Ni igiterane kizamara icyumweru dore ko kizatangira kuwa 17/12/2023 gisozwe kuwa 24/12/2023. Ni ku nshuro ya 17 iki giterane kizaba kiba, kikaba cyaratumiwemo abakozi b’Imana batandukanye barimo Pastor Hortense Mazimpaka umuyobozi w’itorero rya Believers Worship Center;

Apostle Serukiza Sosthene uyobora itorero ryitwa Guerison des ames ku Isi, Pastor Julienne Kabanda Madame wa Pastor Stanley Kabanda bafatanya kuyobora Itorerorero rya Jubilee Revival Assembly akaba ari nawe washinze ndetse akayobora Grace Room Ministry imaze kuba ubukombe.

Abandi bakozi b’Imana batumiwe ni Bishop Harerimana John Bosco uzwiho gukoreshwa n’Imana ibitangaza akaba ashumbye Itorero rya Zeraphat Holy Church Rwanda. Kuri uru rutonde kandi habarizwaho Pastor Tom Gakumba uzwi mu biganiro ’Ese bipfira he?’ akorana n’umugore we Anitha Gakumba, bakaba bafatanya kuyobora Itorero Christ Kingdom Embassy.

Pastor Tom Gakumba ni umwe mu bakozi b’Imana bakunzwe cyane dore ko iyo abwiriza nta muntu wamusinzirana. Niwe wigeze gutangaza ko ikintu cyatuma ibyaha bigabanuka ku Isi ari uko ’umuriro w’Imana wamanuka mu mitima y’abizera byuzuye’.

Umwanya wo kuramya no guhimbaza Imana wahawe icyicaro muri iki giterane. Umuramyi Nkomezi Prosper wamenyekamye mu ndirimbo zirimo "Inkomezi, Nzayivuga, Singitinya, Wanyujuje indirimbo ni umwe mu bazaririmba muri iki giterane.

Undi muramyi ni Jado Sinza umwe mu banditsi b’indirimbo b’abahanga u Rwanda rufite akaba anaririmba mu itsinda rya New Melody ndetse no muri Siloam choir ADEPR Kumukenke aho byitezwe ko azazamura icyubahiro cy’Uwiteka mu ndirimbo ze zikunzwe cyane nka "Inkuru y’agakiza, Golgota, Ndategereje, Ndi Imana yawe n’izindi.

Itsinda rya Healing Worship Team ryakunzwe mu ndirimbo nziza nka Atatimiza, Jina Hilo ni Uzima, Nguwe neza, Icyo yavuze... naryo rikaba ryaratumiwe mu guhesha umugisha abazitabira iki gitaramo ngarukamwaka.

Mu kiganiro n’itangazamakuru cyo kuwa 14/12/2023, Bishop Karemera Emmanuel, Umushumba Mukuru wa Living Word Church ku Isi, yagarutse kuri iki giterane kigiye kuba ku nshuro ya 17.

Yavuze ko mu byagendeweho batoranya abakozi b’Imana bazifatanya barebye ku bakozi b’Imana bafite ibyo baje kubafasha haba mu myizerere no mu mikurire. Yagize ati: "Kugira ngo ugere aho utaragera ni uko ukorana n’uwahageze bityo ukenera umuntu uri hejuru yawe".

Yakomeje avuga ko muri iki giterane inyigisho zizaba ziyobowe n’abantu bayoboye ibigo bikomeye. Yongeyeho ko muri iki giterane abo bantu bazigisha ku misozi 5 cyangwa se ku nkingi 5 zirimo Business, Urubyiruko, Abana, Abubatse.

Abajijwe n’umwe mu banyamakuru ku mwihariko w’iki giterane kizaba kiba ku nshuro ya 17 ugereranyije n’ibindi biterane byabaye by’umwihariko icyabaye ku nshuro ya 16, Bishop Emmanuel yavuze ko umwihariko ari ariya matsinda bagiye batandukanya kugira ngo buri tsinda rigende ryiga ukwaryo (Urubyiruko, abubatse, Iterambere mu by’ubukungu,...) Ibi bikaba bitandukanye n’igiterane cyabaye ku nshuro ya 16.

Yavuzeko inyigisho (seminars) zizajya ziba mu gitondo) aho abazazitanira bazajya babasha kwiga ndetse no kubaza neza no gusobanukirwa hakazaba hari Pano (Akanama Nkemurampaka) gashinzwe gutanga ubusobanuro bwimbitse.

Yavuze ko n’abana batoya babarizwa muri Sunday school bazahabwa akanya ko kubaza ibibazo bitandukanye ndetse ko kwishimana nabo. Aha yahise ashimangira ko umwihariko nyir’izina w’iki giterane nta muntu n’umwe baheje ahubwo buri muntu wese yatekerejweho.

Mu bazayobora ibiganiro hakaba harimo Pastor Natasha umwe mu bakozi b’Imana bamenyerewe mu kuyobora conferences zikomeye ndetse akaba amenyerewe mu bikorwa by’imurikagurisha.

Abajijwe na Paradise rimwe mu masomo bavanye mu biterane byatambutse bibaha imbaraga no kudacika intege, Bishop Emmanuel Karemera yasobanuye ko kuba hari umubare munini w’abakirijwe muri ibi biterane ari byo bibaha imbaraga zo gukora. Yongeyeho kuri ubu hirya no hino ku isi hari abakozi b’Imana batandukanye babyawe n’iri torero ridashingiye ku idini.

Living Word Church ni Itorero ryemera Yesu Kristo nk’umwami n’umukiza. Ryemera ko Yesu yambaye ishusho y’umuntu kugira ngo apfire abanyabyaha, ku munsi wa gatatu akazuka, akajyanwa mu ijuru, akazagaruka aje gucira imanza abazima n’abapfuye.

Iri torero ntirishingiye ku idini iryo ariryo ryose. Icyakora cyo rishobora gufatanya n’idini runaka rya Gikirisitu mu gutegura ivugabutumwa rigamije mu kuzana abantu kuri Yesu.
Kuri ubu rifite icyicaro i Kanombe hafi y’ahazwi ku izina ryo kwa Habyarimana.

Living Word Church Kanombe yateguye igiterane gikomeye "Go to the Next Level Conference"