Umwanditsi w’iyi nkuru ntabwo ari kure y’uru ruganda. Ni umwe mu bahawe ibihembo muri muzika ya Gospel kubera uruhare yagize mu guteza imbere muzika, haba mu kuririmba no mu guhanga indirimbo, ndetse no mu kuyishyigikira ari mu gisata cy’imyidagaduro mu itangazamakuru.
Ibi bituma asesengura iki kibazo atari nk’umurebera kure, ahubwo nk’umwe mu barugizemo uruhare kandi babonye impinduka zarwo mu buryo butaziguye.
Mu myaka ishize, u Rwanda rwashyize imbaraga mu guteza imbere ubuhanzi n’imyidagaduro. Hashyizweho inzego zishinzwe guteza imbere impano, harimo na Ministry of Youth and Arts ndetse na Rwanda Cultural Heritage Academy, hagamijwe kubaka urwego rw’ubuhanzi rushobora gutanga akazi no guteza imbere ubukungu bw’igihugu.
Ariko nyuma y’iyo myaka yose, ikibazo kiracyahari: ese koko byamariye iki abahanzi ubwabo? Ese ubuhanzi mu Rwanda bumaze kuba industry ihamye?
Nta gushidikanya ko hari impinduka zigaragara. Ubuhanzi bwavuye ku rwego rwo gufatwa nk’imyidagaduro isanzwe, bugera ku rwego rwo gufatwa nk’umwuga ushobora gutunga uwawuhisemo.
Abahanzi benshi bagiye babona amahugurwa, ibitaramo byagutse, ndetse bamwe batangira kumenyekana ku rwego mpuzamahanga. Mu bijyanye n’ibikorwa remezo, hari iterambere mu ma studio, amashusho y’indirimbo ndetse no gukoresha imbuga nkoranyambaga mu kwamamaza ibihangano.
Ikibazo cya Monetisation: Ikimenyetso cy’Ibikiri Inzitizi
Mu gihe gito gishize, umuhanzi Bruce Melodie yagaragaje iki kibazo ku mugaragaro mu Nama y’Igihugu y’Umushyikirano, asaba Perezida Paul Kagame ko habaho ubufasha mu kunoza uburyo bwo kubyaza umusaruro ibihangano (monetisation).
Ibi bigaragaza ko nubwo hari iterambere mu kumenyekana no mu gukora ibihangano byiza, ikibazo cy’uko abahanzi babona inyungu ihamye mu mbuga zicururizwaho muzika kikiri ingorabahizi.
Imbuga mpuzamahanga zicururizwaho indirimbo ntizitanga inyungu ihagije ku bahanzi benshi bo mu Rwanda, bigatuma bamwe bakomeza kuba mu rwego rwo gushakisha uburyo bwo kubaho aho kuba mu rwego rwo gutera imbere mu buryo buhamye.
Ibi kandi byerekana ko n’ubwo hari politiki n’inzego zashyizweho, haracyari icyuho mu kubaka ’ecosystem’ ituma umuhanzi abasha kubyaza umusaruro igihangano cye mu buryo burambye.
Gospel Music: Iterambere mu Butumwa, Ibibazo mu Bukungu
Umuziki wa Gospel wateye imbere cyane mu bwiza bw’amajwi, imyandikire n’ikorwa ry’indirimbo. Wagize uruhare rukomeye mu kubaka indangagaciro no gukomeza abantu mu bihe bikomeye.
Ariko ku ruhande rw’ubukungu, abahanzi benshi ba Gospel baracyashingira ku butumire bw’amatorero cyangwa ibitaramo bya rimwe na rimwe. Isoko riracyari rito kandi ritanga inyungu nke ku bahanzi benshi.
Secular Music: Kumenyekana kurushijeho ariko Industry iracyari nto
Ku ruhande rwa Secular, hari intambwe igaragara mu kwamamara no mu ireme ry’ibihangano. Abahanzi bamwe bageze ku rwego mpuzamahanga, bigafasha no kumenyekanisha u Rwanda.
Gusa haracyari ibibazo by’imicungire, amasezerano adasobanutse, no kubura labels zikomeye zafasha abahanzi gukura mu buryo buhamye. Kurengera uburenganzira ku bihangano nabyo biracyari urugamba.
Ese byamariye iki u Rwanda?
Ubuhanzi bwabaye igice cy’ubukungu bushya, butanga akazi ku rubyiruko kandi bugafasha mu kumenyekanisha igihugu.
Ariko biracyasaba politiki zihamye, isoko rinini rifite imbaraga, ndetse n’imicungire ya kinyamwuga kugira ngo ubuhanzi bube industry itunze benshi mu buryo burambye.
Kuba umuhanzi ukomeye asaba ubufasha ku rwego rw’Umukuru w’Igihugu ku kibazo cya monetisation, ni ikimenyetso ko urugendo rukiri rurerure.
Iterambere rirahari, ariko kubaka industry ihamye ishingiye ku bukungu bwihagije ku bahanzi bose ni yo ntego igikenewe kugerwaho.
