Mu rwandiko rugufi uwiswe KAMEGERI yandikiye abahanzi ba Gospel abinyujije ku mwanditsi wa Paradise.rw, yibajije ibibazo by’ingutu bikigaragara ahabereye ibitaramo.
Iyi nkuru nta muntu utayizi ndetse n’ibintu bigaragarira buri wese, aho imyumvire ku mitegurire y’Ibitaramo bya Gospel yazamutse ku bakunzi babo n’abitabira ibitaramo aho 90% bavuga ko bisigaye ari ’business’ ivanzemo gususutsa abitabiriye (Celebrations) no gucuruza (Business).
Hakibazwa impamvu iri terambere n’ubucuruzi by’ibitaramo byinjiriza abahanzi gusa ntibigere ku bantu babafasha.
Urwandiko rwa KAMEGERI rwibanze ku bibazo bitandukanye byibazwa muri rusange ndetse ku musozo hazamo icyakorwa. Yagiye agaruka ku banyamuziki batandukanye nk’umuntu uziranye nabo kandi bakaba baramuganirije agahinda baterwa na bamwe mu bahanzi binjiza agatubutse mu bitaramo.
Singombwa ko abahanzi basubiza ibi bibazo ahubwo ikiruta byose ni ukwiyumvira hakagira icyo bibikoraho. Abwirwa benshi akumva bene yo, ni ko na hano bimeze. Niwumva hari abo waba warakomerekeje ntiwinangire umutima ahubwo uvugute umuti w’iki kibazo kiremereye.
Muri iki iki gihe mu Rwanda n’ahandi haravugwa izamuka ry’ibiciro ku masoko byaba mu biribwa ndetse n’ibindi bicuruzwa muri rusange.
IBIKUBIYE MU RWANDIKO RWA KAMEGERI
Indamukanyo niyo ibanza muri uru rwandiko "Ndabasuhuje mu izina ry’Umwami wacu Yesu Kristo." Burya rero turagenda, tugaseka, tukabafasha ariko muturira mu mibare kandi tukabihorera ngo muzibwiriza mwatereye agati mu ryinyo amaso ahera mu kirere.
KAMEGERI YAGARUTSE KU BACURANZI
Yagize ati "Ibikorwa byanyu tubigiramo uruhare uhereye ku muziki mwiza muri Studio, tugacuranga Ingoma, Piano, Accoustic, Solo, Base guitar Trumpet n’izindi instruments, tukarara tugenda ku ma moto twikoreye amagitari dutashye mu miryango yacu ibicuku, tuvuye mu kazi kabinjiriza kuri agatubutse kuri YouTube.
Mwarangiza mukaduhemba agacumi na bitanu bya moto ? Muzadukerezeho kuko guhangana nibiciro byakaboga ku isoko byabaye ikibazo ndetse kuza mu bitaramo no kubagera bidusaba kuza dusa neza.
KAMEGERI YAVUGANIYE ABABEKINGA (BACKARS)
Yagize ati "Akenshi tubageraho twishe za gahunda zitandukanye twigomye byinshi, mu rugo, tukica n’izindi gahunda ku rusengero, ku ishuri tuza kubafasha ariko mukaducyura ibicuku ndetse tugatahana agasenda akenshi bikatunanira no kuyakoresha kubera ubuke byayo!
KAMEGERI YAKOMOJE KANDI KU GAHINDA K’ABA CAMERAMAN, PHOTOGRAPHER, SONORISATION, LIGHTING...)
Ati "Twubaha imirimo yanyu ndetse tubagomba icyubahiro byaba mu kazi ndetse n’urwego muri ho ariko muri mwe hari abakorana n’ibisambo (Events organisers) bigatuma twamburwa, abandi bakayaduha twaserereye, bigatuma ducungana namwe ngo mutaducika.
Hari bamwe bayaduhaya twahamahaye ari uko abayobozi bahageze abandi tukagana RIB bikangiza icyizere, bigatuma ubutaha mutwima ibiraka. Mugerageze mwisubireho ayo make aboneke kuko akenshi ibikoresho turabikodesha twabanje gukomaho ayacu.
Paradise.rw imaze gusesengura ibibazo bimwe na bimwe bikigaragara mu mitegurire n’ibitaramo ndetse n’imikorere n’imikoranira, yaganiriye na bamwe mu bacuranzi, aba backers n’abafite aho bahurira n’imirimo mu bitaramo, yumva ibyifuzo ndetse n’uburyo baketereza uko abahanzi bakemura ibi bibazo.
Uwa mbere yagize ati: "Njye ndi umucuranzi ndi umwe mu bakunda kugaragara ncuranga mu bitaramo byinshi bitandukanye. Abahanzi bamwe dusa nk’aho dukorana birambye kuko hari nabo tumaranye imyaka myinshi, baduhemba mu bice bice bitewe n’uburyo baba bayabonye nyamara bagiye baduha amasezerano (Contract) ku bitaramo twabizera tukimenya tukabategereza bakatwishyura basoje akazi, n’ayo mafranga akazira rimwe natwe akagira icyo adufasha"
Uwa 2 yagize ati: "Birashoboka ko umuhanzi yategura igitaramo agashyiramo imibare myinshi kandi akumva ko guhemba ibice bice ari byo bimufasha kwigabanyiriza imitwaro ariko biramuhendesha ku rundi ruhande kuki bataduha ama contract ku bitaramo bafite tukazishyurwa birangiye?".
