Nyuma yo gukora ubukwe bw’akataraboneka n’umukobwa witwa Uburiza Sandrine, Serge Iyamuremye akomeje guca impaka z’abatekerezaga ko atazakomeza gushyira imbaraga mu bikorwa bya Muzika nk’uko twabibonye ku bahanzi batandukanye.

Nyuma yo gukora ubu bukwe bwabaye le 01 Mutarama 2023, umuramyi Serge yahise ahindurira paje mu myiteguro yo kumurika Album y’indirimbo zo kuramya no guhimbaza Imana yise "SAA Cyenda".

Mu kiganiro kirekire yagiranye na Paradise.rw, Serge Iyamuremye utuye muri Amerika hamwe n’umuryango we, yashimangiye amakuru agaragara ku ifishi igaragaraho ubutumwa buteguza abakunzi be kuzashyikirizwa uwo muzingo vuba. Ubwo twamubazaga aho agejeje imyiteguro yo kumurika iyi Album yagize ati:

Ni byo koko, maze iminsi ndi gutekereza gusohora Album irimo ubutumwa bwiza bubwira abantu Umwami Yesu Kristo. Nifuje ko nakora Album ikubiyemo ubutumwa bwibutsa abatoya, abakuru ndetse n’urubyiruko imirimo ikomeye Umwami Yesu Kristo yakoreye ku musaraba i Golgota.

Nkabibutsa ko yatubereye inshungu, nkabibutsa ko amaraso ye y’igiciro ari yo soko yo kuba twitwa abaragwa b’ubugingo, ikaba Album buri muntu wese ashobora kwiyumvamo.

Yongeyeho ko iyi Album igizwe n’indirimbo yakoreye muri Leta Zunze Ubumwe za Amerika.

Twamubajije abamufashije imirimo yo gutunganya izi ndirimbo, yagize ati: "Urebye izi ndirimbo ni njye wazikoze mfatanyije na bamwe mu batunganya amashusho n’amajwi bari mu gihugu cy’u Rwanda. Iyi album ikaba igizwe n’indirimbo zanditse mu ndimi ebyiri: Ikinyarwanda ndetse n’Icyongereza".

Serge yizeye gukoreshwa ibikomeye na Yesu Kristo mu gihugu ari kubarizwa ubu

Rimwe mu mashimwe Serge aremereye yatangarije Paradise.rw, yavuze ko yageze muri Amerika asanga Imana yaramuharuriye ikibuga dore ko yatunguwe n’urukundo yagaragarijwe n’aba producers, abahanzi ndetse n’abakunzi ba Gospel bo muri kiriya gihugu.

Yavuze kandi ko yatangiye gukorana nabo imishinga itandukanye. Ibi akaba ahamya ko bimuha icyizere kuri Album ye yise "SAA Cyenda", ndetse bikamufasha gukora indirimbo nziza ziri mu rurimi rw’Icyongereza nk’uko abyifuza.

Uyu muramyi urangwa no gutegura neza ibikorwa bye byose bya Muzika, ahamya ko we ubwe ntacyo yakwishoboza, gusa akaba afite icyizere ko Imana ishobora byose, nyir’imbaraga izamufasha ikamushoboza gukora umurimo ukomeye muri kiriya gihugu.

Serge Iyamuremye utuye muri Leta Zunze Ubumwe za Amerika yagize ati: "Nzi neza ko Kristo Yesu uri muri njyewe ntacyo adashoboye. Ku bw’ibyo umutima wanjye urambwira ko azankoresha umurimo ukomeye muri iki gihugu (aravuga Amerika atuyemo)".

Serge Iyamuremye ni umunyabigwi muri Gospel y’u Rwanda ndetse no muri aka karere. Yanditse amateka ahanini bitewe n’indirimbo ze zagize uruhare rukomeye mu kuzamura ibendera rya Gospel.

