Ubusanzwe itorero ry’Akarere (Conference) muri Methodiste Libre mu Rwanda hari uburenganzira ritagiraga mu gufata ibyemezo cyangwa kubikemura ku buryo byasabaga ubuyobozi bukuru bwo ku rwego rw’igihugu byose mu nzira yo kubikemura.

Paradise.rw yamenye amakuru y’uko Abayobozi bakuru b’itorero Methodiste Libre mu Rwanda bakoze umwiherero wabereye mu itorero Metodiste Libre ry’Akarere ka Huye, mu rwego rw’inama y’ikirenga n’inama z’itorero ry’akarere (Conference) zikorera mu gihugu hose bafite intego y’ubuyobozi bufite icyerekezo.

Muri uyu mwiherero, hanzuwe gutangira urugendo rwo kwegereza ubuyobozi n’ubushobozi abanyetorero aho amatorero y’akarere (Conference) bashaka kuyashakira ubuzima gatozi kugira ngo babashe kwikemurira ibibazo bitabaye ngombwa guhanga amaso hejuru.

Kayinamura Samuel, Umwepiskopi w’itorero Methodiste Libre mu Rwanda, avuga ko inteko rusange y’itorero yemeje ko Conference zigomba gusabirwa ubuzima gatozi.

Ati: "Turashaka guha ubuzima gatozi conference kuko kwegereza abakristo ubuyobozi n’ubushobozi bagakemura ibibazo byabo bakanafata ibyemezo batarindiriye inzego zo hejuru ko ziza kuko urwego rw’Abepisikopi arirwo rufite ubuzima gatozi kandi bagashobora kwigira no gutera imbere mu buryo bwihuse".

Kayinamura Samuel, Umwepiskopi w’itorero Methodiste Libre mu Rwanda

Bamwe mu bayobozi ba Conference bavuga ko bishimiye ko bari mu nzira zo guhabwa ubuzima gatozi

Rev. Pasitoro Seth Bizimana umuyobozi wa Conference ya Ruhengeri ikorera mu ntara y’Amajyaruguru n’igice cy’Uburengerazuba yagize ati: "Imirimo yose twakoreraga muri za Conference byadusabaga uburenganzira buvuye mu rwego rwo hejuru;

Kandi icyicaro kiri i Kigali kugira ngo bazaze gukemura ikibazo cyo mu giturage ugasanga rimwe na rimwe ibintu birahadindirira, ariko kuko bamanuye ubuyobozi bakanabuha ubushobozi abegereye abakristo bazajya bitworohera mu mirimo no gukemura ibibazo"

Ariane Simbi umuyobozi wungirije wa Conference ya Kigali nawe yagize ati: "Ubundi ibyemezo byose twategerezaga hejuru bishobora rero kuba imwe mu mbogamizi yo kudindiza haba ibikorwa by’amajyambere cyangwa bimwe mu byifuzo by’abakristo bigeza aheza itorero ariko ubu byose bigiye gukemuka".

Judith Kanzayire umukozi w’Urwego rw’Igihugu rw’Imiyoborere (RGB) avuga ko abakristo b’itorero Methodiste Libre bicaye bakaganira bahitamo kwegereza ubuyobozi n’ubushobozi abakristo babo.

Ati: "Ubundi itegeko ry’imiryango ishingiye ku myemerere ibemerera gushyiraho amategeko yabo abagenga bakaba bahitamo icyerekezo cyabo, birumvikana kitanyuranyije n’itegeko. Kuba barabihisemo ntacyo bitwaye kandi bizatanga umusaruro ukomeye".

Kugeza ubu mu itorero Methodiste Libre mu Rwanda habarizwa amaconferance 10 asengeramo abakristo barenga ibihumbi magana atanu.

Umukozi wa RGB avuga ko guha ubuzima gatozi Conference bizatanga umusaruro ukomeye

Abayobozi b’itorero Methodiste Libre mu Rwanda bigiye hamwe uko bagiye guha ubuzima gatozi Conference