Umuhanzi nyarwanda uherutse kwiyemeza kuririmba indirimbo zo kuramya no guhimbaza Imana Ngabo Medard Jobert uzwi ku izina Meddy uba muri Leta Zunze Ubumwe z’Amerika, yatangaje ko umukobwa we w’imfura Myla yabyaranye na Ngabo Mimi Mehfira uvuka muri Etiyopiya ari igisubizo cy’amasengesho yasenze.

Ibi yabitangaje ku rubuga rwa Instagram, nyuma yo gusangiza abakunzi be amashusho y’umukobwa we Myla, akarenzaho amagambo ashimira Imana, agaragaza ko yasubije amasengesho ye.

Byari bikubiye mu butumwa bw’umunsi w’abakundana uzwi nka Saint Valentin, ashimira umugore we Ngabo Mimi Mehfira mu magambo agira ati: “Nshimira Imana ku bwawe mukunzi, ngukunda cyane uyu munsi kurusha uko nagukundaga ejo.”

Ku mwana we w’umukobwa yise Myla, yagize ati: “Nibuka nsengera umwana uzazana urumuri, ikizere, umwana uzazana kubaho kw’Imana mu isi, umwana uzarerwa n’umwuka w’Imana, wuzuye ubuhanga no gutega amatwi.”

Yakomeje asobanura byinshi kuri uyu mwana we w’umukobwa, avuga ukuntu ari umugisha kuri we, ndetse akaba n’imbuto yagenewe n’Imana agira ati: “Igikomangomakazi cyo mu bushorishori, inshuti magara ya Yesu, igikomangoma Myla, mbega ukuntu ngukunda. Kwitwa se umubyara ni icyubahiro.”

Aya magambo yavuzwe ku wa 14 Gashyantare 2024, nyuma y’imyaka igera hafi muri itatu Meddy asezeranye kubana akaramata n’umugore we Mimi, kuko basezeranye ku wa 22 Gicurasi 2024.

Ni nyuma kandi y’imyaka igera hafi muri ibiri umwana we Myla amaze avutse, kuko yavutse ku wa 22 Werurwe 2022.

Ni umwe mu bagabo baryohewe n’urushako, kandi nyuma yaho yiyeguriye Imana, urugo rwabo rugengwa n’Umwuka w’Imana.

Nyuma yo kubana akaramata na Mimi, Meddy yatangiye urugendo rwo kuririmba indirimbo zo kuramya no guhimbaza Imana. Amaze gukora indirimbo ebyiri ari zo ‘Grateful’ yasohoye mu mwaka wa 2023 muri Mutarama, na ‘Niyo Ndirimbo’ yasohoye muri Mutarama k’uyu mwaka wa 2024. Iri mu zikunzwe muri iyi minsi, akaba yarayikoranye na Adrien Misigaro.

Muri Gicurasi, imyaka izaba ibaye itatu basezeranye

Harabura ukwezi umwana wabo Myla akuzuza imyaka ibiri