Tumaze kubona Israel Mbonyi yuzuza BK Arena inshuro eshatu yikurikiranya mu gitaramo akora buri mwaka kuri Noheli, akaba yaracyisee "Icyambu Live Concert". Igitaramo cyo mu 2024 cyari umwihariko dore ko cyanabereyemo udushya twinshi.
Kuwa Gatatu tariki 25 Ukuboza 2024, ni bwo Israel Mbonyi yakoze igitaramo "Icyambu Live Concert Season 3". Cyabereye muri BK Arena kuva saa Kumi n’ebyiri z’umugoroba, cyitabirwa n’abarenga ibihumbi 10 baturutse impande zose z’igihugu ndetse Paradise yamenye ko hari n’abacyitabiriye baturutse mu mahanga.
Iki gitaramo cyitabiriwe n’abarimo ibyamamare nka The Ben wari uri kumwe na Mama we, Aline Gahongayire, Minisitiri w’Ububanyi n’Amahanga, Amb. Olivier Nduhungirehe; Gaby Kamanzi, Apotre Mignonne Kabera wabwirije muri iki gitaramo na Gentil Misigaro utegerejwe mu gitaramo Joyous Celebration Live in Kigali kizabera muri BK Arena tariki 29 Ukuboza 2024.
Mbonyicyambu Israël [Israel Mbonyi] ukunzwe cyane mu ndirimbo "Nina Siri", yatanze Noheli ishyitse ku bitabiriye igitaramo cye, abaririmbira indirimbo ze zitandukanye mu masaha arenga ane, barizihirwa cyane. Yasoreje ku ndirimbo, afatanya n’abakunzi be kuririmba bati: “Icyambu yambereye icyambu, maze nanjye ampindura icyambu, angira umurobyi w’abantu”.
Mbonyi yakoze iki gitaramo mu gihe ari kwizihiza imyaka 10 amaze mu muziki. Mu ndirimbo yaririmbye mu gitaramo yakoze kuri Noheli harimo n’iziri kuri Album ya kane yise "Ndi ubuhamya bugenda". Yakomoje ku gutaramira muri Stade Amahoro, nyuma yo gushimira Minisitiri Nduhungire he wabimusabye ndetse akitabira n’igitaramo cye. Na mbere y’uko atarama kuri Noheli, babanje guhura bagirana ibiganiro.
Mu gitaramo mo hagati, Israel Mbonyi yashimiye Minisitiri w’Ububanyi n’Amahanga n’Ubutwererane, Amb. Olivier Nduhungirehe, witabiriye igitaramo cye ari hamwe na mushiki we Marie Nduhungirehe.
Mbonyi yavuze ko Minisitiri Amb. Nduhungirehe ari we wamusabye ko yazakorera igitaramo muri Stade Amahoro ivugururuye, aho kuri ubu yahawe ubushobozi bwo kwakira abantu ibihumbi 45 bicaye neza. Ati “Ni we wansabye ko nakorera igitaramo muri Stade Amahoro kandi nizeye ko bizaba.”
Mbonyi yizeye ko azataramira muri Stade Amahoro
Mbonyi amaze kuzuza BK Arena inshuro eshatu yikurikiranya
Israel Mbonyi ategerejwe muri Kenya mu gitaramo cyambukiranya umwaka wa 2024 na 2025
