Umuhanzi uramya Imana binyuze mu ndirimbo, SEE MUZIK, yasabye urubyiruko kwigira ku mateka no guhitamo urukundo mu gihe cya Kwibuka ku nshuro ya 32 Jenoside yakorewe Abatutsi mu 1994.
Mu gihe u Rwanda ruri mu minsi yo kwibuka ku nshuro ya 32 Jenoside yakorewe Abatutsi mu 1994, umuhanzi uririmba indirimbo zo kuramya no guhimbaza Imana ndetse n’iz’ubutumwa bwubaka, uzwi nka SEE MUZIK, yatanze ubutumwa bwibanze ku rubyiruko, abasaba kumva no kwigira ku mateka Igihugu cyanyuzemo.
Uyu muhanzi yavuze ko nubwo bamwe mu rubyiruko batari bahari mu gihe Jenoside yabaga, ingaruka zayo zabagezeho binyuze mu bubabare bw’abayibayemo n’ingaruka zakomeje kugaragara mu muryango nyarwanda.
Yagize ati: “Nubwo tutari duhari, twumvise ububabare bw’abatubanjirije, tunabonesha amaso yacu ingaruka z’urwango n’amacakubiri. Ni yo mpamvu dukwiye kwigira ku mateka, tukirinda urwango rwose.”
SEE MUZIK yibukije ko urukundo ari rwo rukingira isi n’abantu, ashimangira ko ari rwo rukwiye kuranga urubyiruko rw’uyu munsi n’igihe kizaza.
Ati: “Urwango ntirukwiriye kongera kubona umwanya muri twe. Urukundo ni rwo rutsinda byose, kandi ni rwo rushobora kurinda isi kudasenyuka.”
Nk’umuhanzi w’indirimbo za Gospel zubaka, yavuze ko yumva inshingano ye ari ugukoresha impano ye mu gukwirakwiza ubutumwa bwo gukira no kongera kwiyubaka, cyane cyane abinyujije mu muziki.
Yagize ati: “Nk’umuhanzi ukiri muto, mbona uruhare rwanjye rukomeye ari ugutanga ubutumwa bw’urukundo no gukira, nkoresheje umuziki n’urubuga nahawe.”
Yanagarutse ku kibazo gikomeje kugaragara mu rubyiruko muri iki gihe cy’ihungabana rishingiye ku buzima bwo mu mutwe, avuga ko akenshi gituruka ku mateka mabi Igihugu cyanyuzemo, bigasiga ibikomere byagiye byambukiranya ibisekuru.
Yasobanuye ko kugira ngo u Rwanda rukomeze gutera imbere, hakenewe kongera kubaka abantu mu mitekerereze no mu mwuka.
Ati: “Kugira ngo twubake u Rwanda rwiza, tugomba kubanza kuvugurura imitekerereze n’imitima yacu. Uruhare rwanjye nk’umuhanzi ni ugufasha muri uru rugendo rwo gukira no kwiyubaka.”
Mu gusoza ubutumwa bwe, SEE MUZIK yashishikarije urubyiruko gufata iya mbere mu kubaka Igihugu gishingiye ku rukundo, ubumwe n’ubwiyunge, ashimangira ko ari bwo buryo bwonyine bwo kurinda amateka mabi kutazisubira ukundi.
Kwibuka, kwigira ku mateka no guhitamo urukundo ni byo byubaka ejo hazaza h’u Rwanda.
