Ibyo bibye ni amafaranga yari yatuwe n’Abakristo basengera muri iri torero ry’Abaruteri, na Mudasobwa. Ibi byose bihwanye n’Amashilingi (amafaranga akoreshwa muri Tanzaniya) abarirwa muri miliyoni eshatu n’ibihumbi magana arindwi mirongo inani (3, 780, 000).

Aya mafaranga uyabariye mu Manyarwanda yagera hafi kuri miliyoni hafi ebyiri (1, 768, 000 ugenekereje). Amashilingi bibye ubwayo angana na miliyoni eshatu, uyashyize mu Manyarwanda yangana n’arenga miliyoni n’igice (1, 508, 963).

Abashumba b’iryo torero ry’Abaruteri babwiye ikinyamakuru Tuko gikorera muri Kenya dukesha iyi nkuru ko amafaranga yatuwe ku itariki 7 Mutarama 2024, ari yo yibwe n’aba bajura batagira isoni zo kwiba ahantu hafatwa nk’ahera.

Bavuze ko amaturo yatanzwe kuri uwo munsi bayashyize hamwe bakayabara, bagasanga ahwanye na miliyoni eshatu z’Amashilingi ya Tanzaniya, barangiza bagasohoka mu rusengero, bagataha nk’ibisanzwe n’amafaranga ari ho bayasize.

Bakimara kugenda no gusiga ayo mafaranga (amaturo) yari ari hamwe na Mudasobwa ntoya (laptop) mu biro biri mu rusengero, abajura baraje batobora urukuta rw’urusengero, binjiramo batwara ayo mafaranga na Mudasobwa.

Nk’uko ukuriye abapolisi (komanda) mu ntara ya Kilimanjaro Simon Maigwa yabitangaje, Mudasobwa ubwayo yari ifite agaciro k’Amashilingi yo muri Tanzaniya agera ku bihumbi magana arindwi na mirongo inani (780, 000), ugenekereje akaba ajya kungana n’ibihumbi magana abiri na mirongo itandatu (260, 000) mu Manyarwanda.

Simon Maigwa yagize ati: “Tariki 7 Mutarama 2024, nyuma y’iteraniro ryo ku Cyumweru, umubitsi w’amafaranga yo muri urwo rusengero yarayabaze, nyuma ayabika ahantu hatandukanye harimo mu kabati, ku meza no mu gikapu kigenewe kubikwamo amaturo.”

Igitangaje kuri ubu bujura, ni uko mu bahibye nta n’umwe wigeze afatwa, kandi kugeza ubu kuri iyi tariki ya 12 Gashyantare 2024, iperereza riracyakomeje gukorwa ngo bamenye nibura umwe mu baba barabugizemo uruhare.

Uru rusengero rwatobowe n’abajura, biba amaturo na Mudasobwa