Moses Bliss yahawe impamyabumenyi ya Doctorate y’icyubahiro (Honoris Causa) mu by’umuziki n’ubugeni. Ese hazakurikiraho Israel Mbonyi na Muka Chryso, ari we Sharon Gatete?
Ku wa 5 Ukwakira 2025, umuhanzi w’icyamamare mu muziki wa Gikristo, Moses Bliss, yahawe Impamyabumenyi y’icyubahiro (Honorary Doctorate) mu by’umuziki n’ubugeni (Music and Performing Arts), ayihawe na Global University of Science and Technology, USA, ku bufatanye na Clima Africa Leadership Academy.
Uyu muhango wabereye i Johannesburg muri Afurika y’Epfo, ahahuriye abantu b’ingeri zitandukanye bashimiwe uruhare bagize mu guteza imbere umuziki n’ubuyobozi bufite indangagaciro.
Moses Bliss yashimiwe by’umwihariko uruhare rwe mu gutanga ubutumwa bw’icyizere n’urukundo binyuze mu bihangano bye nka Too Faithful, Miracle No Dey Tire Jesus, na Bigger Everyday, byahinduye ubuzima bwa benshi.
Nubwo iyi ari impamyabumenyi y’icyubahiro itagendanye n’amashuri asanzwe yiga, ni ikimenyetso cy’ishimwe ku musanzu we ukomeye mu muziki w’ivugabutumwa no mu kwereka urubyiruko icyerekezo binyuze mu mpano ye n’umuhamagaro afite.
Sharon Gatete / Muka Chryso – Intego yo kubona PhD
Sharon Gatete, umuririmbyi w’indirimbo zihimbaza Imana uri mu nzira yo gukomeza amasomo ye mu bijyanye n’umuziki, afite intego yo kubona Impamyabumenyi y’Ikirenga (PhD) mu muziki.
Uyu mukobwa w’umuhanga cyane kandi wiyemeje gukorera Imana binyuze mu mpano ye yo kuririmba no kwandika indirimbo, ubu ari kwiga Bachelor’s Degree ya Muzika muri Daystar University iherereye muri Kenya.
Mbere yaho, yize umuziki mu Rwanda, muri Nyundo School of Music (ubu yahindutse Rwanda School of Creative Arts and Music). Avuka mu muryango w’abakozi b’Imana, akaba ari umukobwa wa Pastor Godfrey na Pastor Peace Gatete, bayobora Revival Temple Church i Remera mu Mujyi wa Kigali.
Sharon avuga ko impamvu yifuza kugera ku rwego rwa PhD ari uko ashaka gukomeza guhimbaza Imana mu buryo bw’umwuga, abinyujije mu ndirimbo zifite uburemere n’intego y’ivugabutumwa.
Ku rundi ruhande, hari amakuru avuga ko itariki y’ubukwe bwa Chryso na Sharon yari yashyizwe ku ya 22 Ugushyingo 2025 yimuwe, bikaba biteganyijwe ko ubukwe bwabo buzaba mu matariki abanza y’ukwezi k’Ukwakira.
Sharon Gatete na Chryso Ndasingwa ni abaririmbyi b’indirimbo zo guhimbaza Imana bahujwe n’urukundo rukomeye, rufite ishingiro mu gukorera Imana n’umuhamagaro bahuriyeho wo kuyikorera binyuze mu muziki.
Uru rukundo rwabo rwamenyekanye cyane ubwo batangazaga ko bagiye kurushinga, bakaba bari barateganyije gukora ubukwe ku itariki ya 22 Ugushyingo 2025, umunsi umwe mbere y’igitaramo gikomeye Chryso azakorera i Burayi.
Sharon, uzwi mu bihangano nka Inkuru Nziza na Nzategereza, azwi nk’umukobwa w’umunyempano kandi wiyeguriye umurimo w’Imana, akaba yarabonye umukunzi uhuriye na we ku ntego n’umuhamagaro.
Israel Mbonyi – Amasomo ya PhD
Israel Mbonyi kuri ubu ari gukomeza amasomo ye ya PhD muri Canada, aho yiga ibijyanye n’ubuzima rusange (Public Health), mu buryo bwifashisha ikoranabuhanga (online learning).
