Ubuzima bwe bugaragaza uko Imana ishobora gukoresha umuntu ufite intege nke mu buryo bw’umwuka no mu buryo bw’umubiri kugira ngo asohoze umugambi wayo. Yari yaratoranyijwe kuva akivuka kugira ngo azabohore Abisirayeli ku butegetsi bw’Abafilisitiya.

Iyi nkuru iragaruka ku buzima bwa Samusoni, ibikorwa bye by’ubutwari n’intege nke byamuranze, ndetse n’amasomo y’ubuzima twakura mu rugendo rw’ubuzima bwe.

1. Ivuka rya Samusoni ryari ritangaje
Samusoni yavukiye mu rugo rwa Manowa n’umugore we, bari batarabyara, bivuze ko yari imfura nyuma yo kumara igihe umugore we ari ingumba. Umumarayika w’Imana yabonekeye nyina, amubwira ko azabyara umwana w’umuhungu uzaba Nazariyo cyangwa Umunaziri, bisobanuye ko yari kuvukira gukorera Imana kuva akivuka kugeza apfuye.

Yari afite amabwiriza yo kutanywa divayi cyangwa ikindi kinyobwa gisindisha, kutarya ibyanduye, no kutogoshesha umusatsi we. Uyu mwana yagombaga gukura yiteguye gukura Abisirayeli mu maboko y’Abafilisitiya.

2. Ubutwari bwa Samusoni n’ubuzima bwe bwite
Gushaka umugore w’Umufilisitiya:
Samusoni yashatse umugore w’Umufilisitiya, nubwo ababyeyi be batabyishimiye. Imana yari yaragennye iki gikorwa kugira ngo ice inzira yo gutangiza amakimbirane hagati y’Abisirayeli n’Abafilisitiya, kuko ari yo yari gutuma Samusoni abica.

Urugero ni urugaragara mu Bacamanza 14:10-20 havugwamo inkuru igaragaza uko Papa wa Samusoni yamanutse akajya aho wa mukobwa yabaga, Samusoni akahakoreshereza ibirori nk’uko n’abandi basore babigenzaga. Nuko bamubonye bamuzanira abasore 30 bo kumuherekeza.

Samusoni arababwira ati: “Ngiye kubabwira igisakuzo, nimubona igisubizo cyacyo iminsi irindwi y’ibirori itararangira, nzabaha amakanzu 30 n’imyitero 30. Ariko nikibananira, ni mwe muzampa amakanzu 30 n’imyitero 30.” Baramusubiza bati: “Ngaho kitubwire twumve.” Arababwira ati: “Mu kiryana havuyemo icyo kurya, Mu kinyambaraga havuyemo ikiryohereye.”

Nuko bamara iminsi itatu batarabona igisubizo. Ku munsi wa kane babwira umugore wa Samusoni bati: “Shuka umugabo wawe atubwire igisubizo cy’icyo gisakuzo. Nibitaba ibyo turagutwika, wowe n’ab’iwanyu bose. None se mwadutumiye mushaka kutwambura ibyacu?”

Umugore wa Samusoni atangira kumuririra amubwira ati: “Uranyanga, ntabwo unkunda rwose. Hari igisakuzo wabwiye abo mu bwoko bwanjye ariko ntiwigeze umbwira igisubizo cyacyo.” Samusoni aramusubiza ati: “Sinigeze nkibwira n’ababyeyi banjye, none ngo nkikubwire?”

Amara iminsi irindwi y’ibyo birori yose aririra imbere ye. Bigeze ku munsi wa karindwi Samusoni arakimubwira, kuko yari yamutesheje umutwe. Nuko na we akibwira abo mu bwoko bwe. Ku munsi wa karindwi, mbere y’uko izuba rirenga, abagabo bo muri uwo mujyi baramubwira bati: “Ni iki cyaryoha kurusha ubuki Kandi ni iki cyarusha intare imbaraga?”
Arabasubiza ati: “Iyo umugore wanjye atabafasha, Ntimwari kumenya igisubizo cyacyo.”

Umwuka w’Imana umuha imbaraga, aramanuka ajya muri Ashikeloni yica abagabo 30 bo mu Bafilisitiya, afata imyenda yabambuye ayiha abashubije cya gisakuzo. Asubira iwabo arakaye cyane.

Hanyuma umugore wa Samusoni bamushyingira umwe muri ba basore bari bamuherekeje. Ubwo we nyine yahise amwanga kuko yatanze igisubizo agatuma atsindwa. Samusoni yari atangiye gushyira mu bikorwa icyo yavukiye, cyo kwivuna abanzi ba Isirayeli ari bo Bafilisitiya.

Gutsinda Abafilisitiya:
Samusoni yakoze ibikorwa by’ubutwari bikomeye mu rugamba yahuriyemo n’Abafilisitiya:
• Yatwitse imyaka yabo akoresheje ingunzu 300, azihambiriyeho imitwaro yaka umuriro.
Inkuru y’uko Samusoni yatwitse imyaka y’Abafilisitiya akoresheje ingunzu 300, azihambiriyeho imitwaro yaka umuriro iboneka mu gitabo cy’Abacamanza 15:3-5. Dore uko byagenze:

Impamvu yatwitse imyaka:
Nyuma y’uko Samusoni agambaniwe n’umugore we, umugore we akaba yari yahise atangwa kugira ngo abe umugore w’umwe mu nshuti za Samusoni, yahise agira umujinya. Ibi byatumye atangira ibikorwa byo guhangana n’Abafilisitiya mu buryo bukomeye.

