Uwo mvuga ni impano Imana yihereye u Rwanda, uyu munsi ndamwita umusizi kuko nazinduwe n’igisigo cyuje imikarago n’imigemo yuje urwunyunyu.

Ndavuga umusizi wasizwe "Aloys Habi" uherutse gushyira hanze igisigo yise "Ikinegu" kigamije gukebura ababyeyi bambaye umwenda wuzuye icyasha bitewe no gutererana abo bibarutse bakisanga bahindutse ba maguru y’urubabara rwa rubaburabirenge bigize rubebe bitewe no gutereranwa n’ababibarutse.

Iki gisigo kizagaruka mu bisigo byiza byaranze umwaka bitewe n’impanuro zirimo,isubirajwi ndetse n’ubuhanga bw’umusizi nyir’izina.

Mu kiganiro yagiranye na Paradise.rw, Aloys Habi yagize ati: "Mbere na Mbere ndashima Imana ndetse n’abantu ku bwo kunshyigikira cyane. Ibyo nagezeho byose mbikesha Rurema yatoranyije abo kunkomeza amaboko nk’uko Aroni yakomezaga amaboko ya Mose kugira ngo ataruha kandi urugamba rugeze mu mahina".

Yagize ati: "Imvo n’imvano y’iki gisigo, ni umusangiro wa buri mwaka ngirana n’abantu bababaye biganjemo abana bo mu muhanda bamwe bakunze kwitwa Mayibobo.

Nagerageje kuganira nabo muri uwo musangiro, negera umwe ku wundi mubaza icyamuteye kuba muri ubwo buzima, gusa benshi bakomeje gushyira mu majwi ababyeyi b’abapapa babataye mu gihe cyo kudatabwa, inzara yabarembya bagahitamo kwigira ba rubebe mu muhanda".

Ubwo twamubazaga niba Papa we ataramutaye nk’uko byumvikana mu gisigo yasubije ati: "Oya we!!!!" Papa ni umwe mu mfura zagumije akabando, ahubwo nashakaga kwifatanya no kwisanisha n’aba bana, ndetse no kubatabariza kuko babayeho nabi cyane. Ikindi, birumvikana nashakaga guhanura ababyeyi ngo bite ku bana babo".

Aloys Habi wamenyekanye nk’umuhanzi ufite igikundiro ndetse akaba ari muri mbarwa bafite indirimbo imaze kurebwa n’abarenze abantu miriyoni mu Rwanda. Iyi akaba ari indirimbo yise "Mbitse Inyandiko."

Uyu musizi yakomeje abwira Paradise.rw ati: "Ubusizi nabutangiye cyera nkiri umwana niga mu mashuri abanza".

Aloys Habi akaba ateganya gutaramira mu gihugu cy’u Burundi aho ateganya gukorera ibitaramo bitatu.

Aloys Habi yinjiye mu busizi