Yakoranye indirimbo n’abahanzi batandukanye. Indirimbo "Yesu aragarutse" yakoranye na James na Daniela ni imwe mu ndirimbo zanyeganyeje itangazamakuru n’imbuga nkoranyambaga dore ko imaze kurebwa n’abantu barenga miliyoni ebyiri kuri YouTube.

Yanakoranye na Israel Mbonyi indirimbo bise "Urugendo", iyi nayo ikaba imwe mu ndirimbo zakunzwe zinaririmbwa mu nsengero zitandukanye.

Serge Iyamuremye akunzwe cyane muri iyi minsi mu ndirimb "Yesu Agartutse" yakoranye na James na Daniella

Uretse izo yakoranye n’abahanzi batandukanye, afite izindi ndirimbo nziza yakoze wenyine. Zimwe muri izi ndirimbo ni nka "Biramvura", "Yari njyewe", "Unconditional Love", "Amashimwe", "Arampagije" yatumbagije ubwamamare bwe, ndetse n’izindi.

Mu mwaka wa 2012 ni bwo yashyize hanze Album ya mbere yise "Nta mvura idahita". Ni mu gitaramo cyitabiriwe n’abahanzi b’ibyamamare barimo Gaby Kamanzi, Simon Kabera, Arsene Manzi n’abandi. Cyamubereye inzira y’umugisha dore ko cyatumye abakunzi ba Gospel bamuha ikibanza mu mitima yabo.

Mu mwaka wa 2018 mu gitaramo cyabereye muri Serena Hotel cyitabirwa n’abantu batabarika biganjemo ibyamamare, Serge Iyamuremye yamuritse Album yise "Biramvura". Umunyamideri Kate Bashabe, Miss Joannah, Auncle Austin ndetse na Pastor P, ni bamwe mu bitabiriye iki gitaramo cyahembuye abacyitabiriye.

Serge, umwanditsi, umuhanzi, akaba na Producer, ni umwe mu banyuranye umucyo mu gitaramo cyo gusoza irushanwa rya Rwanda Gospel Stars Live cyitabiriwe n’abahanzi barimo Rose Muhando, Israel Mbonyi, Aline Gahongayire, The Bosebabireba, Gaby Kamanzi, True Promises na Gisubizo Ministry, James na Daniella. Cyabereye kuri Canal Olympia mu Mujyi wa Kigali.

Ni umwe mu bahanzi ba Gospel bitabiriye ibitaramo biremereye byabereye hanze y’u Rwanda ndetse anakorerayo ibitaramo bye bwite byirahiwe na benshi kubera ubuhanga byateguranywe.

Urugero, tariki ya 30 Nyakanga 2017 yakoze karundura cyitwa ‘Rwandan Praise’ cyabrye i Maputo muri Mozambique. Ni igitaramo cyahuje abahanzi ba Gospel nyarwanda bakunzwe ku rwego rwo hejuru ari bo Serge Iyamuremye, Israel Mbonyi na Adrien Misigaro.

Nyuma y’iki gitaramo, Adrien Misigaro yananiwe kwihangana ashimira Serge Iyamuremye wagize iyerekwa ryo gutegura igitaramo ndetse yishimira uko cyagenze ati: "Concert yari irimo umwuka w’Imana. Twatunguwe rwose no gusanga indirimbo zose bazizi...byari byiza cyane..."

SAA CYENDA, ni Album ya 5 ya Serge Iyamuremye, ikazaba igizwe n’indirimbo 11 ziganjemo indirimbo ze bwite, gusa ikazagaragaraho indirimbo yakoranye na Annette Murava uherutse gukorana ubukwe na Bishop Gafaranga.

Umuramyi Serge atuye muri Amerika hamwe n’umuryango we

Album ye ya 5 yise SAA CYENDA irasohohoka mu minsi ya vuba

RYOHERWA N’INDIRIMBO YE YITWA "YESU AGARUTSE"