“Samusoni aragenda afata ingunzu 300, afata n’ibyatsi birimo umuriro, akagenda afata ingunzu ebyiri ebyiri akazizirikanya imirizo, nuko agashyira ibyo byatsi hagati y’iyo mirizo yombi. Hanyuma yatsa umuriro wari muri ibyo byatsi maze arekurira izo nyamaswa mu mirima y’ingano y’Abafilisitiya. Atwika ibintu byose uhereye ku ngano bari barunze n’izo bari batarasarura, n’imirima y’imizabibu n’iy’imyelayo.”

Kugira ngo atsinde Abafilisitiya:
Ibi bikorwa byashimishije Samusoni kuko byagize ingaruka zikomeye ku Bafilisitiya, byangiza imyaka yabo yari igiye kwera. Samusoni yabikoze kugira ngo yihorere ku Bafilisitiya kubera igikorwa cyo kumugambanira.

Ibi bikorwa byatumye Abafilisitiya bahangayikishwa no gukurikirana Samusoni, kandi byabaye intandaro y’intambara ikomeye hagati ya Samusoni n’Abafilisitiya.

Iyi nkuru yerekana uburyo Samusoni yakoresheje ubwenge n’imbaraga kugira ngo abone uburyo bwo gutsinda Abafilisitiya mu buryo bugezweho kandi bw’ubutwari. Yishe Abafilisitiya 1,000 akoresheje urwasaya rw’indogobe.

Inkuru ivuga uburyo Samusoni yishe Abafilisitiya 1,000 akoresheje urwasaya rw’indogobe iboneka mu gitabo cy’Abacamanza 15:14-17. Dore uko byagenze:

1. Abafilisitiya baje kumufata:
Samusoni yari amaze gutera Abafilisitiya umujinya ubwo yatwikaga imyaka yabo akoresheje ingunzu (Abacamanza 15:4-5). Kubera ibyo bikorwa, Abafilisitiya baje gushaka Samusoni maze abaturage b’Abisiraheli bamubohesha imigozi bamushyikiriza Abafilisitiya ngo bagire amahoro (Abacamanza 15:9-13).

2. Imbaraga z’Imana zaje kuri Samusoni:
Ubwo Abafilisitiya bamusatiraga bamuhamagara ngo bamufate, umwuka w’Imana waje kuri we, maze atanyagura imigozi yari imuboshye, nk’aho ari umuriro uyishongesheje.

Samusoni yabonye urwasaya rw’indogobe yapfuye, arayifata maze ayikoresha mu kwica Abafilisitiya 1,000.

Nyuma yo gukora iki gikorwa gikomeye, Samusoni yashimye Imana yamuhaye imbaraga zo kunesha Abafilisitiya. Nyuma yaho, Imana yamuhaye amazi yo kwimara inyota kuko yari aruhijwe cyane n’uru rugamba (Abacamanza 15:18-19).

Iki gikorwa ni kimwe mu byerekana imbaraga zidasanzwe Samusoni yahawe n’Imana, aho yatsindaga umwanzi mu buryo budasanzwe.

Ibi bikorwa byose byatumye Abafilisitiya bagira ubwoba ku bw’imbaraga za Samusoni.
3. Intege Nke n’ihumure rya nyuma

Samusoni na Dalila:
Samusoni yagiye mu rukundo na Dalila, umugore w’Umufilisitiya, ariko Dalila yaramushutse kubera amafaranga yahawe n’Abafilisitiya kugira ngo amenye ibanga ry’imbaraga ze. Nyuma yo kumushuka inshuro nyinshi, Samusoni yamubwiye ko imbaraga ze zari mu musatsi we utarogoshwaga. Dalila yaciye umusatsi we Samusoni asinziriye, imbaraga zirashira, aba umuntu usanzwe, bituma afatwa n’Abafilisitiya, bamunogoramo amaso maze bamugira imbohe.

Urupfu rwa Samusoni:
Mu buryo bwo kugaragaza ukwihana no kwizera, Samusoni yasenze Uwiteka Imana amusaba imbaraga za nyuma. Ubwo Abafilisitiya bamushyiraga mu rusengero bamunnyega, mu rusengero rwa Dagoni, imana y’ikinyoma, kugira ngo bamuhe urw’amenyo, Samusoni yakuyeho inkingi ebyiri z’urusengero, bituma rusenyuka.

Yishe Abafilisitiya benshi, ariko na we apfana na bo. Iki gikorwa cyari ikimenyetso cya nyuma cy’ubutwari bwe bwo kurangiza inshingano ze.

Ubuzima bwa Samusoni butwigisha byinshi ku buzima bwo kwizera. Nubwo yari afite intege nke zigaragara mu buzima bwe bwite, Imana yamukoresheje mu buryo bukomeye kugira ngo yuzuze umugambi wayo.

Samusoni yerekana ko Imana ishobora gukoresha umuntu uwo ari we, kabone n’iyo yaba afite amakosa cyangwa intege nke, mu gihe yiyeguriye Imana. Urugendo rwe rutwigisha agaciro k’umugambi w’Imana, ukwihana, no kwizera mu gihe cy’amakuba.