Nayo akomeje ibikorwa bye by’ivugabutumwa aho ateganya igikorwa gikomeye cya “Mission Trip,” Urugendo rw’Ivugabutumwa azakora ku wa 21 Werurwe 2026, kuva Saa Munani z’amanywa kugeza Saa Kumi n’Imwe z’umugoroba, kuri Nkuri SDA Church, aho abazitabira bazafatanya mu kuramya no guhimbaza Imana bifashishije indirimbo ze.

Ibi bije bikurikira isohoka ry’indirimbo nshya ya Jeanne Nayo yise “Utugarure”, yakiriwe neza n’abakunzi b’umuziki wo kuramya Imana. Iyi ndirimbo igaruka ku isengesho rikomeye ryo gusaba Imana kongera kugarura amahoro, ibyiringiro n’ubumwe mu bantu bayo.

Mu kiganiro yagiranye na Paradise, Jeanne Nayo yavuze ko “Utugarure” ari indirimbo yavuye ku mutima, ishingiye ku bihe bikomeye isi irimo, dore ko aririmba ati: “Mana reba uko tumeze, reba amakuba twagize…”, agaragaza uko abantu bakomeje guhura n’ibibazo bikomeye ariko bagakomeza kwiringira Imana.

Iyi ndirimbo yasohotse ku wa 27 Gashyantare 2026, ikaba ari imwe mu ndirimbo zizagaragara kuri gahunda y’ibihangano ateganya gushyira hanze muri uyu mwaka. Ni na yo ya mbere imutangije umwaka wa 2026, nyuma y’iyo yise “Nta Mpamvu” yasohoye amashusho yayo mu Kuboza 2025.

Igikorwa cya “Mission Trip” ateganya ni kimwe mu bigaragaza ko atagamije gukora umuziki gusa ngo yiturize, ahubwo anashyize imbere ivugabutumwa rishingiye ku guhumuriza abantu no kubashishikariza kwegera Imana yifashishije ijwi ryiza Imana yamuhaye.

Jeanne Nayo akomeje kwifurizwa kuzabana n’Imana muri uru rugendo, kuko ari rumwe mu bikomeje kugaragaza ko afite intego yo gukoresha impano ye mu gukwirakwiza ubutumwa bwiza, aho ibikorwa bye bihuza umuziki n’ivugabutumwa mu buryo bugera ku mitima ya benshi.

Jeanne Nayo wateguje “Mission Trip” agezweho muri “Utugarure”. Yirebe kuri YouTube