Ntekereza ko ari umugisha kuri njye, bikaba amahirwe kuri wowe kuko Mwuka Wera yatuzirikanye adutegurira umunsi w’akataraboneka wo guhimbaza Imana no guhembuzwa ibyanditswe byera byahumetswe n’Imana. Ntabwo twari duherutse kubwirwa ngo "Kwinjira ni Ubuntu, Ugasohokana amasezerano.

Nimuze ubwenge bwacu n’umutima wacu tubikoreshereze umwami Yesu, twerekeza mu rusengero rwa New Life In Jesus Ministries rwaduteguriye aya masaha 12 yo gusabana n’Imana. Tubike Iyi tariki ya 16/07/2023, azaba ari ku cyumweru.

Mu kiganiro na Paradise.rw, Umubyeyi Lyidie umuyobozi w’itsinda riramya rikanahimbaza Imana muri iri torero rya New Life in Jesus Christ Ministries, yabajijwe kuri iki gikorwa, arasubiza ati"Ni igikorwa cyateguwe kizaba le 16/07/2023, azaba ari ku cyumweru, ni igikorwa giteganyijwe amasaha 12 kuva saa mbiri za mu gitondo kugera saa mbiri z’ijoro".

Twamubajije intego y’iki gikorwa, nawe ati: "Intumbero y’uyu munsi ni ukuramya Imana tugahimbaza Imana tugaha Imana ikibanza, cyangwa se tugaha Imana umwanya w’ayo masaha, tuyiramya, tuyihimbaza kuko ijambo ry’Imana ritubwira ngo "Uwiteka atura mu mashimwe y’abana be". Navuga nti Tuzaba twitanze uyu munsi nta kindi kiduhuje uretse kuramya no guhimbaza Imana".

Uyu munsi uzaba ari umugisha ku bakunzi bo kuramya no guhimbaza Imana kuko itorero rya New Life in Jesus Ministries ryateguye byose, Mwuka wera nawe yiteguye kumanukira Imitima, agasubizamo ibyiringiro abatentebutse, abanyamibabaro bakishima, imbaraga zo gukomera kw’Imana zizakorera mu baramyi batandukanye barimo Nelson Mucyo usanzwe ari n’umunyamakuru wa Paradise.rw, Arsene Tuyi, Alice Tony ndetse na Victorious Yves.

Ijambo ry’Imana rizaba rifite intebe ndende muri iki gitaramo cy’amanywa aho Pastor John Nganji umushumba w’iri torero azaba ari mu bihe byiza byo kugabura amata y’Umwuka adafunguye, mu gihe Rutagwera Elie nawe bazafatanya kubaka igicaniro.

Itsinda ryo kuramya no guhimbaza Imana rya New Life in Jesus Worship Team, ribarizwa muri iri torero riyobowe na Lydie Umubyeyi, naryo rizifatanya na bariya baramyi kuzamura ibendera rya Kristo binyuze mu mpano yo kuramya no guhimbaza Imana.

Reka dusubize ababaza bati "Ese ni iki cyo kwitega? Mu ijwi rya Lydie reka tugire tuti "Icyo kwitega ni uguhemburwa imitima kuko tuzaba turamya, duhimbaza Imana. Kandi ahari ukuramya Imana ukubaho kw’Imana kurahaba, kandi iyo Imana yahabaye ntisezerera amara masa abana bayo, barahemburwa. Nimuze duhemburwe n’Imana".

Tuzabe twatebeje, abo bitabera bashananishe, Winjira kwa Yesu ubabaye ugataha uhumuriza abababaye.

Arsene Tuyi azitabira iki giterane

Victorious Yves yambariye kuzitabira iki giterane

Nelson Mucyo azaririmba muri iki giterane

New Life in Jesus Christ Ministries iguhaye ikaze muri iki giterane