no gutanga ubufasha ku bana baturuka mu miryango ikennye.
Uyu muvugabutumwa aherutse gutangaza ko yifuza kugura ubutaka mu Rwanda, igihugu yakunze cyane. Afite intego yo kugeza Ubutumwa Bwiza mu bihugu byose byo ku Isi, by’umwihariko muri Afurika.
Ibiterane biratangira ejo ku wa Gatanu tariki ya 21 Werurwe, mu mujyi wa Luweero, aho ALN yiteze kubona abantu benshi bakizwa, bagakira indwara, ndetse bagahabwa ihumure mu bihe bikomeye Akarere k’Afurika y’Iburasirazuba karimo. Nyuma ya Luweero, uru rugendo ruzakomereza i Mubende hagati ya tariki 28-30 Werurwe 2025.
Ibikorwa bya ALN n’ubwitange bw’abapasiteri bo muri Luweero byagaragaje ko ivugabutumwa ritaguma mu nsengero gusa, ahubwo rigera no ku bikorwa bifitiye sosiyete akamaro. Ibi biterane bikomeje kuba inzira yo kwegereza abantu ukuri kw’Imana no kubafasha kugira imibereho myiza.
#EvDanaMorey
#ALightToTheNations
#Luwero2025
#MiracleGospelCelebration
Ubu harabura umunsi umwe
