Imiryango ikomeye si abacuruzi cyangwa abanyapolitiki gusa; ni ibigo bifite ubushobozi bwo guhindura imyumvire, gushyigikira ibikorwa by’iyobokamana, kubaka amashuri na za katederali, gutera inkunga imishinga y’amadini, ndetse no kugira ijambo mu migendekere y’imibereho ishingiye ku myemerere ya rubanda.

Muri Afurika, aho idini ari ryo rishyiraho icyerekezo cy’ubuzima bwa buri munsi, guhuza imiryango, kwigisha amahoro, no kugira uruhare mu mibanire, imiryango ikize ikunze kubihishamo, ikahagira ijambo rikomeye mu buryo butagaragara, ariko bufite imbaraga.

Ni muri urwo rwego, kureba Imiryango 10 ikomeye muri Afurika bituma tunasobanukirwa aho ubukungu bwabo buhurira n’iyobokamana, uko burigirira akamaro, ndetse n’uruhare rwabo mu mikorere y’amadini n’imiryango y’iyobokamana ku mugabane.

Izi mbaraga ntizivugwa cyane ku rwego rwa politiki gusa cyangwa ku rutonde rw’abaherwe; ahubwo ziri mu miryango yubatse izina mu bihugu byinshi ndetse no ku mugabane wose.

Ni imiryango ifite ubukungu buhambaye, ibikorwa byagutse, imishinga yashinzwe n’abakomeye, n’ubushobozi bwo gufata ibyemezo bigira ingaruka ku baturage benshi. Uruhererekane rwabo rw’ubukungu n’ubutegetsi rwigaragaza mu mpande zitandukanye z’ubuzima bw’igihugu: kuva ku bucukuzi bw’amabuye y’agaciro, ubutaka, inganda, banki, ikoranabuhanga kugeza mu miyoborere ya politiki y’ibihugu.

Dore imiryango 10 ikomeye muri Afurika mu 2025, n’uruhare rwayo mu guhindura isura y’umugabane.

1. Umuryango wa Dantata–Dangote – Nigeria

Uyu ni wo muryango ukomeye cyane mu by’ubucuruzi muri Afurika. Wabyawe n’umucuruzi Alhassan Dantata, wahaye umuryango we fondasiyo y’ubucuruzi yaje gukura ikabyara inganda n’imishinga ikomeye ku mugabane.

Aliko Dangote, umunyemari wa mbere ukize muri Afurika, afatiye runini inganda z’isukari, sima, lisansi n’ibindi. Abavandimwe be nka Sayyu Idris Dantata na Saadina Dantata bacunga ibikorwa bikomeye mu nganda z’amavuta, imari n’ubwubatsi.

Uyu muryango ni nk’isoko y’iterambere rya Nigeria n’Afurika y’Iburengerazuba.

2. Umuryango wa Motsepe – Afurika y’Epfo

Patrice Motsepe ni Umunyafurika wa mbere w’Umwirabura wigeze kuba umukire cyane, akaba ayobora African Rainbow Minerals, ikigo gikomeye mu bucukuzi. Umuryango we ufite imbaraga mu bukungu no muri politiki, harimo na mushiki we Dr. Tshepo Motsepe, umugore wa Perezida wa Afurika y’Epfo.

Bridgette Radebe, undi mushiki we, ni umugore wa mbere w’Umwirabura waguze umutungo ukomeye mu bucukuzi.

Umuryango wa Motsepe ufite n’ijambo mu mikino binyuze muri Thlopie Motsepe uyobora Mamelodi Sundowns.

3. Umuryango wa Alaouite – Morocco

Umuryango waAlaouite uyoboye ubwami bwa Morocco umaze imyaka irenga 350 ku butegetsi. Uyu muryango ufite imbaraga mu miyoborere, ubukungu, banki, itangazamakuru, ubucuruzi, ubucukuzi bw’amabuye ndetse n’ibikomoka kuri fosifate.

Umwami Mohammed VI n’abagize umuryango we bagira uruhare mu bikorwa bya dipolomasi, imishinga y’imibereho myiza n’iterambere ry’igihugu.

4. Umuryango wa Adeleke – Nigeria

Ni umuryango uhuza politiki, ubukungu n’umuco udasanzwe. Dr. Adedeji Adeleke afite ibikorwa bikomeye mu bucukuzi, inganda, ubuhinzi n’amashuri.

Umuvandimwe we Ademola Adeleke ni Guverineri, na ho umuhungu we Davido ni umwe mu bahanzi bakomeye cyane muri Afurika no ku Isi, ufite ijambo mu muco n’imyidagaduro.

5. Umuryango wa Rupert – Afurika y’Epfo

Umuryango wubatse izina ry’ubukungu bw’igihe kirekire mu bijyanye n’inganda, imari n’ibirango by’imideli mpuzamahanga. Johann Rupert ayobora Richemont, ikigo cy’imideli gifite ibirango nka Cartier na Montblanc.

