Isirayeli yahakanye ko nta ruhare yagize mu ihanuka ry’indege ryahitanye Perezida wa Irani n’abandi banyacyubahiro bari kumwe, dore ko bamaze imyaka myinshi bashyamiranye kandi amakuru ari gucicikana ku mbuga nkoranyambaga akaba akomeje gushinja Isirayeli kubigiramo uruhare.
Kuri iki Cyumweru tariki ya 20 Gicurasi 2024, Perezida w’imyaka 63 wa Irani Ebrahim Raisi, Minisitiri w’Ububanyi n’Amahanga Hossein Amir-Abdollahian, n’abandi banyacyubahiro bakomeye bo muri Irani baguye mu mpanuka y’indege, Isirayeli bamaze imyaka ibarirwa muri 45 ari abanzi kuva mu wa 1979 ishyirwa mu majwi.
Nk’uko ikinyamakuru Ahram Online kibitangaza, abakomeje gushinja Isirayeli bari gushingira ku bikorwa biherutse kuba hagati y’ibi bihugu, aho byagabanyeho ibitero bikomeye ariko ari Isirayeli yabitangije.
Isirayeli yagabye ibitero bya misile kuri Irani, mu gisa nko kwihimura ku bitero bya za dorone na misile iki gihugu cyayigabyeho. Iturika ryumvikanye mu ntara ya Isfahan iherereye rwagati muri Iran, ndetse itangazamakuru ryo muri iki gihugu rivuga ko ingendo z’indege zahise zihagarikwa mu migi itandukanye y’igihugu.
Isirayeli yahisemo gutera Irani, Siriya na Iraki, Libani na Yameni icyarimwe, nyuma y’uko ibi bihugu byafatanyije kuyigabaho ibitero, ariko Irani yo yihoreraga ku gitero cya mbere Isirayeli yari yabanje kubagabaho i Damasiko, ku birindiro by’ingabo.
Impanuka ya Kajugujugu iri gushinjwa Isirayeli yabereye mu mugi wa Jolfa uherereye mu burasirazuba bw’igihugu hafi ya Azerbaijan, mu birometero 600 uvuye ku murwa mukuru Tehran.
Mu gitondo cyo kuri uyu wa Mbere, tariki 20 Gicurasi 2024, Ibitangazamakuru bya Leta ya Irani byemeje ko Perezida Rais n’abo bari kumwe muri Kajugujugu nta n’umwe warokotse.
Mu gitondo cya kare cyo ku Cyumweru, Perezida Raisi yari yagiye muri Azerbaijan mu muhango wo gutaha urugomero yari yatumiwemo na mugenzi we Perezida Ilham Aliyev. Uru rugomero ruri ku mugezi wa Aras ni urwa gatatu rwubatswe ku bufatanye bw’ibihugu byombi.
Isirayeli ikimara kubona uko ikomeje gushinjwa kugira uruhare mu ihanuka ry’indege yagize iti: “Si twe,” nk’uko umukozi wayo utashatse gushyira izina rye hanze yabitangaje. Yakomeje avuga ko Isirayeli itigeze igira uruhare urwo ari rwo rwose mu byabaye.
Ibitangazamakuru bya Leta byatangaje ko amashusho yavuye kuri rubuga yerekanaga ko kajugujugu yakozwe na Leta zunze ubumwe za Amerika Bell 212 yagonze umusozi, nubwo nta jambo ryigeze rivugwa ku cyateye iyi mpanuka.
Bityo, Isirayeli irasaba ko abakomeje kuyishinja bashingiye ku bitero yagabyeyo bakurikirana amakuru neza, bakareka gukoresha ubwonko nabi bashingiye ku bidahari, kandi ukuri kwagaragaye.
Perezida wa Irani
