Mu butumwa yanyujije kuri Instagam mu gitondo cyo kuri uyu wa Gatandatu tariki 20 Ukwakira 2022, Elsa Cluz yashimiye Imana kuba yarakoreye mu mukunzi we Chantina akamwizera akamuha umutima we ngo awuyobore. Yunzemo ati "Warakoze ku bwa byose Mukunzi...HWA to us".

Umuhanzi Eslon NY utuye muri Leta Zunze Ubumwe za Amerika, akaba inshuti ya hafi y’aba bombi, yifurije umuryango wa Elsa na Chantina kuzarambana bakazarenza imyaka 100 babana nk’umugabo n’umugore. Ati "Muzarenze 100".

Bamaze imyaka 3 barushinze

Elsa na Chantina basezeraniye mu rusengero rw’Abadivantiste rwa LMS Kamukina ku Kacyiru. Ni ibirori byitabiriwe n’inshuti n’abavandimwe b’imiryango yombi. By’umwihariko Elsa Cruz yari ashagawe n’abiganjemo abahanzi bafite amazina azwi mu muziki uhimbaza Imana.

Abitabiriye ubu bukwe bwayobowe na MC Philos, bakiriwe mu Busitani bwa SOS ku Kacyiru. Mu kiganiro kigufi yahaye IGIHE, Elsa Cruz yavuze ko afite ishimwe rikomeye kuko Imana yasohoje isezerano ryayo kuri we.

Yagize ati "Uwiteka yadukoreye ibikomeye natwe turishimye, yaduhaye ubukwe bwiza, tumusezeranyije kuzamukorera kugera ku mwuka wacu wa nyuma".

Yashimangiye ko mu byo yakundiye umugore we ari uko afite kubaha Imana muri we. Ati "Chantina ni umukobwa wubaha Imana, ukunda gusenga kandi afite indangagaciro z’umukobwa w’Umunyarwandakazi wakwifuzwa na buri wese. Naramusengeye, namweretse Imana kuva kera nta mukunzi mfite".

Elsa Cruz n’umukunzi we Bayiramye basezeranye imbere y’amategeko ku wa Kane, tariki ya 17 Ukwakira 2019, mu Murenge wa Niboye mu Karere ka Kicukiro. Ku wa 20 Ukwakira 2019 ni bwo basezeanye imbere y’Imana. Mu myaka 3 bamaranye, bafite umugisha w’umwana umwe.

Elsa na Chantina ku munsi bakoreyeho ubukwe