Ibintu bikomeje gufata indi ntera hagati y’umuramyi Divine Nyinawumuntu na Trinity For Support Label yamuzamuye. Ni nyuma y’amakuru yo mu marenga yari amaze iminsi acibwa n’uyu munyamakuru.
Mu gitondo cyo kuwa Kane tariki 18 Nyakanga 2024 ni bwo ikinyamakuru cya MIE cyasohoye inkuru igira iti: "Divine Nyinawumuntu ubarizwa muri Kingdom of God yaba agiye gutandukana na label ye yamufashaga?" Ni inkuru yibajijweho dore ko kuri ubu abantu barenga 500 bayikanzeho like abandi batangaho ibitekerezo.
Umunyamakuru wa MIE wanditse iyi nkuru akaba yarayanditse agendeye ku marenga y’umuyobozi wa TFS wari uherutse gusangiza abamukurikira Video z’ibihe byiza TFS yagiranye na Divine, gusa asa n’uca amarenga yo gutandukana aho yavugaga ko haba hari umu Diaspora ubyihishe inyuma.
Ku ikubitiro, inshuti z’uyu muyobozi wa TFS n’iza Divine zakomeje kotsa aba bombi igitutu ngo basobanure aya makuru, gusa buri wese yirinda kugira icyo atangaza dore ko Umuyobozi wa TFS yasabaga abamubazaga guha ituze Divine Nyinawumuntu, bakamukuraho akitegura neza ikizamini cya leta gisoza amashuli yisumbuye dore ko habura iminsi mbarwa.
Gusa ariko kuri uyu wa Gatanu tariki 19/2024 ibintu byahindiye isura. Mu kiganiro yagiranye na InyaRwanda.com, Divine Nyinawumuntu yatanze amakuru yatumye benshi bamenya igishobora gutandukanya uyu muramyi na Trinity For Support.
Yagize ati: "Mwaramutse?? Ni byo koko ndashimira Trinity for Support. Ni label yamfashije kuva natangira urugendo rwajye rwa muzika. Bamfashije buri cyose kandi n’ubu baracyamfasha. Twari twasinyanye amasezerano y’umwaka 1 yarangiye tariki 17/04/2024 gusa nabwo bakomeje kumfasha kuko nibo banshyigikiye mu gitaramo nakoze cyabereye mu kigo cy’amashuli cya Camp Kigali.
Rero nyuma yo gusoza amasezerano byose biba bishoboka. Umuyobozi wa TFS yaranyegereye ambwira ko ninsoza ikizamini cya leta dushobora gusinyana andi masezerano. Gusa siwe wenyine kuko abakomeje kunsaba ko dukorana ni benshi wenda singombwa ko bose mbavuga.
Gusa hari umugabo witwa Claude (Papa Surprise) ufite label nshya benshi bamuzi ategura irushanwa rya Gospel ryitwaga Apostle TV Got Talent ashaka ko mubera Brand Ambassador wa label ye kandi numvise afite imishinga myiza, kuko label ye ayifatanyije n’umu diaspora.
Bampamagaye kenshi bansaba ko dukorana mbabwira ko tuzabiganira nsoje ikizamini cya Leta. Gusa ntacyo nakora batabanje kuganira na Trinity for Support. Ubu ndi nk’umukinnyi w’umupira w’amaguru wasoje amasezerano rero aba ashobora kuganira n’amakipe menshi ariko Priority ikipe yakinagamo. Rero babe bandetse ubu umutima uri kuri National examination ubwo ibindi muzabimenya nyuma. Murakoze."
Nyuma y’ubu butumwa, umunyamakuru wa Paradise yahamagaye Umuyobozi wa TFS ngo imubaze kuri aya makuru yo kuba uyu mugabo witwa Uwiragiye Claude (Papa Surprise uzwi mu Irushanwa ryitwaga Apostle TV Got Talent. Iri ni irushanwa ryari rigamije kuzamura abanyempano rikaba ryaraterwaga inkunga na Nyandwi Jean De Dieu uba muri USA.
Ni irushanwa ryegukanywe n’umuramyi Butare Aime Didi wegukanye miliyoni y’amanyarwanda. Iri rushanwa rikaba ryaritabiriwe n’abarimo Divine Nyinawumuntu waviriyemo ku cyiciro cya nyuma, gusa ntaboneke muri 3 bahembwa. Muri iri rushanwa niho uyu Papa Surprise yamenyaniye na Divine Nyinawumuntu.
Aganira na Paradise, abajijwe kuri aya makuru yatangaje ku inyaRwanda.com, Divine Nyinawumuntu yavuze ko ari impamo. Ubwo yabazwaga niba mu masezerano yagiranye na TFS haba harimo ibitarubahirijwe, yagize ati: "Aha naba mbaye indashima".
"Ni byo koko hari ibitarubahirijwe nk’umubare w’Indirimbo zari mu masezerano, gusa ariko hari na byinshi bankoreye bitari mu masezerano". Yavuze ko muri TFS adafatwa nk’umukozi ahubwo yafatwaga nk’umwana. Gusa yirinze kuvuga byinshi dore ko yavuze ko yari ari muri Etude.
Amakuru Paradise igitohoza ni ukumenya niba koko Divine ashaka kugirwa Brand Ambassador w’iyi label nshya tutaramenya izina no kumenya umu diasporah waba ufatanyije n’uyu Claude wavuzwe haruguru.
Aganira na Paradise, Uwiragiye Claude Papa Surprise, abajijwe kuri aya makuru yo gukorana na Divine yagize ati: "Ni byo koko Divine ni umuhanzi mwiza, twaraganiriye tukaba tugiye kugirana imikoranire".
Abajijwe impamvu baganiriye n’umuhanzi aho kuganira na Trinity For Support yamuzamuye, yavuze ko iyo Trinity For Support atayizi n’umuyobozi wayo atamuzi. Yatanze urugero rw’uburyo Divine Nyinawumuntu bamenyaniye mu irushanwa rya Apostle TV kandi yiyandikishije ku giti cye atari label yamwandikishije. Gusa akaba yirinze kuvuga ku mudiaspora waba ukomeje guhamagara Divine amanywa na nijoro amwizeza ibitangaza.
Mu nkuru yacu y’ubutaha tuzagerageza kuvugana n’umuyobozi wa TFS dore ko kugeza ubu akomeje kwirinda kugira icyo atangaza. Bimwe mu byo TFS yafashije Divine mu gihe cy’umwaka umwe bamaranye harimo no kumurika impano mu binyamakuru bikomeye nka RTV [RTV Sunday Live], Isibo Tv [Holy Room], TVO, IGIHE, Paradise, Radio Umucyo, Tv10, InyaRwanda, GospelTime, Umuseke n’ibindi.
Uwiragiye Jean Claude (Papa Surprise) bivugwa ko yaba ari intandaro yo gutandukana kwa Divine na Trinity For Support