Uyu muhanzi yatangiye aya masomo muri Nyakanga 2023, abifatanya no gukorera Imana binyuze mu muziki. Mbonyi, usanzwe afite impamyabumenyi ya Master’s mu by’imiti (Pharmacy) yakuye mu Buhinde, yavuze ko gukomeza kwiga ari uburyo bwo kongera ubumenyi no gutegura ejo hazaza, mu gihe akiri mu rugendo rw’umuziki n’ivugabutumwa.
Avuga ko adashaka gusigara inyuma mu bumenyi, ari na yo mpamvu yahisemo gukomeza amasomo ye, akomeza no gutaramira imbaga y’abantu hirya no hino.
Mu muziki, Israel Mbonyi yigaragaje nk’umwe mu bahanzi b’ibihe byose mu Rwanda no muri Afurika y’Iburasirazuba, ahanini binyuze mu bihangano bye bikora ku mitima ya benshi. Yamenyekanye cyane mu ndirimbo nka Nina Siri, ari na yo yatumye atangira kumenyekana mu ruhando rw’umuziki mpuzamahanga.
Nyuma haje izindi ndirimbo zakunzwe cyane nka Nita Amini na yo yaciye agahigo ko kurebwa n’abarenga miliyoni 50 kuri YouTube. Izindi zakunzwe cyane cyane mu bumva Ikinyarwanda ni nka Ku Migezi, Karame, Nzibyo Nibwira n’izindi.
Album ye nshya yise Nk’umusirikare, yamurikiye i Burayi muri Kamena 2024, yamuhesheje igikombe nk’umuhanzi ukunzwe cyane i Burayi, agihabwa n’Umuyobozi wa Bruxelles, Philippe Close.
Mu gitaramo cyabereye kuri Intare Conference Arena ku wa 5 Ukwakira 2025, Israel Mbonyi yamuritse ku mugaragaro album ye ya gatanu yise “Hobe”, ikaba igizwe n’indirimbo 14 zifite ubutumwa bukomeye bwo gukomeza gufasha benshi kugira ukwizera, kwihana, gushima Imana no kongera kwiyubaka mu buryo bw’umwuka.
Izi ndirimbo zirimo Hobe, Uriya, Sindekura, Umurage, Sijamalizana Na Wewe, Umva rero wa si we, n’izindi, zakiriwe neza n’imbaga y’abafana bari baturutse imihanda yose. “Hobe” yaje nk’intambwe nshya mu murimo we.
Mu gihe Moses Bliss yahawe icyubahiro binyuze mu guhabwa Doctorate, abandi bahanzi nka Sharon Gatete na Israel Mbonyi bakomeje urugendo rwabo rwo kuyishaka.
Kuri Sharon, intego yo kugira PhD mu muziki ni icyifuzo cyiza, kandi azabigeraho. Ku Mbonyi, urugendo rwe rwo kwiga akabona PhD arugeze kure.
Mu by’ukuri, ari Moses Bliss, ari Sharon Gatete, na Israel Mbonyi, bakorera Umwami umwe, ku ntego imwe, yo kwamamaza ubutumwa bwiza. Nanone, bahuriye ku kugira ubumenyi bwo hejuru.
Moses Bliss, kimwe na Lilian Nneji, bahawe impamyabumenyi y’ikirenga (Doctorate) kubera uruhare bagize mu guteza imbere ivugabutumwa binyuze mu muziki.
Ibi byose byerekana ko umuziki uramya Imana uri kurushaho guhabwa agaciro ku rwego mpuzamahanga, ndetse abawukora na bo bakagenda barushaho kwaguka mu gukabya inzozi no kugera ku yindi ntera, haba mu bumenyi cyangwa mu bigwi mpuzamahanga – byose bishingiye ku gukorera Imana bafite umurava.
Moses Bliss yahawe icyubahiro binyuze mu guhabwa Doctorate, mu muhango wabereye i Johannesburg muri Afurika y’Epfo
