Imiryango mpuzamahanga ibiri ikomeye mu ivugabutumwa yifatanyije mu gukwirakwiza Bibiliya zirenga 87,000 mu ndimi 22, hagamijwe kugeza ibyiringiro bya Yesu ku miryango ifite abana barwariye mu bitaro by’umuryango mpuzamahanga wa CURE International.
Uyu muryango wa CURE International watewe inkunga n’umuryango wa Biblica, ushinzwe kugeza Bibiliya ku bantu badafite ubundi buryo bwo kuyibona mu rurimi rwabo. Izi Bibiliya zizahabwa imiryango y’abana bavurirwa mu bitaro umunani bya CURE biri muri Afurika no muri Filipine, bitanga ubuvuzi bw’indwara ku buntu.
Ibi bitaro byita ku bana bafite ubumuga bushobora kuvurwa nko kugira amazi mu bwonko (hydrocephalus), kutuzura urutirigongo (spina bifida) n’izindi ndwara. CURE International, kuva mu 1996, imaze gukora ibikorwa by’ubuvuzi birenga 330,000 no kugeza ubutumwa bwiza ku bantu barenga miliyoni 2.1.
Justin Narducci, umuyobozi mukuru wa CURE, yavuze ko bashingiye ku murongo wa Bibiliya wo muri Luka 9:2 aho Yesu yohereje abigishwa be gukiza abarwayi no kubabwira Ijambo ry’Imana. Ati: “Yesu ntiyakijije abantu gusa ku mubiri, ahubwo yabahaga n’amahirwe yo guhinduka ku buryo bw’umwuka.”
Yongeyeho ko bafite abaganga 60 b’abahanga bakora buri munsi, kandi bakorana ubuhanga n’urukundo, ari naryo shingiro ry’ubutumwa bwiza batanga.
Uyu mushinga w’ubufatanye hagati ya CURE International na Biblica wari umaze igihe utegurwa, nk’uko Narducci yabitangaje, ariko byasabaga kubanza kunoza imikorere.
Ibiciro byose bizishyurwa hagati y’abaterankunga ba Biblica n’aba CURE International. Gucuruza, gutwara no gukwirakwiza izi Bibiliya byose bizatwara hafi $500,000, amafaranga yabonetse binyuze mu baterankunga ba CURE.
Geof Morin, umuyobozi wa Biblica, yavuze ati: "Ubufatanye bwa Gikristo ni ryo shingiro ry’ibikorwa byacu byose. Kugira ngo dushyikirize abantu Bibiliya ihindura ubuzima, dukeneye abafatanyabikorwa b’indashyikirwa bakorera mu murongo wa Yesu."
Yongeyeho ati: “Ni yo mpamvu twishimiye cyane ubu bufatanye na CURE International. Batanga ubuvuzi bwuje urukundo n’ubushishozi ku bana n’imiryango yabo bakeneye guhura n’urukundo rw’Imana. Dusenga ko izi Bibiliya zizabaha ihumure n’urukundo rwa Yesu.”
Earnest Kioko, ushinzwe ibikorwa by’ivugabutumwa muri CURE, yavuze ko 75% by’abakirwa n’ibitaro byabo basigaye babona Bibiliya mu rurimi bumva, kubera ubu bufatanye.
Yasobanuye ko rimwe mu ntego za CURE ari "ivugabutumwa rigamije impinduka", aho abana bazanwa kuvurwa bahabwa uburyo bwo kumenya Kristo, bakigishwa Bibiliya kandi bagahuzwa n’umushumba wo mu gace kabo kugira ngo bafashwe gukomeza mu rugendo rwabo rw’iyobokamana.
Mu bindi bibazo bahura nabyo, harimo imyizerere mibi ko abana bafite ubumuga baba baravumwe, aho bamwe mu babyeyi babazanira za talismanes cyangwa imiti y’imyizerere mu bitaro. Kioko avuga ko iyo bamaze kubona ko abana babo bagikize, babyumva ko hari imbaraga nyazo z’Imana zibaho.
Nk’uko bitangazwa na Christian Post ducyesha iyi nkuru, Kioko yagize ati: “Iyo babyiyumviyemo, bahita bamenya ko hari imbaraga zisumba izo bari bizera mbere. Ni uko rero ivugabutumwa n’ubuvuzi bisigaye bikora hamwe kugira ngo zihindure imibereho n’imyumvire.”
