Umuyobozi w’umuryango wa gikirisitu utanga ubutabazi wa Samaritan’s Purse, Franklin Graham, yavuze ko icyorezo cya Ebola cyibasiye uburasirazuba bwa Repubulika Iharanira Demokarasi ya Congo (RDC) gikomeje gukaza umurego, ndetse ko uko ibintu bihagaze nabi kurusha uko byari byarabanje gutekerezwa.

Yasabye Abakirisitu bo hirya no hino ku isi gusengera abaganga n’abandi bakozi bari ku murongo wa mbere mu kurwanya iki cyorezo.

Mu kiganiro yahaye ikinyamakuru The Christian Post, Graham yavuze ko Samaritan’s Purse yamaze gufungura ibigo bibiri byakira abarwayi ba Ebola, buri kimwe gifite ubushobozi bwo kwakira abarwayi 40. Ibi bigo byubatswe i Bunia ndetse no mu gace ka Nyankunde, mu majyaruguru y’uburasirazuba bwa RDC, ahafatwa nk’igicumbi cy’iki cyorezo.

Franklin Graham yavuze ko hari impungenge z’uko Ebola yaba yarakwirakwiriye henshi kuko yamaze ibyumweru byinshi itaramenyekana. Yagize ati: "Twizera ko icyorezo gikabije kurusha uko twabitekerezaga mbere. Birashoboka ko cyageze henshi kuko cyatinze kumenyekana."

Uyu muryango ufite abakozi 70 bari muri aka karere, barimo abaganga, abaforomo, abatekinisiye n’abandi bashinzwe ibikorwa by’ubutabazi. Gusa Graham yavuze ko gukora ikigo cyita ku barwayi ba Ebola bisaba byinshi birimo amazi meza, amashanyarazi yizewe, ibikoresho by’ubwirinzi ndetse n’abakozi benshi babifitiye ubumenyi.

Yasobanuye ko abakozi bambara imyambaro yihariye ibarinda kwandura, ku buryo nta gice na kimwe cy’umubiri kigomba gusigara kigaragara. Bitewe n’ubushyuhe n’uburemere bw’iyo myambaro, buri mukozi ashobora kumara iminota 30 gusa ari kumwe n’abarwayi mbere yo gusohoka agasimburwa.

Ikindi kibazo gikomeye ni ugupima Ebola. Graham yavuze ko ibizamini bigenzurwa na Leta kandi ibisubizo bishobora gutinda hagati y’iminsi ine n’umunani. Yavuze ko iyo bagira laboratwari yabo, ibisubizo byashoboraga kuboneka mu masaha make.

Yagaragaje ko Ebola ishobora gukomeza kwiyongera mu byumweru biri imbere mbere y’uko igabanuka buhoro buhoro, ndetse ko bishobora gufata amezi menshi kugira ngo icike burundu.

Franklin Graham yanatangaje ko abantu babiri mu bakozi bahoraho ba Samaritan’s Purse muri RDC bamaze guhitanwa na Ebola. Ku munsi ibigo bishya byafungurwaga, umwana muto na we yapfuye azize iki cyorezo.

Nubwo bimeze bityo, yavuze ko hari icyizere kuko hari abarwayi bamaze gukira bagasezererwa mu bindi bigo nderabuzima. Yashimangiye ko kumenya indwara hakiri kare ari ingenzi cyane kugira ngo ubuzima bw’umurwayi bukizwe.