Umuryango wabo ufite ibikorwa bikomeye mu bucuruzi, itangazamakuru n’icungamari.

6. Umuryango wa Sawiris – Misiri

Uyu muryango ni wo ukomeye cyane mu Misiri mu by’ubukungu. Wabyawe na Onsi Sawiris washinze Orascom Group. Abahungu be batatu, Nassef, Naguib na Samih, bafite imishinga ikomeye mu by’ubwubatsi, ikoranabuhanga, itangazamakuru, ubukerarugendo n’imari.

Ni imbaraga zikomeye ku rwego rw’akarere no ku Isi.

7. Umuryango wa Kenyatta – Kenya

Ni umuryango ufite izina rikomeye mu miyoborere no mu bukungu bwa Kenya. Mama Ngina Kenyatta n’abahungu be barimo na Uhuru Kenyatta bashora imari mu butaka, ubuhinzi, amahoteli, imishinga y’imiturire ndetse n’itangazamakuru. Ni bamwe mu "bakungu bacuruza ubutaka" bakomeye muri Afurika y’Iburasirazuba.

8. Umuryango wa Oppenheimer – Afurika y’Epfo

Umuryango wa Oppenheimer wubatse ubutegetsi mu mafaranga ava mu bucukuzi bw’amabuye y’agaciro, cyane cyane diyama na zahabu. Bafashe De Beers imyaka myinshi, bakagena umutungo wabo mu bihugu byinshi bya Afurika no hanze yayo.

De Beers ni kompanyi y’Abongereza n’Abanyafurika y’Epfo yashinzwe mu mwaka wa 1888 na Cecil Rhodes. Ni yo yabaye iyambere ku isi mu gucunga, gucukura no gucuruza diyama mu kinyejana cyose cya 20.

Mu myaka myinshi, De Beers yari ifite hejuru ya 85% kugeza kuri 95% by’amasoko ya diyama ku isi.
Ibyo bivuze ko n’amaduka yose yo ku isi yashakaga kugurisha diyama, hafi ya yose yazivanaga kwa De Beers.

Uyu muryango ufite n’imbaraga mu mibereho ya sosiyete binyuze mu mishinga y’uburezi n’iterambere.

9. Umuryango wa Mansour – Misiri

Umuryango wa Mansour ukomora ubukire mu bucuruzi bw’imyenda n’ipamba, ariko waragutse ugera mu by’inganda nini zirimo imodoka za General Motors, Caterpillar, ndetse n’ishoramari mu bigo bikomeye nka Uber, Meta na Airbnb.

Uyu muryango ugenzura imishinga irenga ibihumbi mu bihugu birenga 100 ku Isi.

10. Umuryango wa Masiyiwa – Zimbabwe

Umuryango wa Strive Masiyiwa ni umwe mu bayoboye impinduka mu ikoranabuhanga rya Afurika binyuze muri Econet, Liquid Telecom, fintech n’indi mishinga y’ikoranabuhanga. We n’umugore we Tsitsi bashora imari no mu bikorwa by’ubugiraneza, na ho abakobwa babo bakiri bato batangiye gufata inshingano mu mishinga ya digital.

Iyi miryango 10 si iy’abakire gusa, ni imiryango ifite imbaraga zisobanura uko ibihugu bimeze n’icyerekezo cya Afurika mu bijyanye n’ubukungu, politiki, ikoranabuhanga, umuco n’iterambere rusange. Uruhare rwabo ni urw’ingenzi, kandi ni bo bafite ijambo mu mpinduka zigiye kuranga umugabane mu myaka iri imbere.

Iyo urebye imiryango ikomeye muri Afurika, aba Dangote, Motsepe, Sawiris, Oppenheimer, Kenyatta n’abandi, ntibigarukira ku butunzi, imitungo, cyangwa ibikorwa by’ubucuruzi gusa. Uruhare rwabo mu iyobokamana n’imishinga y’ireme ry’imibereho rutanga ishusho y’uko ubukire bushobora kuba isoko y’impinduka nziza.

Bafasha mu kubaka ibigo by’amahugurwa y’abapasitori, amasomero, ibitaro by’amadini, amashuri yigisha imyemerere, ndetse bamwe bagashyigikira imishinga ya Bible translation, ibikorwa by’ubutabazi, n’iterambere rishingiye ku idini.

Mu gihe imiryango ifite ijambo mu bukungu igera no mu iyobokamana, ihinduka nka moteri ihuza ubukire n’imyemerere, ikagira uruhare mu buryo amadini atanga ubutumwa, uburyo akorana n’abaturage, ndetse n’uko yinjira mu bikorwa by’amajyambere. Abakire bashyigikira iyobokamana, ariko rimwe na rimwe n’amadini akenera abo bakire mu kubaka ibikorwa remezo no kwagura ubutumwa bwayo.