Mbere y’uko hatangizwa Icyiciro cya Kabiri cy’Irushanwa ‘Rwanda Gospel Stars Live’, abaritegura bavuze ko biteguye kubanza kwishyura abatsindiye ibihembo byabo ubwo ryabaga ku nshuro ya mbere.
Ni ibihembo byatanzwe muri Werurwe 2022, icyakora ababitsindiye bakomeje gutegereza amafaranga yabo kugeza n’uyu munsi basaga n’abakuyeyo amaso. Kuri ubu amakuru ahari ahamya ko abatsindiye ibi bihembo bagiye gushyikirizwa amafaranga bagenewe.
Ni amakuru yahamijwe na Gahunzire Arstide uri mu bari gutegura iki gikorwa kigiye kuba ku nshuro ya kabiri. Ati “Mu rwego rwo kongera gutegura iki gikorwa nta kangononwa gahari, turateganya ko ku wa Gatanu, tariki 8 Nzeri 2023 ari bwo tuzayabashyikiriza.”
Abahanzi bari batsindiye ibihembo ari na bo bagomba gushyikirizwa amafaranga ni Rasta Jay wagombaga guhabwa ibihumbi 500 Frw nk’Umuhanzi uri kuzamuka neza mu muziki; Gisubizo Ministries yabaye iya gatatu [miliyoni 1 Frw], Aline Gahongayire wabaye uwa kabiri [miliyoni 2 Frw] na Israel Mbonyi wabaye uwa mbere agatsindira miliyoni 7 Frw.
Src: IGIHE
