Uyu mugabo wamenyekanye nka Bishop Gafaranga ku mbuga nkoranyambaga, amazina ye nyakuri ni Habiyaremye Zacharie, akaba yarashyingiranywe ku nshuro ya kabiri n’umugore we w’umuramyi Murava Annette.
Mu ibanga rikomeye, ku wa 11 Gashyantare 2023, ni bwo aba bombi basezeranye, aho bari batanze itegeko ry’uko nta tangazamakuru ryemerewe kwinjira aho bakoreye ubukwe, kuri La Palisse Hotel i Nyamata, mu Karere ka Bugesera.
Amakuru akaba avuga ko icyatumye ariheza no gufata nibura ifoto bikaba ikizira ari uko atifuzaga ko umugore we bari baherutse gutandukana yahagera akabavangira. Batandukanye babyaranye abana batatu.
Mu ntangiriro z’umwaka wa 2024, hashize amezi icyenda abanye na Murava Annette usanzwe ari umuhanzikazi mu ndirimbo zo kuramya no guhimbaza Imana, babyaranye umwana w’umuhungu, aba uwa kane kuri Bishop Gafaranga.
Nk’ibisanzwe, Bishop Gafaranga yagiyeho aramutaka bidasanzwe, avuga uko amubona nyuma yo kubyarana uyu muhungu agira ati: “Nishimiye ukuntu mbona ari umuntu uzita ku muryango wange, ku bana bange, … kandi ndamutse mfuye, mfite ikizere ko Murava yarera abana bange kandi bose (harimo n’abo yabyaranye n’umugore wa mbere batandukanye), utagira ngo ni uyu gusa.”
Ni mu kiganiro yashyize kuri channel ye ya YouTube Gafaranga na Murava ahuriyeho n’umugore we. Yakomeje avuga ko akunda uburyo Murava yubaha ibitekerezo bye kandi akamukundira abana.
Mu minsi ishize ubwo umwana we w’imfura yabyaranye n’umugore wa mbere yajyaga kwiga mu mashuri yisumbuye i Zaza, Annette ni umwe mu bamuherekeje kandi icyo gihe yari atwite inda nkuru y’uyu mwana yibarutse muri uyu mwaka wa 2024.
Gafaranga aherutse gutaka umugore we ubwo yagiraga isabukuru y’amavuko, ku itariki 8 Kanama 2023, cyane ko yari isabukuru y’amavuka ya mbere yari agize babana nk’umugabo n’umugore. Uku guhora amuvuga ibigwi birimo ko yamukunze abizi ko afite abana batatu, bigaragaza ukuntu uyu mugabo yaryohewe n’urushako.
Murava Annette ni umuhanzikazi wamenyekanye mu ndirimbo nyinshi zo kuramya no guhimbaza Imana zirimo Niho Nkiri, Ndakwibutse, Urahebuje, Imboni, Umuriro yakoranye na Bishop Gafaranga na Martin n’izindi.
Bishop Gafaranga cyangwa Habiyaremye Zecharie, ni umukinnyi wa filime, umuhanzi mu ndirimbo zo kuramya no guhimbaza Imana, akaba n’umuvugabutumwa, ari na ho akura izina Bishop.
Ushaka kumenya byinshi kuri uyu muryango, wasura imbuga nkoranyambaga bakoresha ari zo Gafaranga na Murava.
