Mu buzima bwa buri munsi, umuntu usuzuma neza uko isi imeze asanga ibintu byinshi bidafite umurongo uhamye kandi bigoye gusobanura.

Ubugenzuzi bw’ukuri bw’isi bwagaragajwe neza n’umwami Salomo mu gitabo cy’Umubwiriza, aho agaragaza ukuntu ubuzima bushingiye ku gahato, ku guhatirwa no ku gihombo. Ibi bituma ubuzima busa n’aho ari “kwiruka inyuma y’umuyaga,” ibintu bidashobora gufatwa cyangwa kugerwaho burundu.

Salomo, umunyabwenge kurusha abandi bose mu gihe cye, yaravuze ati: “Nsubiye inyuma mbona iby’agahato byose bikorerwa munsi y’ijuru, mbona n’amarira y’abarengana babuze kirengera, ububasha bwari bufitwe n’ababarenganyaga kandi ntibari bafite uwo kubahumuriza” (Umubwiriza 4:1).

Aya magambo agaragaza neza ukuntu isi yuzuyemo akarengane n’igitutu, aho abakomeye bakandamiza abakene, kandi ugasanga nta we ubatabara. Ibi bigaragaza ko kuva umuntu avutse kugeza apfuye, ubuzima bwe bushingira ku gahato n’imihati idahagarara.

Mu by’ukuri, umuntu avuka ku gahato, kuko adasaba kuvuka, akavuka agahita arira, kandi kuvuka kwe iyo byanze babaga umubyeyi. Aha ni ho Salomo yagaragarije ukuntu ubuzima bw’umuntu bwose bwuzuyemo guhatirwa: umwana ararira akivuka, agahita ahatirwa konka kugira ngo abeho, akabwirizwa kujya mu ishuri, agahatirwa kwiga, ndetse n’igihe aba akuze agahatirwa gushaka uburyo bwo kubaho.

Ibi byose bigaragaza ko umuntu atigenga nk’uko abitekereza, ahubwo ko akurikiraza amategeko n’igitutu cy’isi.

Ibi byatumye Salomo avuga amagambo akomeye ati: “Ni cyo cyatumye nshima abapfuye kuruta abazima bakiriho” (Umubwiriza 4:2). Ibi ntibivuze ko urupfu ari rwo rwiza kurusha ubuzima, ahubwo ni uko abapfuye baba bararuhutse ibigeragezo n’agahato k’iyi si.

Icyakora, Bibiliya igaragaza ko hari ibyiringiro birenze ibyo, kuko “hahirwa abapfa bapfiriye mu Mwami, kuko imirimo yabo ibaherekeza” (Ibyahishuwe 14:13). Ibi bisobanura ko ubuzima bugira agaciro iyo bushingiye ku Mana, kuko aho kuruhukira ku muntu nk`uwo hatanga amahoro aruta ayo ku isi.

Salomo akomeza avuga ati: “Ni ukuri bose barutwa n’utigeze kubaho, akaba atabonye imirimo mibi ikorerwa munsi y’ijuru” (Umubwiriza 4:3). Ibi bigaragaza ko ubuzima bwo ku isi bwuzuyemo ibibi byinshi, ku buryo umuntu utarigeze abaho ataba yarabibonye. Ariko na none, si ukugaragaza ko kutabaho ari byo byiza, ahubwo ni ukwerekana ukuntu ubuzima bushobora kuba buremereye kandi buhenze ku mutima w’umuntu uri kububamo.

Ku rundi ruhande, ubuzima bwo ku isi bugendera ku mategeko n’amabwiriza. Amategeko ni yo atuma ibintu bigenda neza, nk’uko amatara ya “feu rouge” agenga imodoka mu muhanda.

Nubwo umuntu agomba kubahiriza ayo mategeko, hari igihe ayakoresha nk’inzira yo gukorera Imana no gukorera abandi. Bityo, umuntu akwiye gukora ibimuteza imbere, ariko anibanda ku kubahiriza amategeko y’Imana n’ay’abantu kugira ngo ubuzima bugire gahunda.

Icyakora, ikibazo gikomeye kigaragara ni uko “imirimo yose n’iby’ubukorikori byose, ari byo bituma umuntu agirira ishyari mugenzi we” (Umubwiriza 4:4). Ibi bishimangira ko ibyo abantu bakora kenshi bibatera irari, ishyari n’amarushanwa adafite umumaro. Benshi bahora baharanira iby’isi, ariko nyuma bakazabona ko byose ari ubusa, nk’uko Salomo abivuga ko ari “ukwiruka inyuma y’umuyaga.”

Gusa, mu nyigisho ye, Pastor Christian Gisanura ntiyashakaga gushishikariza umuntu guhagarika gukora cyangwa kutita ku byo akora, ahubwo yari agamije kugaragaza ko ibintu byinshi dukurikirana ku isi bidafite agaciro k’iteka.

Umuntu ashobora kugira ibintu byinshi, ariko igihe cyo kubireka kiragera. Ni yo mpamvu Yesu Kristo yaje kugira ngo atwereke inzira y’ubugingo nyakuri, itari iyo guhora twiruka inyuma y’ibidashira, ahubwo ari iyo kugira ubuzima bufite intego mu Mana.

Mu gusoza, Pastor Christian Gisanura yashimangiye ko ubuzima bwo ku isi bushobora kugereranywa no “kwiruka inyuma y’umuyaga,” kuko umuntu aharanira byinshi ariko akabura amahoro arambye muri byo.

Ibyo Salomo yagaragaje byose bigaragaza ko ubuzima budafite Imana buba bwuzuyemo ubusa n’agahato. Ariko ubuzima bushingiye ku Mana bufite iherezo ryiza, amahoro n’agaciro karambye.

Pastor Christian Gisanura asoza ati: “Aho kwiruka inyuma y’umuyaga, dukwiriye gushaka ikintu gihoraho, ari cyo kuzamuka mu nzira y’Imana no kubaho mu mahoro yayo.”