Paradise yatohoje amakuru y’uko amatike ya VIP n’aya VVIP yo kwinjira mu gitaramo cya Israel Mbonyi, Icyambu Live Concert ku nshuro ya gatatu yashize ku isoko habura umunsi umwe ngo igitaramo kibe.
Iki gitaramo giteganyijwe ku mugoroba wo kuri uyu wa Gatatu tariki ya 25 Ukuboza 2024, ku Munsi Mukuru wa Noheri, aho Abakristo bo mu madini abyemera bizihiza ivuka ry’Umwami Yesu Kristo.
Uyu muramyi w’icyamamare, Israel Mbonyi, yatangiye kugurisha amatike y’igitaramo cye ngarukamwaka Icyambu Live Concert guhera ku wa 29 Ugushyingo 2024.
Akiyashyira hanze, aya VVIP ari na yo yari ahenze, yahise ashira ku isoko, none n’aya VIP yashize. Paradise yamenye kandi andi makuru avuga ko n’ayandi ari hafi gushira kuko mu gitondo cyo kuri uyu wa Gatatu hari hasigaye atagera ku 1000.
Amatike yari mu byiciro bitandukanye, aho igiciro cyari hagati y’amafaranga 5,000 FRW na 30,000 FRW bitewe n’aho umuntu ashaka kwicara.
REBA IBICIRO BYA VIP N’IBYA VVIP
Ni igitaramo yise Icyambu Live Concert kiba ku wa 25 Ukuboza buri mwaka, kikabera mu nyubako ya BK Arena i Kigali, ku munsi Mukuru wa Noheri, guhera mu mwaka wa 2022, aho icyo arakora kuri iyi nshuro (2024) kiraba kibaye ku nshuro ya 3.
Ibyo bihe byose yagiye akora ibitaramo, ni ukuvuga mu wa 2022 no mu wa 2023, abafana n’abakunzi be bamushyigikiye bivuye inyuma. Mu kiganiro yakoreye kuri Televiziyo y’Igihugu, yabashimiye agira ati: “Ndashimira abakunzi bange banshyigikira umunsi ku wundi, buri gihe iyo twakoze Icyambu Live baba ari benshi, baruzura, ndabashimira.”
Iki gitaramo kizabamo ibintu bidasanzwe, kuko kizafunga imyaka icumi uyu muramyi amaze muri uyu murimo wo kwamamaza Ubutumwa binyuze mu ndirimbo.
Mu bisobanuro yatanze yagize ati: “Icyo mbahishiye ni ibintu bidasanzwe, kuko uyu ni umwaka wange wa cumi (10) maze ndirimba, kuko album yange ya mbere nayisohoye mu wa 2014. Ubu rero uyu mwaka wa 10 nahisemo kuwugira udasanzwe. Nahisemo kuzabatungura, kugira ngo nibaza bazabone ibintu batigeze babona.”
Mbonyi amaze imyaka itatu akora iki gitaramo kuri Noheri. Hari abantu benshi batazi impamvu yahisemo itariki ya 25 Ukuboza, kuko ari umunsi uba wahariwe ibirori bya Noheri. Yagize ati: “Noheri ni umunsi abantu tujyana gusangira n’imiryango, tugatarama, tukaganira, ariko ku mugoroba gahunda zikarangira, ukabona umunsi wije nk’indi yose.
Naricaye ndatekereza nti ‘uwategura ikintu abantu bazajya bahuriramo bamaze gusangira n’imiryango n’inshuti, bamaze gufungura, noneho bakaza gusoza umunsi wa Noheri bavuga ko utari usanzwe, utandukanye n’indi?’ Ni ukugira ngo bazave muri gahunda z’imiryango, baze duhurire ahantu turamye Imana ku bw’ibyo yakoze.”
Abafatanyabikorwa be bakomeye muri iki gitaramo. Ikintu gikomeye bamufashije, dore ko bahereye kera bamufasha, ni iki: “Airtel Money bamfashije mu gutegura igitaramo, kuko si ubwa mbere dukoranye, n’i Butare baramfashije, ndabashimira cyane.
Uruhare rwabo ni uko bateguye gahunda nziza, serivise nziza yitwa Wagwani, aho umuntu ashobora kohereza amafaranga ku mirongo yose, kandi ubwo buryo ni bwo abantu bari gukoresha bagura amatike. Iki gitaramo bakigizemo uruhare rukomeye cyane.”
Mu gusoza ikiganiro yakoze kuri uyu wa 20 Ukuboza 2024 kuri Televiziyo y’Igihugu, yageneye abakunzi be ubutumwa, anabibutsa uburyo bashobora kuguramo amatike. Ubwo butumwa bwe bugira buti: “Nababwira ko mbakunda. Ndabakunda, nishimira kubabona. Mukomeze mugure amatike mwifashishije www.ticquet.rw . Kuri Noheri muzaze mwese tugirane ibihe bidasanzwe.”
Icyambu Live Concert cyagiye cyitabirwa ku bwinshi mu nshuro ebyiri ziheruka, aho BK Arena yuzuraga abantu barenga ibihumbi icumi. N’uyu mwaka biteganyijwe ko abantu bazitabira ari benshi, dore ko Mbonyi akomeje gushimangira izina rye mu njyana ya Gospel, haba mu Rwanda ndetse no hanze yarwo.
Iki gitaramo cyahawe izina Icyambu rikomoka ku ndirimbo iri kuri album ye ya kane, ndetse rikajyana n’izina rye bwite, Mbonyicyambu Israel. Azaririmba zimwe mu ndirimbo ze zikunzwe nka Icyambu, Nina Siri, Nita Amini, Uwe Hai
