Mu byishimo byinshi, imbyino zinejeje n’impundu zihariye zo kwakira abashyitsi bo ku Kirwa cya Nkombo, ijambo "Enyanya Enyanya", risobanura ngo "Hejuru hejuru", ni bimwe mu byaranze ubukwe bwa Jean Paul na Joselyne.

Ku wa Kane tariki ya 11 Kamena 2026, ni umunsi ufite icyo uvuze ku muryango mushya wa Horanimpundu Jean Paul na Mukaniyogushimwa Joselyne, watangiye urugendo rw’ubuzima bw’urushako.

Imbere y’Umunyamabanga Nshingwabikorwa w’Umurenge wa Jabana, hamwe n’imbaga y’abavandimwe, inshuti n’imiryango, Mukaniyogushimwa Joselyne na Horanimpundu Jean Paul barahiriye kubana nk’umugore n’umugabo.

Nyuma yo gutera igikumwe, bakomereje mu muhango wo gusaba no gukwa. Bahavuye berekeza muri Kiliziya Gatolika, Paruwasi ya Kabuye, muri Arikidiyosezi ya Kigali, aho Umupadiri yabasabiye umugisha.

Mu gitambo cya Misa, Padiri yabasabye kubahana muri uru rugendo batangiye rwo gushinga urugo, anabasaba kwirinda kongera kureba abo bandikiranaga ubutumwa bugufi kuri telefone zabo.

Padiri kandi yabajije Horanimpundu ati: "Ubu ushobora kubwira Mukaniyogushimwa umubare w’ibanga wa telefone yawe, agasoma ubutumwa bwose bwoherejwe?" Yongera abaza Mukaniyogushimwa ati: "Na we wabwira Horanimpundu, umugabo wawe, umubare w’ibanga wa telefone yawe, agasoma ubutumwa bugufi bwose boherejwe?"

Padiri yakomeje abagira inama yo kutazagirana amakimbirane ashingiye ku kuba umwe yajya mu bwiherero, akagaruka asanga mugenzi we ari gusoma ubutumwa bugufi bwoherejwe kuri telefone ye.

Mu bukwe bwari bubereye ijisho hagaragayemo ibyishimo n’imbyino zikunzwe cyane zitwa Umusamo, ziririmbwa mu rurimi rw’abo ku Kirwa cya Nkombo.

Mu birori kandi hagaragayemo udushya turimo ijambo ryakunze kugarukwaho na Nyakubahwa Perezida Paul Kagame mu rurimi rw’Igihavu igihe yiyamamazaga mu Karere ka Rusizi, agira ati: "Enyanya Enyanya", bisobanura "Hejuru hejuru."