Tariki ya 01 Mata 2023, uwari umuyobozi w’uyu muryango, Bwana Jimmy Rubibi yasezeye ku busiribateri ahitamo kwibanira akaramata n’umukunzi we Furaha Benita, bari bamaranye imyaka itatu babwirana amagambo meza, ndetse aba bombi bahise berekeza gutura muri Leta Zunze Ubumwe za Amerika.

Nyuma y’iminsi mike, Uwiteka yagiriye icyizere bwana Rugenera Ivan ahabwa inkoni y’ubutware ngo akomeze umushinga wo kuzana abantu kuri Kristo.

Nyuma yo guhabwa umwitero, Rugenerwa Ivan n’umuryango ashumbye wa Holy Entrance, bakomeje gutera intambwe zo gukora ivugabutumwa binyuze mu ndirimbo zo kuramya no guhimbaza Imana ndetse n’ibikorwa by’urukundo.

Uyu muryango ufite icyicaro mu mujyi wa Kigali ukagira amashami mu gihugu cya Kenya ndetse no mu Karere ka Kayonza, kuri ubu ukomeje kwitegura igitaramo bise "Good News".

Nyuma yo gusohora indirimbo Ndagushimira, Holy Entrance yasohoye indirimbo bise "Ndi Uw’agaciro" ikaba ifite ubusobanuro bukomeye ku gitaramo bakomeje kwitegura.

Mu kiganiro na Paradise.rw, umuyobozi mushya w’uyu muryango, Bwana Rugenerwa Ivan yatangaje byinshi ku hazaza h’uyu muryango nyuma yo guhabwa inshingano zo kuwuyobora.

Ubwo Paradise.rw yamubazaga ku ndirimbo nshya "Ndi uwagaciro", yagize ati: "Indirimbo "Ndi uw’agaciro" ikubiyemo ubutumwa bukomeye.

Yavuze ko "abakristo bose bavutse ubwa kabiri bakwiye kumenya ko turi ab’agaciro imbere y’Imana kubera umurimo ukomeye Kristo Yesu yakoze wo kuducungura aducunguje amaraso y’igiciro (1 Petero 1:19) ahanditse ngo ahubwo mwacungujwe amaraso y’igiciro cyinshi, nk’ay’Umwana w’intama utagira inenge cyangwa ibara, ariyo ya Kristo).

Yakomeje agira ati "Twahidutse abana b’Imana ku bwayo maraso ndetse dukomeza twibutsa abakristo ko n’inzadiko zaturegaga yazikuyeho azikujeho kubambwa kumusaraba.

Yahise anakomoza ku giteramo bakomeje gutegura, aho yagize ati: "Nyuma y’iyi ndirimbo Holy Entrance Ministries vuba aha ku itariki 02/07/2023 dufite concert twise "Goodnews Live Concert season1" izabera Christian Life Assembly (CLA) Nyarutarama.

Yakomoje ku gaseke kazapfundurwa kuri uriya munsi, aho yagize ati "Tubahishiye byinshi byiza muri icyo gitaramo tuzaba turi kumwe n’abandi baramyi beza bakuzwe kandi bafasha imitima y’abera muri iki gihugu, tuzabagezaho vuba ibiciro byo kwinjira kuri uwo munsi".

Ntitwazuyaje, twahise tumwinjiza mu Byanditswe Byera, mu 1 Ngoma 22:7-19), ubwo Dawidi yageraga mu zabukuru, akaba yarahamagaye umuhungu we Salomon, amwereka umushinga mwiza yari afite wo kubakira Uwiteka inzu, amuha igishushanyo mbonera, ndetse amwereka ubutunzi azaheraho kugira ngo azafatanye n’abisiraeli kubaka inzu y’uwiteka.

Aha twashakaga kumubaza imwe mu mishinga Jimmy Rubibi yamusigiye, ndetse n’icyo yiteguye gukora kugira ngo uyu muryango ukomeze kwaguka. Rugenerwa Ivan yasobanuye ko hari project nyinshi bafite, uhereye kuri concert izaba tariki 02/07/2023 ndetse n’izindi zigamije kwagura ubwami bw’Imana.

Yagize ati: "Ndahari kandi nzafatanya n’abanyamuryango bose ba holy Entrance Ministries kugira ngo tubashe kwaguka haba mu buryo bw’Umwuka ndetse no mu buryo bw’umubiri. Dufite project nziza zizafasha abanyarwanda kumenya ubutumwa bwiza bw’umwami Yesu Kristo no kwiteza imbere, ibyo byose rero tuzabishobozwa na Kristo kuko ni we uduha imbaraga".

Yashimiye abakunzi ba Holy Entrance Ministry ku bwo kudahwema kubana nabo umunsi ku wundi ndetse no kubashyigikira mu bikorwa uyu muryango wagiye utegura mu bihe bitandukanye, abasaba gukomeza kubashyigikira uhereye ku gitaramo cyizaba kuwa 02/07.

Yabasabye kuzaza ari benshi aho yagize ati: "Turi kubategurira ibihe byiza cyane tubiyobowemo na Kristo, rero ntihazagire ubura kuri iriya tariki".

Holy Entrance yateguye igitaramo gikomeye

Holy Entrance igizwe n’abiganjemo urubyiruko

Ntuzabure mu gitaramo cya Holy Entrance

RYOHERWA N’INDIRIMBO NSHYA YA HOLY ENTRANCE MINISTRY