Iyi ndirimbo yagiye hanze ku wa 8 Nzeri 2024, ikubiyemo ubutumwa buvuga ku izina rya Yesu. Aririmba ko Hahirwa izina rya yesu (Cyangwa abazi izina rya Yesu), izina risumba andi yose. Ni izina ryumvikana mu mwijima, rikaba nk’inyenyeri imurika, rikumvikana mu mitima y’abarizi.

Ni iya gatanu kuri album ye kuko ije nyuma y’iyo yise September Six yakoze mu rwego rwo kwibuka umwana we wapfuye ku itariki ya 6 Nzeri 2014 akivuka, Tu As Change Ma Vie, C’Est Ton Jour na Victorious.

Uyu muhanzikazi w’indirimbo zo kwamamaza ubutumwa bwiza, Aline Gahongayire, yatangaje ko mu gihe akomeje gusohora indirimbo ku ziri kuri Extended Play (EP) ye ya mbere yise “Sa Grâce” iriho indirimbo esheshatu ziri mu Gifaransa ahanini mu rwego rwo kwagura urugendo rwe rw’umuziki.

Mu kiganiro yasubije umunyamakuru agira ati: “Nakoze indirimbo esheshatu zo mu Gifaransa kuri EP, ariko nyine harimo ivanzemo Igiswayire. Imana yaransubije.

Mu ijoro ryo ku wa Kabiri tariki 20 Kanama 2024, ni bwo yagaragaje ko yarangije ikorwa ry’indirimbo zigize iyi EP ye yakoze mu bihe bitandukanye. Kandi yifashishijeho aba Producers batandukanye barangajwe imbere na Julesce Popiyeeh.

Bigaragara ko nyuma y’izi ndirimbo eshanu zamaze kujya hanze n’iya gatandatu itazatinda, kandi zose azazifashisha ubwo azaba ari mu Gitaramo, cyane ko mu Bubiligi bakoresha Igifaransa cyane nk’ururimi kavukire.

Aline Gahongayire yitegura gukora igitaramo mu Bubiligi ku itariki 05 Ukwakira 2024. Yavuze ko iyi EP ye idasanzwe mu rugendo rwe rw’ubuzima, kuko Imana iri kumukoresha ibikomeye. Ati “Yego ni EP idasanzwe kuri nge. Kuko nta na kimwe Imana inkorera mbona mu buryo busanzwe.”

Ubu harabura igihe kitageze ku kwezi abo mu Bubiligi bagataramana na we baririmbana no mu rurimi rw’igihugu, utabariyemo indirimbo zo mu Kinyarwanda zatumye amenyekana zirimo Ndanyuzwe, Ibanga, Izindi Mbaraga n’izindi.